دليلك لأماكن الأفطار بره البيت فى رمضان 2011 - مطاعم Feature - كايرو 360
 







دليلك لأماكن الأفطار بره البيت فى رمضان 2011
دليلك لأماكن الأفطار بره البيت فى رمضان 2011
اصدرت في: 01/08/2011

رمضان بـ يحب اللمة.. واللمة في المفهوم المصري هي العزومات والبيت والأنتخة أمام التليفزيون بعدها وكرشنا مترين أدام.. لكن فيه ناس ثانية مفهومها عن اللمة هو الخروج –ممكن برضه مع الأهل مش شرط أصحاب فقط- للأكل في أماكن مفتوحة أو فى فنادق أو الخيم الرمضانية ومنها بـ يكون تغيير جو ومشاركة ناس ثانية حولنا ما نعرفهاش أجواء روحانية جميلة.

وعلشان نسهلها عليك.. كايرو360 بـ تقدم لك النهارده وفي أول أيام الشهر الكريم دليل لأماكن هـ تحب أكيد تروحها وإحنا كمان في رمضان وغيرها كثير علشان نلم الشمل ونوصل الأرحام في جو مختلف ونأكد مبدأ من مبادئ الشهر ده.

 

Cashmere (تراس مركز التجارة العالمي – كورنيش النيل):

لأول سنة أقام مركز التجارة العالمي خيمته "كاشمير" اللي هـ تعمل حفل افتتاح يوم الخميس 4 أغسطس في الدور الخامس في التراس بدعوات فقط، ومن بعدها هـ يبقى المكان مفتوح لأى حد حابب يحجز الأفطار هناك، لو أنت رايح ومعاك فرد واحد غيرك فـ لك نظام الـ a la carte أما لو كنت في مجموعة وحابين تحجزوا ففيه Set Menu بـ تتراوح أسعارها من 135 لـ 155 لحد 185 جنيه، بحد أقصى للمجموعة أنها تكون 20 فرد، والحجز لازم قبلها بـ 48 ساعة.

للحجز: 0198055367 - 0198056228

 

مطعم Condetti (المعادي):

"كونديتي" بـ يقدم في رمضان المنيو العادية بتاعته ومعاها زود أكل مرتبط برمضان منها الشوربات زى لسان العصفور أو العدس وكمان مشروبات رمضانية والحلويات الشرقية، وكمان ممكن تطلب مشروبات مصرية زي السحلب.

لو العدد كبير احجز قبلها بكذا يوم ولو صغير يبقى الحجز نفس اليوم الصبح.

فيه امتياز للمطعم ده أنك ممكن تحجز عن طريق الإنترنت على موقعهم:

http://www.condetti.com/reservations.htm

أو على تليفون: 02 2359 2440 أو 010 991 5555

 

Sky Lounge/ El Mundo – Nile Lily Boat (المنيل):

"سكاي لاونج" للأسف مش شغال في رمضان للفطار ولكن السحور شغال من الساعة 10 م لحد 2 الفجر، ومركب نايل ليلي خلت كل الأفطار في "إل موندو"، السنة دي الفرد بـ 150 جنيه وبـ تصل بعد الضريبة والخدمة لـ 185 جنيه بس هـ تتدلع لأنها عملت لك اختيارات كثير سواء في الطبق الرئيسي أو السلاطة أو الشرب أو التحلية –إلى جانب أن كل صنف مختلف عن المعتاد- ففي الأطباق الرئيسية لك 4 اختيارات: كاجون شريمبس، سكالوبيني أ ليمون، جارك تشيكن، ألموند تشيكن، وللمشروبات الرمضانية إما قمر الدين أو كركديه أو لبن رائب أو تمر هندي وبـ ينزل لك معاهم زجاجة مياه كبيرة، والشوربة: إما شوربة الطماطم بالبرتقال أو فراخ بالكريمة، والسلطة إما سيزر أو جريك، وأخيرًا التحلية مفاجأة: إما تختار مهلبية بالمانجا، أو كنافة مع خوخ بالكراميل وبـ يقدم لك معاها آيس كريم فانيليا.

