يلّا كبدة ومخ؟ ماشي.. فين؟ ده سؤال برضه! أكيد «الشرقاوي». طيب أي «شرقاوي»؟ سؤال صعب ده! أصل اسم "كبدة الشرقاوي" محطوط على 100 محل على الأقل في القاهرة٬ وطبعا دي مش كلها فروع لنفس المحل. حاولنا نعرف السر ورا أن كل بتوع الكبدة والمخ "شَرَقوَة"٬ وإذا كان فيه واحد أصلي والباقي بـ يستخدموا الاسم للشهرة زي ما حصل مع «الشبراوي» و«تيبيستي».

إحنا روحنا المحل الأهم والأقرب للأصالة من مطاعم الشرقاوي اللي موجود في ميدان العباسية، كان نفسنا نقول أن هو ده الفرع الأصلي بس لما سألنا واحد من الموظفين القُدام في المحل قال لنا : والله انا مش عارف إذا كان في فرع أصلي ولا لأ بس الفكرة في البداية كانت أن معظم أصحاب المحلات دي من الشرقية فعلاً ولما حد بـ يشتغل في المحل شوية ويقرر ينفصل ويعمل محل لواحده بـ يسميه "الشرقاوي" برضه بس بـ يكتب اسمه الأول قبلها بس بخط صغير كدة على اليافطة، زي الفرع ده اللي أسمه «علي الشرقاوي».

في ميدان العباسية بعد الموقف على طول في المنطقة اللي بـ يتم فيها اعمال حفر مترو الأنفاق الخط التالت هـ تلاقي محل واجهته صغيرة معمولة بالرخام الأبيض المميز لمحلات الكبدة والمخ كلها، هو ده «علي الشرقاوي». الحقيقة هما محلين بس بـ يفصل بينهم عقار أو إتنين، والمحلين بنفس الاسم بس الأولاني –و دي المفاجأة- بـ يعمل سمك جِذل (فيليه يعني) وجمبري وسبيط، والمحل التاني بـ يعمل كبدة مقليّة بالردَّة ومخ. بس المحلين تابعين لبعض وليهم نفس المنيو، يعني تقدر تقعد في محل الكبدة وتطلب سمك والعكس او تقعد في أي حتة وتطلب الحاجتين مع بعض.

إخترنا محل الكبدة ودخلنا قعدنا جوة، المساحة صغيرة وفيها 5 ترابيزات وبرة المحل في 3 ترابيزات، المكان زحمة جداً لدرجة ان فيه ناس بـ تقعد تاكل على نفس الترابيزة مع ناس ما تعرفهاش لو فيه كراسي فاضية. ولازم تنبه الويتر أنك واقف مستني مكان عشان يقعدك أول ما ترابيزة تفضى. بس الزحمة دي إن دلت على شئ٬ فهو أن الإقبال غير عادي والريحة بس وأنت معدّي قدام المحل ممكن تخليك تدخل تاخدلك ساندوتشين في السريع.

المكان نضيف جداً وفيه شاشة واحدة مش بـ تشغل قناة معينة وفيه مراوح وتكييفات بـ تشتغل حسب الموسم وأول ما بـ تقعد بـ يجيلك المنيو اللي فيه وجبات الكبدة والمخ والسلاطات ووجبات السمك والجمبري. جربنالك كل حاجة في المطعم؛ الكبدة والمخ خياليين! هـ تاكل أطعم وأرق كبدة مقلية في القاهرة، المخ المقلى أبيض زي القشطة من جوة ومقرمش ولونه جميل من برة، مع سلاطة كبدة (عبارة عن رز وفتافيت كبدة في صوص طماطم وبصل) وطحينة وسلاطة خضراء وخيار مخلل وبتنجان. كيلو مشكل سعره 75 جنيه بالسلاطات، ربع مشكل للفرد كافي جداً.

الجمبري 3 أحجام: عادي بـ 70 جنيه الكيلو، مخصوص بـ 104 جنيه، والسوبر 144 جنيه. السمك نوع واحد بلطي فيليه والكيلو بـ 60 جنيه والسبيط بـ 80 جنيه وطبعاً في رز بالجمبري سعره 8 جنيه.

السمك بـ يتأخر شوية على ما يتعمل بس طعمه كان مفاجأة هو والجمبري المخصوص اللي طلبناه خاصة لأن إحنا عارفين أن المكان مش متخصص في المأكولات البحرية.

الخدمة ممتازة وسريعة، بس تاكل وتقوم تمشي على طول عشان في ناس مستنية تاكل بعدك، هو المكان معمول للأكل بس، ومسموحلك تشرب حاجة ساقعة مع أو بعد الأكل بس بسرعة برضه. هـ تحاسب وأنت ماشي على الكاشير بعد ما تسأل الويتر "حسابي كام لو سمحت" هـ يقولك ويبلغ الكاشير عشان ياخد منك الفلوس.

«علي الشرقاوي» إن ماكانش هو الأصلي يبقى على الأقل هو الأحسن، وزباينه بـ ييجوا من كل حتة من القاهرة وكمان من المحافظات، يعني لما يبقى نفسك في أكلة كبدة ومخ على أصولها روح على ميدان العباسية وإسأل على «كبدة الشرقاوي»، هـ تلاقي ألْف من يدلك.