أفضل المطاعم في كايرو عام 2011 - مطاعم Feature - كايرو 360
 







أفضل المطاعم في كايرو عام 2011
أفضل المطاعم في كايرو عام 2011
اصدرت في: 29/12/2011

كمان كام يوم هـ نودع عام 2011، كايرو 360 هـ تبدأ في العام الجديد 2012 مغامرات جديدة وتجارب مختلفة في كل أنحاء كايرو، ولأننا لفينا كثير وكتاباتنا كانت بناء على تجاربنا الشخصية لقينا أنه مناسب أننا نودع معاكم عام 2011 بتكريم "بعض" أفضل المطاعم اللي رحناها خلال العام.

نتمنى لهم أنهم يفضلوا على نفس المستوى ويكونوا مثال يحتذى به للمطاعم الثانية، لأن التنافسية عالية في مدينة زي القاهرة ولأن الأفضل و"الأشطر" هو اللي يقدر يحتفظ بمستواه على القائمة مش أنه يحقق ده لمرة واحدة في عالم المطاعم. وفي الآخر الذواقة في كايرو لهم الكلمة الأخيرة وهم المؤشر الحقيقي لاستمرار مطاعم واختفاء غيرها.

 

دوميرا

لو لك في الأكل السوري والخليجي لازم ييجي على بالك كأول اختيار، موجود في ميدان الحجاز بمصر الجديدة، هـ تقضي فيه وقت جميل وديكوره وموقعه متميز، ده غير أنه بـ يعمل أحسن فتة شاورما ممكن تأكلها في مصر، مكونات طازجة في كل حاجة والكمية مشبعة جدًا لفرد واحد.

تقريبًا بـ يعمل كل حاجة، تخصصه الدقيق هو الأكل السوري زي ما مكتوب على الواجهة، لكن بـ يعمل برضه أكل خليجي روعة وبيتزا إيطالي ومعجنات وساندويتشات وسي فوود.

 

موري سوشي & جريل

مطاعم السوشي انتشرت انتشار ضخم في مصر، وبقى لها ذواقة في كل مكان لدرجة أن بقى بين المطاعم دي تنافس شديد جدًا، لكن "موري سوشي & جريل" واحد من أقدم مطاعم السوشي في القاهرة وأشهرهم وله فروع كثيرة في المدينة ومنافذ صغيرة في كذا مكان.

أهم ما بـ يميزه هو المزج ما بين السوشي الرائع والستيك اللذيذ، وده اللي لقيناه لما رحنا الفرع اللي في المهندسين، إلى جانب المنظر الجميل اللي بـ تشوفه للشارع لو قعدت في مكان قرب الشباك، والعاملين –بلبسهم الياباني المميز- ودودين وبـ يساعدوك في اختياراتك. العيب الوحيد هناك أن الأكل بثمنه بس بـ تأخذ مقابل قيمة الفلوس سوشي فريش، لحمة لذيذة وسلاطة طعمها رائع.

جافا لافا

على الرغم أن مر 4 شهور فقط على افتتاحه لكن إحنا بـ نحب جدًا اليوم اللي عيننا وقعت عليه وإحنا بـ نزور مطعم ثاني في المهندسين وقررنا نجربه، موجود في نفس مكان مطعم "ستيك أوت" القديم، المكان مبهج جدًا بألوانه وديكوراته وأسعاره جيدة جدًا وجودة الأكل فوق الممتازة، من الآخر "متكامل" كديكور وخدمة وإدارة وأكل وجو عام ونظافة وذوق فى التعامل واحترافية فى الخدمة.

باختصار كل الأطباق ما تتخيرش عن بعض في كفاءة الطهي أو التقديم، أكل أو شرب أو حتى تحلية، بجد مكان ما يتفوتش.

 

التوز بيسترو

مكان بعيد عن الزحمة في طريق مصر إسكندرية الصحراوي وأمام مدينة سيتي فيو هـ تلاقيه في سيزونز كانتري كلوب، النادي على بُعد 20 دقيقة بالعربية من الهرم ومفتوح لغير الأعضاء، ورغم أن أسعاره غالية لكن مطعم لازم كل الناس تجربه. 

المنيو متنوع جدًا فيه كل أنواع الأطباق العالمية، فيه تشكيلة كبيرة من أطباق السي فوود وكمان المقبلات، جودة في الأكل وكمان خدمة رائعة وديكور جميل وجو نادي سيزونز كانتري كلوب كافي أنك تزوره.

 

آشاز:

كايرو مافيهاش مطاعم بـ تقدم أكل هندي كثير، واللى موجود غالبًا بـ يكون في فندق، لكن المطعم ده لأول مرة نلاقيه منفصل عن وجوده التقليدي في الفنادق ولكنه متصل في نفس الوقت لأنه في مبنى واحد مع مطعم «شوب شوب – Chop Chop» اللي بـ يقدم أكل صيني في الجيزة بالقرب من السفارة السعودية الجديدة.

اسم المحل على اسم المطربة الهندية (آشا بوهسل) وكل الأكلات في المطعم عبارة عن الوصفات الخاصة بالنجمة الهندية الشهيرة. تصميم المحل استثنائي والأكل ما يتخيرش عنه.

