عشان تاكل أكل بيتي بس من غير تعب الطبيخ ودوشته، «الدهان» هو المكان. الدهان مطعم عائلي مصري موجود في خان الخليلي من سنين كتير، جودة الأكل حلوة قوي وسعره كويس وجوه لطيف ومن المطاعم المفضلة عند المصريين.

«الدهان» فتح دلوقتي في التجمع الخامس، غير الفرع الأصلي في «خان الخليلي». «الدهان» مكان جميل ممكن تروحوه وتاكل فيه غدوة سريعة، وبالإضافة لده هو دلوقتي بـ يمثل إختيار مناسب جداً لخروجة عائلية ظريفة لسكان التجمع الخامس.

الناس اللي بـ يحبوا «الدهان» بـ يحبوا في المشهيات بتعاته، الطحينة، اللي هي في رأيينا أحلى طحينة في مصر. ده غير اللحوم المشوية حلو قوي، والحلويات البيتي الأصلي والأسعار المعقولة. وجبة لشخصين مع مشروبات، وسلاطة وحلو مش هـ تعدي 100 جنيه.

إحنا جربنا مجموعة من المزات زي ورق العنب، الحمص، الطحينة، ،الباباغنوج (بـ 5جنيه). الفراخ مشوية، الكفتة، واللحمة مشوية اتقدمت في اطباق كبيرة ومليانة وكل طبق من دول سعره 30 جنيه وبـ يقدموه مع صوص الثوم ورز وبطاطس محمرة. اللحمة كانت مسودة شوية من الشوى وبس كانت بـ تقرمش من برة، طرية من جوة - فبالتالي ماقعدتش في الطبق أكتر من ثواني.

للأسف، الرز ماكنش مستوي قوي، بس البطاطس كانت خفيفة ومقرمشة وكانت مناسبة جدا لطبق جانبي مع اللحمة، صوص الثوم كان منعش ولذيذ، والطحينة كانت ناعمة وحلوة. والعيش الفريش اللي اتقدم مع الأكل كان لسه مخبوز وكمل الطعم الذيذ للطبق.

بالنسبة للحلويات إخترنا أم علي ورز باللبن وكان سعرهم حوالي 15 جنيه وأخدنا معاهم شاي غامق بالنعناع. أم علي كانت رائعة وكان فيها مكسرات وزبيب وجوزهند كتير قوي. الرز باللبن مكانش مسكر قوي؛ مظبوط يعني، بس كان ممكن يكون أحلى لو كان عليه قرفة وفستق وزبيب.

رغم الأكل الحلو والجو الجميل عند «الدهان»، المطعم كان ممكن يكون احسن لو الخدمة كانت أحسن من كده. الويترز في «الدهان» كانوا بـ يجيبوا الأكل على مراحل، كأنهم بـ يغصبوا علينا اننا نخلص نوع واحد بس من المزة فى كل مرة بدل ما نختار اللي احنا عايزين ناكله وننوع منه، كمان ماكانوش إدونا اهم حاجات فى الوجبة زي العيش، الشوك، وصوص الثوم لغاية ما احنا قولنا لهم. ممكن يكون ده حصل وقت ما احنا رحنا، بس طعم الأكل عوضنا عن اي حاجة.

اللي هـ يروح لازم يأخد باله من ان فيه كذا مطعم بـ يكتب اسم «الدهان»، بس «الدهان» الأصلي هو اللي في خان الخليلي والتجمع الخامس، «الدهان» مطعم أكله حلو قوي وأسعاره كويسة ومناسب لخروجات عائلية.