محل رخام أخضر كبير اسمه مكتوب باللون الأحمر على الشارع الرئيسي بعد شارع العشريني في فيصل، مشهور جدًا في المنطقة هناك ومن الأسماء المعروفة للناس أكيلة ومحبي الكباب والكفتة، مطعم وكبابجي «الفقير» عبارة عن دورين فيهم أماكن للقعود فوق وتحت، مكان الشواء تحت على الشمال أول ما تدخل، وهناك بـ يستقبلك كبير الجرسونات ويسألك أنت محتاج إيه، إلا أننا ما جاتش لنا فرصة نقعد نأكل في المحل فـ طلبنا خدمة التوصيل.

التوقيت اللي استغرقه الطلب كان أقل من نصف ساعة، التوقيت كان غريب على الرغم من أننا كنا قريبين منهم لكن طالبين طلبات كثيرة، ومن المعروف أن الشواء بـ يأخذ وقت، عامة كان انطباع مدهش في البداية.

طلبنا كيلو كباب وكفتة (96 جنيه)، وحمام محشي "زوج" (44 جنيه) وبـ تطلب أنت عاوزه محشي فريك ولا أرز فـ اختارنا واحد بالأرز والثاني بالفريك، ولما بـ تطلب حمام بـ يجي لك معاه مجانًا شوربة حمام، وكمان أخذنا ورق عنب (5 جنيه)، وبطاطس محمرة (3 جنيه)، بـ ييجي مع الطلب أرغفة عيش كثيرة، وبـ ينزل لك مع الطلب أنواع سلاطة مختلفة على الرغم من أن الراجل لما كلمناه ما فهمناش في الأول أنها بـ تيجي عادي مع الطلب، وكان بـ يقول أننا نختار أي نوع سلطة من زبادي بالخيار وخضراء وطحينة وبابا غنوج وطماطم مخللة وخيار مخلل ومخللات مشكلة (الواحدة بـ 1 جنيه)، لكن بعدين قال لنا هو هـ يجيب لنا تشكيلة من الموجود عنده.

شكل الأكل كان حلو جدًا وشهي، لكن المفاجأة المخيبة للأمل مع كل قضمة لصنف مختلف من اللي طلبناه كان أن الأكل ناقص تسوية، كل حاجة: الكباب كان ناشف شوية استعجلوا عليه فى التسوية، الكفتة كانت أكثر حاجة كويسة فيهم، الحمام كان مافيهوش لحم يذكر وحجمه صغير وكمية الحشو كانت أكبر منه (يمكن علشان كده كانوا عاملين الطلب في المنيو بالزوج)، كمان الأرز والفريك كانوا جيدين لكن برضه تبقى مشكلة التسوية، شوربة الحمام كان طعمها شوربة عادية مافيهاش أى طعم للحمام، السلطة الخضراء ما كانتش فريش ولا الطماطم ولا الخيار، وورق العنب اللي كنا حاطين أمل عليه ينسينا كل المشاكل دي طلع هو كمان ناقص تسوية وكمية اللف في الصباع الواحد كثير والحشو قليل فكان ثقيل ومافيهوش المزازة الحلوة المشهور بها ورق العنب، كمان البطاطس المحمرة كانت طرية ومزيتة!

المنيو فيه أصناف ثانية كثيرة زي: النيفة (الكيلو بـ 96 جنيه)، والريش (الكيلو بـ 120 جنيه)، ممبار باللحم المفروم (الكيلو بـ 84 جنيه)، طلب البوفتيك (35 جنيه)، فتة بالموزة (38 جنيه)، مكرونة فرن (5 جنيه)، والأسباجيتي (8 جنيه)، وبالنسبة للشوربات فيه شوربة خضار (3 جنيه)، وشوربة فراخ مع لسان العصفور (نفس السعر)، أما شوربة فراخ بالكريمة (6 جنيه)، وغيرها أصناف كثيرة.

تجربتنا مع الأكل هناك كانت سيئة للأسف، نتمنى أن غيرنا تكون تجربته مختلفة، وإلا ما كانش اشتهر أنه من أشهر الأماكن اللي بـ تعمل كباب وكفتة، نتمنى!