مانقدرش ننكر سيطرة الأكل الإيطالي والهندي على مطاعم القاهرة، وأكيد الأماكن اللي بتحاول تختلف وتختار مطابخ ثانية بتواجه صعوبات في العاصمة المصرية، ومنهم المطبخ الهندي. مصر فيها أقل من 10 مطاعم بتقدم أكل هندي أصلي، وطبعًا العدد ده يعتبر قليل جدًا، وعشان كده زيارتنا لمهراجا كانت مميزة.

مهراجا مكانه في هيلتون رمسيس وسط البلد ويتميز بديكورات بسيطة جدًا مافيهاش مبالغة مع استخدام هايل للخشب. أول لما تدخل هتلاحظ التماثيل الهندي المتوزعة في المكان والقماش واللوحات بستايلهم الهندي المعروف، وطبعًا معاهم المزيكا الهندي المميزة. بصراحة حسينا أن الموضوع مبالغ فيه شوية. عمومًا، الخدمة والجرسونات هناك عملوا أجواء ممتازة للمكان باهتمامهم بكل التفاصيل الخاصة بالمطعم والأكل.

بعد جولة استكشافية في المنيو وبعد ما نطقنا كل أسماء الأطباق غلط، وصل طبق فيه صلصة مانجو وليمون مخلل وزبادي بالنعناع ومعاهم قطعتين فلافل هندي لذيذة. برضه الفلافل السوري هي الأصل.

قررنا نفتح شهيتنا بطبق بهاجياس Bhajias (60 جنيه) من ركن المقبلات. البهاجياس عبارة عن خضار مشكل مقلي – فلفل أخضر وبصل وبطاطس وفلفل أخضر حراق - ومعاهم حمص مطحون وبيتقدم مع الطبق زبادي بالنعناع مع جبنة قريش. قوام الحمص المطحون كان هايل وعمل طعم مميز مع الخضار. أما الجبنة القريش فكانت ناشفة زي الجبنة الموتزاريلا، وبصراحة لها طعم جميل غير الجبنة القريش اللي بنشتريها من السوبر ماركت.

كلنا عارفين إن أهم لحظة في أي أكلة هندي هي عيش النان، فطلبنا نان بالزبدة والثوم (28 جنيه). العيش بيتعمل في فرن تندور – تقدر تشوفه من الغرفة الزجاجية - وميزة النان بالزبدة أطرافه المقرمشة وطعمه اللذيذ، والتعليق الوحيد إن طعم الثوم مكانش ظاهر.

وصلنا لأهم محطة في رحلتنا وهي الأطباق الرئيسية، واللي طلبنا منها Kozahi Chettinadu (115 جنيه) ودجاج Jalafrezi (105 جنيه)، الأول كان عبارة عن فراخ مخلية طرية بشكل مش طبيعي ومتبلة بالكاري ومعاها فلفل أخضر حراق وشمر وعليهم حليب جوز الهند. يمكن طعم الحليب بجوز الهند كان ضعيف، بس عجبنا طعم الصوص وقوامه وإنه ماشي مع طعم الأكل. إحنا بصراحة كنا متوقعين طعم أقوي للأكل، وقد كان مع طبق الدجاج Jalafrezi . الفراخ بتتحضر بصوص طماطم بالبهارات مع ثوم وبصل وفلفل حلو ومكعبات زنجبيل طازة، وبصراحة نقدر نقول إنه طبقنا المفضل بدون شك، خصوصًا طعم الزنجبيل القوي مع صلصة الطماطم اللي عملوا نكهة قوية جدًا للأكل.

طلبنا مع الأكل طلب جانبي وهو أرز Nimbu Chawal (45 جنيه)، بيتقدم في طبق خشب وطعمه خفيف ولذيذ، وواضح فيه طعم الليمون اللذيذ مع الكزبرة الطازة والفول السوداني اللي عملوا طعم جميل.

 

خلصت رحلتنا مع طبق Kpmali Naashpathi (50 جنيه) وهو كيك شوكولاتة تقليدي محشي فروستينج شوكولاتة وعليه كمثرى مسلوقة بالزعفران. الكيك بيتقدم معاه بولتين آيس كريم خرافيين، وبصراحة الطبق كله على بعضه حكاية ويستحق زيارة ثانية عشانه لوحده.

الزعفران عمل لون أصفر جميل للكمثرى، وطعمه الكيك الخفيف كان رائع مع الآيس كريم.

يمكن هيلتون رمسيس مش على رأس قائمة فنادق القاهرة خصوصًا مع الزحمة والدوشة، لكن في حالة مهراجا الموضوع مختلف. هيلتون بيقدموا مطعم هايل بغض النظر عن شوية أخطاء يوم زيارتنا، بس أكيد عندهم أكل هندي لذيذ مع أجواء المكان الراقية المميزة للفنادق، وكل ده مع خدمة وموظفين ممتازين.