أكيد وأنت معدي على النيل فى مرة لمحت مركب نايل سيتى، المركب اللى بـ تطل على النيل مباشرة في الزمالك جنب كوبرى أكتوبر، في المركب دى مطاعم كثير منها مطعم "تشيليز" واللى قررنا أننا نفطر فيه وبالمرة نحتفل بعيد ميلاد مع الاستمتاع بالقعدة الخلابة هناك.

دي أول مرة نروح المكان ده فى رمضان، عجبتنا الأجواء الرمضانية اللى لقيناها فيه، لكن أول لما قررنا نقعد اتفاجئنا أن الترابيزة بتاعتنا مش فى نفس المكان اللى كنا حددناه وإحنا بـ نحجز واللى كان مطل على النيل مباشرة، لكن الغريب أن التكييف فى المكان اللى قعدونا فيه كان ضعيف جدًا لدرجة أننا كنا فاكرينه مقفول.

نزلت المنيو ومعاها كاسات صغيرة من قمر الدين اللى عرفنا بعد كده أنهم ما حاسبوناش عليه، المنيو كانت متنوعة وفيها اختيارات كثير، فـ بدأنا بشوربة كريمة الفراخ (13 جنيه) واتقدمت مع البقدونس وكانت لذيذة وغنية.

 وبعد كده أخذنا الطبق الرئيسي وكان مارجريتا جريل تشيكن وهو صدور دجاج مشوى ومتبل بخلطة المارجريتا وبـ يُقدم معاه أرز وفصوليا سوداء ورقائق البيكو ديجايو (53 جنيه)، الأرز كان قليل قوى لكن الفاصوليا السوداء كانت طعمة.

كمان أخذنا ستيك بالمشروم وكان قطعة كبيرة من اللحم المتبل بالبهارات والثوم والمشروم وبـ يُقدم معاها شريحة من العيش وخضار سوتيه وكمان بولة بطاطس بيورية محشوة جبنة (90 جنيه) اللحمة كانت حلوة وغرقانة بالمشروم عليها واللى كان مستواه كويس وملحه مضبوط تمام، كمان البطاطس كانت حلوه وطعم الجبنة جواها أعطاها مذاق مميز. البيبسى هناك ""Refill علشان لو عاوز تانى تملأ كوبايتك ببلاش، بس حتى السفن أب بالفانيلا والشيرى كولا بـ يخلوا الحاجة الساقعة مختلفة هناك.

اختيارات الحلو هناك كثير لكن بصراحة ما كناش قادرين نأكل ثاني، وخصوصًا أننا شربنا مياه كثير (الزجاجة الكبيرة بـ 12 جنيه).

الأكل رغم أنه كان لذيذ إلا أنه كان بارد حتى الشوربة، ورغم أننا لما طلبنا منهم أنهم يسخنوها استجابوا، لكن إحنا شايفين أنه ما كانش لازم ينزل كده من الأول خصوصًا أنهم بـ يأخذوا خدمة ما بـ تقلش عن (10 جنيه) للفرد .

الحاجة الغريبة جدًا أن الأكل ما اتشالش على طول بعد ما خلصنا رغم أننا طلبنا ده أكثر من مرة، وخصوصًا أن كان عندنا عيد ميلاد وعاوزين نفضى الترابيزة خالص للتورتة.

المدهش كمان بالنسبة لنا أنهم ما عندهمش غير صنف واحد صيامى وهو الباستا بالصوص الأحمر، علشان حتى السي فود بـ يعملوه بالزبدة.

"تشيلز" مناسب جدًا لو أنت رايح مع عدد كبير، أو لو عندكم عيد ميلاد، المكان دورين غير الجزء بتاع سطح المركب المفتوح علشان تقدر تستمتع بالهواء النقي وكمان تشوف لحظة الغروب.