الفطار بره بقى تريند الأيام دى.. والمطاعم عمومًا بدأت تهتم بالفطار، اللى ماكنش عنده فطار عمل واللى كان عنده بدأ يزود أصناف وأفكار جديدة، لكن Casper &Gambini's من زمان متميز بفطاره، اللي بيتنوع بين أصناف بيض مختلفة ومخبوزات لطيفة.

قعدنا في فرع كايرو فستيفال سيتى اللي بيتميز بواجهة زجاجية بتدخل نور الشمس وده بيضفي بهجة للمكان عمومًا. اختارنا إيج بنديكت egg benedict (59جنيه) وكرواسندويش croissandwich (42جنيه) . وعصير ليمون بالنعناع (28 جنيه).

الإيج بنديكت عبارة عن بيضpoached (بيبقى بيض متسوي في مياة مغلية وصفاره مش مستوي. عادة مش سهل يكون مضبوط) ورومي مدخن وسبانخ على عيش كيابتا عليهم صوص هولانديز وجنبهم بطاطس ودجز. البيض كان رائع.. تسويته مضبوطة والصوص كمية مناسبة والعيش فريش، والبطاطس بهاراتها مضبوطة. بشكل عام الطبق كان رائع!

الكواسندويش عبارة عن كرواسون مفتوح زي الساندويش جواه بيض سكرامبلد (مقلب)، رومي مدخن، أيس بيرج وصوص ليمون بالخل.. الكواسون طازة والحشوة مضبوطة .. السلاطة جنبها كانت من نفس الخس فكانت مملة شوية جنبها. عمومًا طبق حلو لكن صغير لو أنت جعان.

الليمون بالنعناع كان ساقع ومنعش، و الخدمة كانت سريعة واحترافية عمومًا.

الفطار في كاسبر أند جامبينى لازم تجربوه.