مشهور بالـ«ديم صم – Dim Sum» والبط البكيني، وموجود في فندق الـ«فورسيزونز – Four Seasons» ويعتبر من أهم المطاعم الصينية في العاصمة. بأفضل مكونات موجودة وأحسن تجهيز للمأكولات، «إيت - 8» بعيد كل البعد عن الشكل التقليدي للمطاعم الصينية المنتشرة في المدينة.

الأطباق هناك رائعة في الطعم والشكل، هي مش بالضرورة مبتكرة، بس لو عايز تغامر بحاجة مش مألوفة جرب طبق الـ«ديم صم – Dim Sum» بالحبار، والـ« Dim Sum» هو الشكل اللي بـ يتقدم فيه الأكل الصيني بكميات صغيرة وبـ يكون مستوي على البخار بغض النظر عن المكونات. وللناس اللي مش بـ تحب الأكل حار قوي وممكن يخافوا يجربوا المطعم للسبب ده؛ لازم نقول أن المطبخ بـ يهتم أكتر بالنكهة وخلط التوابل بطريقة مميزة وان مش الشطشطة هي الصفة المميزة للمكان.

فيه شوربات ومشهيات كتيرة، بس بعد ما الشيف نَزِل لنا تحية المطعم وهي مكعبات التوفو المقلية مع صوص الفلفل الحار الحلو (سويت تشيلي)، والتوفو هو بديل اللحمة للنباتيين وبـ يتعمل من لبن الصويا وغني بالحديد والبروتينات وبـ ياخد نكهات كتير. بـ ننصحك تبتدي بالـ«ديم صم» المقلي أوالمعمول على البخار، المقلي بـ يكون محشي بالفراخ والجمبري والكابوريا وسعره 42 جنيه وطعمه لذيذ والحشو ممزوج كويس بحيث تحس بطعم الـ3 أنواع لحوم مع بعض في كل قطمة. من أهم الأطباق طبق كورات لحم الكابوريا بلبن فول الصويا المتزين بالكاﭭيار الأحمر والتوفو (52 جنيه)، وجبة رئيسية مهمة لازم تجربها لو رحت «8».

أطباق المقبلات فيه منها البسيط زي المأكولات البحرية وصوابع الخضار المتحمرة، وفيه منها الغير معتاد زي المحار والجندوفلي وبطة بكين الكاملة. طبق لحمة البيف المستوردة مع الخضار (136 جنيه) مع صوص الـ«هاوس إكس أو - House XO» الحار بنكهة السي فوود اللي بـ يستخدم كتير في الأكل الصيني وبـ يتعمل ساعات يدوي في البيوت، هو مش حار قوي بس له لسعة بسيطة كده، و بـ يدخل وسط قطع اللحمة الرقيَّقة وبـ يخللي شكلها وطعمها حلو قوي.

طبق النودلز المحمرة مع قطع البط البكيني بـ88 جنيه، تنفع تبقى طبق رئيسي أو طبق جانبي تاكله مع حد تاني، وهو عبارة عن قطع بط فريش متساوية في الحجم وشرايط النودلز الشفافة وشرايح البصل والفلفل المتقطعة مع الصوص الحلو المزز المعروف، طبق ما يتفوتش.

كمان كان في طبق سلاطة فواكة هدية من المحل كان فيه فراولة وأناناس وبطيخ وبرقوق، وطلبنا بعده ﭘودنج المانجو (30 جنيه) وكان طعمه رائع، الأرضية البيضاء المليانة بالكاسترد الناعم بـ يتقدم معاه اللبن البارد عشان تصبه على الـﭘودنج. احنا كنا شبعنا قوي ومقدرناش نخلص طبق الحلو كله رغم جودته زيه زي أي حاجة في المطعم.

الفورسيزونز نايل بلازا بـ يواصل إبهاره وحفاظه على سمعته الراقية بمطعم مميز زي «إيت - 8».