زينة رمضان.. خيامية منصوبة في الشارع.. أصحابك أو أسرتك معاك.. ناس ثانية منتظرة بلهفة دورها تأكل على الصف الثاني.. سوبيا ساقعة مسكرة.. أكل تحفة ولمة الناس حواليك أحلى.. وفي الختام ضرب صواريخ في الهواء.. ده الجو اللي هـ تعيشه بكل حذافيره لو رحت أكلت في «البرنس» في إمبابة.

مطعم البرنس بـ يقدم لك تشكيلة أكلات شرقية وبيتي بطعم يجنن، المنيو عنده هو المفرش اللي على الترابيزة بنفس القائمة حتى في رمضان، عندك أصناف كبدة كثيرة منها الكندوز والجملي أو ممكن تطلب رغيف كبدة ولو حابب تطلبها جريل، لحمة محمرة، سجق محمر، لحمة جريل بأحجام مختلفة، ده غير المقبلات والسلطات، طواجن الخضار والمكرونة، والموزة والسجق والشوربات من كوارع للسان عصفور والفتة وأخيرًا وليس أخرًا الحواوشي.

اسمه الأصلي "كبدة البرنس" وده لأن "ناصر البرنس" صاحب المحل بدأ مشواره على عربية كبدة الأول لحد ما كبر وبقى عنده أكبر مطعم مافيش حد من المشاهير ما راحش أكل من عنده، لو جاءت لك فرصة تأكل في المطعم جوه هـ تلاقي صور "ناصر" مع الفنانين ولاعبي الكرة مغرقة المكان، لكن قعدة بره في الشارع على الترابيزات اللي محتلية مساحة كبيرة والعربيات بـ تعدي من جنبها ما تتعوضش، حواليك هيصة أينعم ولكن حاسة الشم هتغلب السمع عندك لأن رائحة الأكل هـ تنسيك كل ده.

هنا بقى ده المكان الوحيد اللي ما ينفعش تحجز بالتليفون، لازم تروح بدري جدًا (قبلها بساعتين) وتقعد على الترابيزة اللي أنت عايزها وتحجزها بنظام "وضع اليد" علشان المكان بـ يكون زحمة جدًا والناس بـ تبقى على الرصيف الثانى "Waiting list" حاطين لهم كراسي لحد ما أى حد يخلص أكله ويقوم، هو الموضوع زحمة ولكنك هـ تستمتع بجو الأكل وسط الناس من مختلف الفئات وتشق ريقك بسوبيا البرنس المشهورة الساقعة.

الترابيزات بطولها عليها علب مناديل وسلطات خضراء وطحينة وبابا غنوج وزجاجات مياه وطبق صغير فيه بلح وبـ ينزل لك سوبيا للي عايز وعيش وبـ يضيفهم للحساب فى الآخر، الرجالة اللي بـ يشوفوا طلباتك ممتازين تلاقيهم منطلقين في كل مكان وكل واحد مسئول عن ترابيزة متابع طلباتها وبـ يسألك محتاج إيه قبل الأذان بفترة علشان طلبك ما يتأخرش، وناصر البرنس بـ يفضل ماشي معاه ميكروفون (اللي عامل زى البوق) يشقر على الناس ويتأكد أن كل حاجة تمام وبروح مرحة يقعد يدلع السلطات والسوبيا وهي نازلة على الترابيزات ويشجع رجالته.  

طلبنا طاجن تورلي باللحمة (25 جنيه) وكان تحفة جدًا وسخن، وعامة الطواجن عنده رائعة وفيه غيرها بامية وبطاطس وملوخية وفريك كله باللحمة وطواجن عكاوي. لو أنت حابب تأكل أرز معاه اطلب منه طلبية طبق لوحده (8 جنيه) أو لو عاوزه بالكبدة أو السجق (23 جنيه لكل طبق)، كل نوع سلطة هناك بـ (3 جنيه)، المكرونات بـ يتراوح أسعارها من (12 جنيه) لحد (45 جنيه) على حسب المكونات بتاعتها، كيلو الكبدة الجريل عنده (140 جنيه) وممكن تطلب طبعًا نصف أو ربع كيلو، والحواوشي (10 جنيه).  

بعد الأكل ما ينزل وتأكل وتقرب تخلص البرنس هـ يحييك بضرب صواريخ فى الهوا احتفالاً بك وبزبائنه والمشهد ده رائع جدًا وبـ يبث بهجة في روحك مش طبيعية، بعد ما تخلص بـ تراجع طلباتك وبـ تدفعها مع الولد اللي كان متابعك من لحظة ما وصلت.

لو عاوز تعيش جو رمضاني مبهج وتحس بفرحة اللمة مع ناس حواليك مبسوطين وتفرح بطنك بأكلة جميلة.. روح البرنس اللي نتحداك أنها مش هـ تكون المرة الوحيدة في رمضان وغير رمضان.