للحجز: 19412

 

Indigo – First Mall (الجيزة):

الفطار عند "أنديجو" أوبن بوفيه Open Buffet الفرد بـ 200 جنيه يتضمن الأكل والمشروبات وكالعادة يفضل الحجز بدري ومش لازم تدفع عربون وروح قبل الفطار بساعة.

للحجز والاستعلام: 35700121 (125)

 

Mo Café (الشيخ زايد):

مافيش منيو مخصوص لرمضان فى "كافيه مو"، المنيو بتاعتهم العادية زي ما هي بس أضافوا فقط مشروبات رمضانية للي حابب، روح هناك قبل الأفطار بساعة، مافيش Minimum Charge ولا يشترط حجز قبلها.

للاستفسار: 38505083 - 0187947940

 

Casper & Gambini’s (سيتي ستارز - مدينة نصر):

نفس المنيو بتاعته بس زودوا عليها حاجتين في أول أسبوع: شوربة العدس وفى الطبق الرئيسي زودوا أنك ممكن تطلب أرز، والحاجتين اللي بـ يزيدوا على المنيو بـ يتغيروا كل أسبوع، يعني كل أسبوع فيه حاجتين مختلفة عن اللي قبلها، فـ كلمهم دائمًا علشان تعرف إيه الجديد عندهم، الأسعار هناك سواء في المنطقة اللي جوه أو التراس بـ تدفع الأسعار العادية في المنيو مضاف عليها الخدمة والضريبة.

للحجز والاستفسار: 24802410

 

The Revolving Restaurant 360 (برج القاهرة):

مطعم Revolving؟ مطعم بـ يلف إزاي يعني؟ ده بجد؟... أيوه ده بجد، طول ما أنت قاعد بتأكل في المطعم هيلف المكان بك 360 درجة علشان تتفرج على القاهرة من فوق البرج.

الأفطار له قائمة ثابتة Set Menu وكل يوم فيه منيو مختلفة ثابتة، الفرد بـ 150 جنيه ماعدا يوم الخميس والجمعة 190 جنيه وعامة المنيو عندهم "مدججة" بالأكل والمشروبات وفيها كل حاجة نفسك فيها لحد الحلويات، والحجز لازم قبلها بيوم.

للحجز: 27365112 - 0105063666

 

Arabesque (وسط البلد):

بـ يقدموا المنيو العادي بتاعهم Set Menu فيها شوربة وبعدها مقبلات والطبق الرئيسى بـ تختار من 3 اختيارات إما ميكس جريل أو طاجن بامية باللحمة والأرز أو الملوخية والتحلية أم علي يتبعها شاي أو قهوة على حسب مزاجك، والفرد بـ 85 جنيه، مش لازم حجز قبلها بس لو العدد كبير يفضل تعمل كده.

للحجز: 25747898 - 25748677

 

Sequoia (الزمالك):

"سيكويا" السنة دي مدلع الصائمين، روح هناك وادفع قبلها عربون 50% (خاصة لو رايحين مجموعة كبيرة) واستمتع بأوبن بوفيه فيه 11 ركن مختلف من ركن إيطالي لمشاوي سيكويا وأركان ثانية للأكل الشامى (سوري ولبناني) والمصري والطواجن والفواكة والحلويات والفواكة المجففة والمعجنات والمحاشي والعصائر الرمضانية بكل أنواعها.

الفرد بـ 220 جنيه، لو رايح أنت وواحد مش لازم عربون بس عامة احجز بـ 50% أحسن لأن المكان هناك مش بـ يفضى وما تضمنش.

للحجز: 02 2735 0014

 

Alain le Notre (الأزهر بارك):

المنيو هناك فى الأفطار هي اللي بـ يقدموها فى الأيام العادية ومافيش حد أدنى Minimum Charge، وألان لو نوتر فاتح وشغال برضه حتى من قبل الأفطار (10 ص حتى 12 بالليل) ومافيش عندهم سحور.

