لا شك أن سيتي ستارز من أكثر الأماكن اللي بـ تيجي على بالنا لما نحب نخرج أو نتسوق أو نغير جو، لأن ببساطة المكان هناك ضخم جدًا وفيه اختيارات كثير متاحة، ومن قبل شهر رمضان وإحنا دائمين بـ نعدي على مطعم «كاسبر أند جامبينيز – Casper & Gambini’s» ونقعد نبص عليه لأن ديكوره حلو أوي والقعدة بتاعته جذابة أنك تجربها، ولأنه معروف بجودته العالية في الخدمة والأكل على مستوى فروعه في كل العالم، فـ فكرنا نكتشف هما محضرين إيه لرمضان.

فيه مكانين تقعد فيهم هناك: منطقة واخدة ركن داخل المول وقعدتها شوية غالب عليها طابع الكافيه، ومنطقة ثانية في الهواء الطلق اسمها "Terrace" لأنها على رووف المول ومفتوحة وفيها كذا مكان للقعود.

"كاسبر أند جامبينيز" مش عاملين حاجة مخصوص لرمضان، بـ يقدموا نفس المنيو العادية لكن ممكن ينزل لك مع الطلب مشروب رمضاني، حجزنا بالتليفون قبل ما نروح، ولما وصلنا كان قبل الأفطار بشوية فـ رحنا أكدنا على الحجز وطلب منا الجرسونات أننا نختار المكان اللي حابين نقعد فيه فـ اختارنا أكيد منطقة التراس، عجبنا مكان جوه خالص بـ يبص على المطبخ اللي موجود في منتصف المكان وزجاجه شفاف بـ تقعد تتفرج على الطباخين وهما بـ يحضروا الأكل، فريق العمل هناك بـ يتميزوا بروح الفكاهة خاصة الرئيس بتاعهم.

تصميم منطقة التراس جامد جدًا وحديث ومعاصر والكنب مريح ماعدا فيه ركن كنب مستواه نفس مستوى الترابيزة فـ هيبقى صعب عليك شوية وأنت بـ تأكل، كل ده على شكل برجولات منفصلة وموزعة بشكل جميل، ده غير جزء ترابيزات مع كراسى بار عالية، المكان بـ يغلب عليه ألوان الأبيض، البني، والبيج مع خضار الزرع فـ بيعطي إحساس مريح للأعصاب جدًا مع الأنوار الخافتة، ده غير استمتاعك بالهواء اللي بـ يلطف بعد آذان المغرب.

المنيو متعبة شوية قعدنا فترة عقبال ما فهمناها وقررنا نأكل إيه، أخذنا شوربة مشروم (32 جنيه) لكن المفاجأة أنها كانت عبارة عن مشروم مضروب في الخلاط مع المرقة فـ خلى لون الشوربة غامق وغريب، طعمها كان مختلف لأنها مدججة بالمشروم لكن مقبولة، وأخذنا مشروب قمر الدين (16 جنيه) وعصير برتقال فريش (16 جنيه) والاثنين كان طعمهم حلو ماعدا البرتقال كان مزز شوية، ونزل لنا زجاجة مياه صغيرة (7 جنيه)، وطبق عيش مع تمر للأفطار.

للأطباق الرئيسية جربنا فراخ مشوية تحت الطوب أو القرميد (تشيكن أندر بريك) (69 جنيه) وكان طعمها حلو أوي، وطبق ثاني ستيك ريب أي (105 جنيه) وكان الستيك مستوي حلو أوي ومعاه خضار وبطاطس مهروسة.

في الآخر بعد ما استنينا شوية نهضم الأكل الجامد ده طلبنا التحلية وكانت مشروب كوكيز أند كريم (25 جنيه)، وكيك الشوكولات فوندان (28 جنيه) وكان روعة، الشوكولاته اللي داخل الكيك كانت سخنة ووهمية.

باختصار المكان ده حلو أوي لو حابب تأخذ حبيبتك خطيبتك أو زوجتك علشان تأكلوا فى مكان هادئ وشاعري تسمعوا فيه مزيكا هادئة جميلة وتستمتعوا بالمنظر حواليكم وبالهواء.