ميدان الباشا ميدان مشهور جدًا في شارع المنيل واللي اشتهر بحلواني «الدمياطي» اللي عنده تشكيلة كبيرة من التورت والجاتوهات والفطير اللي لازم تجيب منه وأنت مروح، وعلى الناصية الثانية الرصيف ما بـ يفضاش من الناس اللي جاية من كل حتة عاوزة تجيب عشاء أو غذاء لها من مطعم «العائلات».

مطعم «العائلات» له 4 فروع لكن إحنا رحنا للي في المنيل لأن مكانه متميز جدًا وكل ما نروح له الخدمة عمرها ما بـ تقل جودتها ولا جودة الأكل كمان.

"العائلات" مطعم بتاع كله.. فول وطعمية وباذنجان وبابا غنوج وشكشوكة تلاقي، نفسك في بطاطس بكافة أشكالها وأنواعها هـ تلاقي، مش عاوز سندوتشات وعاوز تأخذ الفول أو الطعمية أو غيرها في علب برضه هـ تلاقي، سندويتشات فراخ، سندويتشات لحوم، وجبات برضه موجود، قائمة أو منيو العائلات كبير جدًا وفيه أنواع وإفتكاسات من اللي قلبك يحبها، وكمان عنده سلاطات وسندويتشات أسماك ومحاشي وفتة ومكرونة فرن، أما بقى الحلو ففيه كريم كراميل، قرع عسل، أرز باللبن، أم علي، جيلي، بودنج.

المنيو مقسمة 14 قسم، وكل قسم فيه حوالي 15 صنف، ماعدا قسم "علب العائلات" فيها 34 طلب ممكن تختار منه، فـ تخيل بقى كم التنوع اللي موجود. والمكان مافيهوش منطقة للجلوس، لكن عندهم حتة رخام ممكن تسند عليها وأنت واقف وتأكل، يا إما تأكل في الشارع زي معظم الناس ما بـ تعمل.

كايرو360 من أكثر المترددين على المكان وجربنا أصناف كثيرة مختلفة كل مرة منها الشاورمة الفراخ واللحمة الجامدين، والبطاطس بالسلطة والكبدة الإسكندراني، والفاهيتا والسلطات اللي عنده كلها جامدة: خضار بالمايونيز، كول سلو، البابا غنوج وهمي، والمخللات، كل الأصناف طعمها حلو قوي، وأهم ما يميزه هو النظافة، السلطات رغم أنها مقفولة بغطاء لكن برضه بـ يلفها لك في ورق سوليفان شفاف وبرضه الساندويتشات اللي في عيش فرنساوي بـ تتلف في ورق فويل علشان تحتفظ بالحرارة بتاعتها.

الخدمة هناك سريعة ونظيفة والعاملين هناك متمكنين وخاصة في المنطقة بتاعة الفول والطعمية والبطاطس لأن فيه جيش جوه المحل في المطبخ شغال زي خلية النحل شايفهم أمام عينيك، اللحوم بـ تأخذ وقت شوية عن باقي الأصناف طبعًا لأن اللي واقف عليها واحد أو اثنين، لكن برضه مش بـ يأخروك قوي.

"العائلات" عندهم خدمة توصيل للطلبات 24 ساعة لأي مكان في القاهرة وزي ما قلنا لهم 4 فروع: المنيل، ميدان الإسماعيلية في مصر الجديدة، وشارع الحجاز برضه، وحلمية الزيتون.