لو انتوا مجموعة قررت تاكل حمام محشي أو مشوي برة البيت هـ تلاقي الإقتراحات كلها في أماكن محددة أهمها «فرحات» بأي فرع من فروعه. رحنا الفرع اللي قدام البوابة الرئيسية للميريلاند في شارع الحجاز في مصر الجديدة، وجنبه على طول مطعم «هوليدايز» للمشويات برضه. «فرحات» بـ يافطته الكبير المميزة باللون الاصفر واخد دورين بس الجلوس في الدور التاني بس والدور الأرضي للكاشير والتيك آواي.

أول ما تدخل من الباب هـ تلاقي سلم بـ يطلعك الدور الثاني على طول. صالة الطعام مكيفة ومقسومة نصين فيها حوالي 15 ترابيزة بس متزنقين في بعض شوية، الديكور مستوحى من الفن الإسلامي بحوائط رخام باللونين الأبيض والأسود والزخارف بالنجوم الثُمانية، الإضاءة بـ سبوتات متركبة في السقف و فيه شاشة تليفزيون كبير بس صعب كل اللي قاعدين يشوفوها لو قاعدين على الأطراف.

خد مكانك على التربيزة اللي المنيو محطوط تحت مفرشها الشفاف لأنه صفحة واحدة والطلبات محددة جداً، واول ما هـ تقعد بـ ينزل أطباق سلاطة طحينة وبابا غنوج وطماطم وطبق خيار مخلل والأهم من ده كله كوباية شوربة حمام سخنة هدية من المطعم. المنيو عبارة عن كباب وكفتة وحمام ونيفة (لحمة الجدي والمعزة) ومخاصي وكلاوي ومزليكا (كبد وقوانص) وبس كدة، مفيش رز ولا مكرونة ولا محاشي ولا حتى طرب، الموضوع بـ يتلخص في الكباب والحمام، واللي جاي لازم يطلب الحاجات دي، لأن هو ده «فرحات».

الكباب عالمي، من أجمل 5 أماكن ممكن تاكل فيها كباب في القاهرة، مشوي كويس جداً مش بـ يشد وتتبيلته هايلة مش هـ تحتاج جنبه مشهيات، الكفتة عادية جداً ولا تليق بأسم «فرحات»، سميكة أكتر من اللازم ومالهاش الريحة الخطيرة زي الكباب مثلاً. الحمام المحشي المشوي على الفحم علامة مميزة للمطعم، مفيش ترابيزة مش عليها جوز حمام كدة عالماشي حتى لو الطلب الاساسي حاجة تانية. جربنا النيفة المشوية وطلعت دسمة شوية وتقيلة جايز كانت عايزة وقت زيادة على الفحم، رغم أن دي أكتر حاجة إتأخرت على الطلب وجت بعد ما كنا خلصنا الكباب والكفتة اللي طلبناه، بس المتعود على اللحم الضاني هـ يحبها قوي خصوصاً أن المطعم بـ يرشحها للزباين على طريقة  "أطلبها على ضمانتي".

الخدمة كويسة والمكان نظيف بس واخد الطابع الشعبي رغم أنه في مكان راقي، والعاملين في المكان صوتهم عالي وبـ ينادوا على الطلبات بصوت عالي زي القهاوي البلدي، بس واضح أن دي شخصية المكان اللي إكتسبها من التواجد الأصلي في منطقة الحسين والإدارة ماحبتش تغيرها مع كل فرع بـ يفتح في اي منطقة تانية. مسموح بالتدخين جوة المطعم ومفيش مكان لغير المدخنين بس المكان معمول للأكل مش للقعدة والدردشة فـ مش هـ تلاقي حد بـ يعمل حاجة غير أنه بـ ياكل.

الأسعار غالية شوية بالنسبة لمحلات كباب تانية، يعني كيلو المشكل كباب وكفتة بـ 142 جنيه ومفيش كباب صافي، فردة الحمام المحشي رز بـ 29 جنيه وكيلو (الإشارة والكلاوي) زي ما بـ يسموها بـ 152 جنيه، وكيلو المزليكا بـ 152 جنيه برضه والنيفة بـنفس السعر وأي سلاطة بـ 3 جنيه ونص للطبق وفيه مشروبات ساقعة كانز بـ 5 جنيه. رواد المطعم غالباً عائلات وكلهم باين عليهم عارفين المحل كويس وزباين دائمين ومتمكنين من أكل الحمام بـ إمتياز.

هـ تحاسب الويتر الرئيسي اللي بـ ياخد منك الطلبات مش على الكاشير تحت. ووجبة لفردين كلفتنا حوالي 180 جنيه بعد ما كنا طلبنا معظم الحاجات اللي في المنيو البسيط جداً.

لما تنوي تاكل حمام وكنت قريب من مصر الجديدة، الأزهر، مدينة نصر أو المهندسين، إتوجه فوراً لفرع «فرحات» اللي في المناطق دي بس ما تنساش تجرب الكباب كمان.