في شارع الميرغني، هـ تلاقي «أونيونز» الإضافة الجديدة والجميلة لمطاعم القاهرة. بخدمة ودودة وجو دافىء ومُريح، «أونيونز» يبقي مناسب جداً لوجبة سريعة وسط الأسبوع، أو خروجة في الويك إند.

المطعم فيه تراس فخم ومصمم بدقة ومُغطى بالخضرة وأضواء الحديقة، وده بـ يضيف طابع جميل لديكور المطعم بالليل.

أول ما تدخل جوة «أونيونز»، على طول هـ تحس أنك في إيد أمينة. من أول الإهتمام بكل قطعة صغيرة في الديكور، ونظافة المطعم عامةً، للطريقة اللي بيها على طول بـ يحاولوا يخلوك قاعد مرتاح ومبسوط، وإحنا وصلنا أن الخدمة في «أونيونز» مذهلة جداً. وكل اللي كُنا نتمناه أن الأكل يكون بنفس مستوى الخدمة، لكن للأسف خاب أملنا شويتين.

أول ما قعدنا، نزل لنا على الترابيزة سبتين خبز كتصبيرة لغاية ما ينزل طلبنا. المنيو في «أونيونز» مليان بالإختيارات، يعني لو بـ تفكر زينا إعمل حسابك أنك هـ تفضل حبة حلوين عشان تعرف تقرر هـ تاخد إيه.

بعد شوية تفكير، طلبنا كوردون بلو الفراخ (43.99 جنيه): أربع قطع صدور فراخ محشية بالجبنة السايحة، المشروم، الزيتون، الروست بيف، ومعمولة بالبقسماط ومحمرة. الفراخ كانت غرقانة في صوص كريمي، غني وثقيل، وطعمها كان فيه مزازة غريبة ومش حلوة، واللي بعد كده عرفنا أن سببها هو الجبن الروكفورد (Blue Cheese) اللي كانت في الصوص. كل الأطباق بـ ينزل معاها طبق واحد جانبي مكرونة أو طبقين جانبين من إختيارك من الخضار السوتيه، الأرز، بطاطس محمرة، أو بطاطس بوريه.

طلبنا كمان طبق فيتوتشيني بوللو (33.99 جنيه): وده طبق أساسي من المكرونة غرقانة في الصوص الكريمي الأبيض. بعدها جربنا التشيز برجر (13.99 جنيه) وبـ ينزل معاه شوية بطاطس محمرة، وعليه قطعة جبن شيدر وطماطم وخس، والبرجر كان معمول مظبوط جداً ومستوي حلو. طلينا كمان بيتزا الفراخ الباربيكيو (32.99 جنيه). ولو كُنا خدنا بالشكل، ماكُناش طلبنا بيتزا خالص، لأن المكونات اللي عليها كان شكلها مش جذاب وعلى وشك أنها تقع من علي وشها في أي لحظة. بس أول ما أخدنا أول قطمة منها، كل مخاوفنا إختفت.

بما أن «أونيونز» بـ يقدم كميات كبيرة، فـ ممكن يبقى صعب شوية أنك تلاقي مساحة في معدتك للتحلية. لكن لو ماحستش أنك شبعان بعد الطبق الأساسي، جرب الآيس كريم الخفيف بتاعهم (18.99 جنيه)، أو لو نفسك رايحة لحاجة شرقية أكتر أطلب أم علي (16.99 جنيه).

«أونيونز» ممكن ما يبقاش عنده أحلى أكل في كايرو، بس لو عايز أكل مُريح وخدمة مذهلة، يبقى «أونيونز» هو المكان اللي تروح له.