مين مايحبش البيتزا والباستا اللي توصل سخنة وفريش لحد باب البيت؟ «دا فرانكو» مطعم صغير بـ يعمل توصيل للمنازل وتيك آواي بس، موجود في شارع المناجم والمحاجر قدام مطعم «تيبستي» قرب ميدان لبنان في المهندسين وبـ يوصل للمهندسين والأحياء القريبة منها زي العجوزة والدقي. التوصيل بـ يكون خلال 45 دقيقة ومن غير حد أدنى للطلبات.

الأوردر بـ ييجي معاه عيش البروشيتا بالثوم هدية، بس حاول ماتشبعش قبل ما تاكل البيتزا اللي مكوناتها طازة بشكل مش عادي. المطبخ بـ يستخدم مكونات محلية في إضافات البيتزا على غير العادة، يعني مثلاً البيتزا عامة بـ يكون عليها من فوق جبنة كتير وخضار طازة وشوية دهون وصوصات، إنما هنا الموضوع مختلف ومش هـ تلاقي البيتزا العادية اللي بـ تاكلها في أي حتة تانية. بـ 27 جنيه طلبنا بيتزا اسمها «بريماﭭـيرا» بـ يكون عليها شرائح طماطم صغيرة وجرجير طازة كتير وجبنة رومانو وموتزاريلا، بس الجبنة الرومانو طعمها كان شبه الجبنة الرومي العادية، وللأسف ماكانش فيه ساعتها ذرة وريحان بس الإضافات التانية عوضت النقص بطعامتها وكمياتها الكبيرة.

المنيو كمان فيه سلاطات وشوربات ومشهيات أسعارها من 12 لـ20 جنيه، ومن ضمنها سبانخ بالزبدة وصوابع الجبنة الموتزاريلا وفيه سلاطة خضراء طازة عليها صوص اللليمون الخفيف. ومن مختارات الباستا طبق رافيول أو معجنات الجبنة بالصلصة اسمه «سانريمو» سعره 32 جنيه بـ ييجي سخن مولع بصوص الكريمة و قطع التركي المدخن والمشروم والبروكلي، الصوص كان عبقري بس الرافيول نفسه كان عايز حشو وطعم أكتر.

جربنا التراميسو من منيو الحلويات (22 جنيه) وكانت متغطية بكريمة مخفوقة خفيفة ومرشوش عليها بودرة طعمها مُر شوية خمّننا انها نسكافيه، والنتيجة أن الكيك كان طري ولذيذ جداً.

ورغم أن كان فيه مكونات ناقصة في الأكل وكاتب المقال ده كان نفسه فعلاً يجربها عشان يكتب عنها، إلا أن المكونات الموجودة قامت بالغرض وخلِت طعم البيتزا كأنه مش محتاج أي إضافات وبالذات لما تلاقي الأوردر جاي في ميعاده والأسعار ممتازة.