للاستفسار: 19133

 

البرنس (إمبابة):

مافيش حد من الـ Celebrities أو المشاهير ما راحش هناك، خاصة أن صور "ناصر البرنس" صاحب المحل مغرقة المكان جوه وبره، "البرنس" بقى بـ يقدم بقى الأكل المتين من الكوارع والعكاوي والكبده وشوربتها والطواجن والحواوشي والفتة والشوربات، وبعدها ممكن تحلي من "المالكي" اللي موجود على نفس الصف قبله.

هنا بقى ده المكان الوحيد اللي ماينفعش تحجز بالتليفون، لازم تروح بدري جدًا (قبلها بساعتين) وتقعد على الترابيزة اللي أنت عايزها (وبـ تكون فى الشارع) وتحجزها بنظام "وضع اليد" علشان المكان بـ يكون زحمة جدًا والناس بـ تبقى على الرصيف الثانى "Waiting list" لحد ما أى حد يخلص أكله ويقوم، هو الموضوع زحمة ولكنك هـ تستمتع بجو الأكل وسط الناس من مختلف الفئات وتشق ريقك بسوبيا البرنس المشهورة الساقعة والبرنس هـ يحييك بضرب صواريخ فى الهوا احتفالاً بك وبزباينه.

للاستفسار: 02-33116265, 02-37109292

 

Bella (فندق الفور سيزونس):

فاتح من 6 مساءً لحد 12 بالليل، المنيو بتاعته مافيهاش تغيير مخصوص لرمضان و A la carte ويفضل تعمل حجز قبلها.

للحجز: 27916875

 

(مركب بلو نايل Blue Nile):

بلو نايل معروف عنه أنه فيه مطاعم كثير: دار القمر، لسه فاكر، رويال ديك ستيك هاوس، مون ديك، وآسيا بار وغيرها. السنة دي "رويال ديك ستيك هاوس Royal Deck Steak House" مش شغال في رمضان، لو عاوز تفطر عندك "دار القمرDar Al Ammar " بـ 150 جنيه الفرد بوفيه مفتوح أكل لبناني، و"آسيا بارAsia Bar " بوفيه مفتوح أكل صيني والفرد بـ 185 جنيه، وأخيرًا مطعم "لسه فاكرLessa Faker " عندهم 2 منيو ثابت Set Menu إما تختار المنيو المصري بـ 165 جنيه للفرد أو اللبناني، أما السحور ففي "مون ديك Moon Deck" والفرد بـ 200 جنيه.

للحجز: 0101666381

 

Steak Out (المهندسين):

انتهيت محطتنا فى المهندسين ووصلنا لـ "ستيك أوت" اللي بـ يقدم خدمتين: خدمة داخل المطعم "خدمة صالة" وخدمة التوصيل، بالنسبة للتوصيل بـ يستقبلوا طلبات أكل من الساعة 12 لحد الساعة 5 العصر، ومش بـ يأخذوا طلبات بعد كده علشان بـ يبدأوا يعملوا أكل للصالة اللي فيه الفرد بـ 100 جنيه وهما بـ يطلبوا من الناس تيجي قبلها بساعة لأن كل ما جئت بدري أكثر أكلك هـ ينزل لك على ميعاد الآذان بالضبط، المنيو عندهم اللي بـ يقدموها فى العادي ولكن عندهم سبيشال منيو Special menu أنت ممكن تعمل فيها مزج بين كولكشن أصناف من اختيارك زيادة على طلبك الأساسي.

للاستفسار والحجز: 33379079

 

نصيحة كايرو360: حتى لو المكان مش عامل شرط أنك تحجز قبلها احجز أفضل لك بدل ما تخبط المشوار وما تلاقيش مكان تفطر، خاصة أن الأماكن دي بـ تكون زحمة في رمضان.

بالهناء والشفاء.. ورمضان كريم :)

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
01/08/2011
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!