سلسلة مطاعم «بابا جونز – Papa John’s» منتشرة في كل حتة: سيتي ستارز، والمعادي، والمهندسين، وفي مدينة الرحاب، ومساكن شيراتون، وضمن التغييرات الكثيرة اللي بـ تحصل في شارع الهرم من افتتاح محلات ومولات ومطاعم لقينا فرع جديد لبيتزا بابا جونز قريب من مبنى "داري" للديكور على شارع الهرم الرئيسي.

لأن الشارع دائمًا زحمة والمحل واخد مساحة في مكان صغير مش هـ نعرف نركن وننزل نقعد هناك، دخلنا وأخذنا منهم المنيو وقررنا أننا نطلب الأكل ديلفري، منيو التوصيل مختلفة شوية عن منيو المطعم مش هـ تلاقي فيها أكلات زي قسم المعجنات (المكرونات) والحلو، لكن تقدر وأنت في البيت تجيب المنيو كاملة من على موقعهم على الإنترنت. عامة المكان جيد وشكله زي أي مطعم بـ يقدم بيتزا ببار السلطات اللي بـ يبقى موجود في منتصف المكان وبـ يغلب عليه اللونين الأحمر والأخضر.

عملنا طلب التوصيل لكن تأخر شوية واتصلوا بنا بعدها بشوية اعتذروا لنا على التأخير علشان كان فيه لخبطة في الـ System، ودي حاجة ذوق منهم وبـ يأكد اللى مكتوب على الموقع بتاعهم أنهم حائزين على جائزة خدمة العملاء لعشر سنوات متتالية، يعني حريصين أنهم ما يخسروش عملاء لهم.

الأكل ما وصلش سخن قوي لكن كان مقبول على الرغم أننا كنا قريبين قوي من الفرع، بدأنا بطبق مقبلات عندهم اسمه بابا سامبلر بلاتر (27.50 جنيه) عبارة عن 3 أنواع من المقبلات: أجنحة الدجاج، قطع الدجاج المقرمشة، 100 جرام بطاطس ويدجز، كانت كميتها مقبولة لكن الطعم كان عادي وقطع الدجاج المقرمشة ما كانتش اسم على مسمى بالعكس كانت طرية وبـ ييجي معاها نوعين صوص اختارنا الباربكيو البيتزا، الأول كان عادي والبيتزا ما كناش عارفين هو اسمه كده ليه لأن الطعم مش بـ يقول حاجة، البطاطس الويدجز كانت حلوة، والأجنحة كانت عظم أكثر ما منها لحم.

طلبنا نوعين بيتزا: بيتزا بالجمبري حجم متوسط (45.25 جنيه)، وبيتزا تشيكن بابا حجم كبير (52.50 جنيه)، زي ما قلنا الأكل ما وصلش سخن قوي لكن الجبنة كانت لسه سايحة وطرية والرائحة كانت شهية، طعم البيتزا عامة جيد ومخدومة حلو خاصة أنها جاءت لنا ستافت كراست (محشوة جبنة على الأطراف) اللي كانت بدأت تبرد وتتجمد شوية.

كمان طلبنا طبق سلطة مشكل (18 جنيه) من بار السلطات وهي حجم واحد وجاءت لنا مكونة من: بنجر، بطاطس، صوص هاني مسطرد، كرنب بالجزر والبسلة، مكرونة حلزونى بالفلفل، وبطاطس مكعبات، كله كان طعمه جامد ماعدا البطاطس المكعبات كانت ناقصة تسوية وكانت جامدة شوية.

أما في التحلية جربنا من عندهم بانانا سيناباي (أو فطيرة قرفة بالموز) (14 جنيه) وكانت لذيذة جدًا لكن سكرها كان كثير شوية خاصة أنه مرشوش عليه كمان من فوق. لكم كانت ختام جيد للوجبة بتاعتنا.

«بيتزا بابا جونز» من الاختيارات اللي ممكن تستعين بها في طريقك للبيت خاصة لو عاوز حاجة سريعة تسد جوعك وطعمها جيد وتكفي مجموعة كبيرة لو أصحابك كمان معاك.