 

ميلانج:

ساعات لما تروح أماكن كثير للأكل أو الاستجمام وتشوف أشكال وألوان بـ تلاقي نفسك في الآخر بـ ترجع ثاني تروح المكان ده لأنك بـ تفتقده ولأنه بالنسبة لك بـ يمثل "المثالية"، ده نفس الإحساس اللى بـ نحسه مع «ميلانج»، خاصة لما نروح مكان ويقدموا لنا طبق مخبوزات مع قطع الزبدة كفواتح شهية تلاقى لسان حالك بـ يقول: "ولا ييجي حاجة جنب طبق مخبوزات ميلانج". وزي ما قلنا في المقال النقدي اللى كتبناه عنه قبل كده أن المطعم ممكن يوصل معاك إلى حد "الإدمان".

ميلانج موجود في الشيخ زايد في مكان متميز جدًا قريب من البوابة 2 للمدينة و لهم فرع ثاني فى داندي مول عند مدخل السينما.

 

سكوير

الميزة الحقيقية في أكل «سكوير» واللي مش موجودة في مطابخ كثير أن الأكل خفيف جدًا ومافيهوش أي دهون، وهـ تخلص وجبتك الكاملة وهـ تشبع وهـ تفضل حاسس أنك خفيف وقادر تتحرك مش عاوز تنام زي ما بـ تخلص أكل أي وجبة دسمة، ده غير التنويم المغناطيسي اللي هـ يحصل لك من الإضاءة الهادئة للمكان مع المزيكا، إلى جانب أن ديكوره هائل.

"سكوير" موجود في شارع الحجاز قبل مستشفى هليوبوليس على نفس الصف.

 

البرج

زي ما قلنا قبل كده شهرته مش بس في شيفاته الأساتذة والسمك الطازج اللي بـ يقدمه ولا في القعدة الحلوة، إنما في ضخامة مبنى المطعم المكون من 3 أدوار والمكان الاستراتيجي في مدينة نصر.

مطعم أسماك «البرج» أشهر من نار على علم، أي حد له في السي فوود أو مالوش لازم يكون عدى عليه الاسم. إلى جانب أنه بقى بـ يقدم مشويات ولحوم كمان وعمل منيو للعصائر والمشروبات المبتكرة.

مكان ما تترددش تروحه.. وابقى احكى لنا عن تجربتك مع البجع الحي اللي هناك في مدخل المطعم وعمال يجري ويلعب ويتصور مع الزوار.

 

أكل بيتي

المرة دي مش هـ نتكلم على مكان تروح وتقعد فيه ونكلمك على ديكوره أو موقعه المتميز، على الرغم من أنه في المعادي الجديدة لكن هو خدمة توصيل فقط.. أيوه، أكل بيتى –من اسمه- بـ يحضر لك أفضل المأكولات من المطبخ المصري، قائمة الطعام بتاعتهم موجودة على موقعهم وكل منطقة لها توقيت توصيل وتكلفة توصيل مختلفة.

المنيو فيها أصناف كثيرة جدًا، الخدمة ممتازة وفريق العمل مهذب وشاطر، الأسعار كويسة جدًا والكميات كمان جيدة جدًا، التغليف والنظافة لا يعلى عليها، خاصة أن نادرًا ما ممكن تلاقي حد ممكن يجيب لك أكلك سخن مولع خصوصًا لو قادم من مكان بعيد،

"أكل بيتي" اختيار مناسب لو عندك عزومة وكل واحد له مزاج مختلف في الأكل علشان ترضى جميع الأذواق وتأكلوا أكل صحي ونظيف. وهو حل مثالي للبعد عن الأكلات السريعة غير المفيدة صحيًا. ده غير أن عندهم خدمة تجهيز أكل العزومات والمناسبات.

 

بيسترو زيتونة اللبنانى:

على الرغم أنه ما عداش شهر على افتتاحه في نايل سيتى مول لكن "بيسترو زيتونة اللبناني" قدر يجذب الناس له، مبتكرين وبـ يعملوا حاجة مختلفة من غير ما يخرجوا من الإطار العام للمطبخ اللبناني المحبوب. قدر يجمع بين خصائص المطاعم الراقية الغالية الشيك قوي وخصائص المطاعم البسيطة والمأكولات السريعة اللي بـ تحس فيها براحة أكثر. ده غير أن بعض المكونات في الأكل مستوردة رأسًا من لبنان علشان يأكدوا على توصيل روح لبنان لحد الطبق اللي بـ تأكل منه.

 

كبدة البرنس

يوم ما رحناه كان في شهر رمضان، لكن عامة البرنس مش محتاج دعاية ومافيش اثنين بـ يختلفوا عليه، لو رحته في أي وقت مستواه في الطبخ ما بـ يتهزش فتفوتة.

مطعم البرنس بـ يخلينا نسيب نوعية المطاعم الراقية الموجودة في الفنادق الراقية ونتكلم بشكل محدد عن الأكل في المطاعم البلدي الشعبي اللي من زحمتها ممكن تلاقي نفسك قاعد تأكل في الشارع عادي وسط العربيات والبائعين وعلى الرغم من كده تكون مبسوط لأن كمان أسعاره حنينة.

عنده تشكيلة أكلات شرقية وبيتي بطعم يجنن، عندك أصناف كبدة كثيرة منها الكندوز والجملي أو ممكن تطلب رغيف كبدة ولو حابب تطلبها جريل، لحمة محمرة، سجق محمر، لحمة جريل بأحجام مختلفة، ده غير المقبلات والسلطات، طواجن الخضار والمكرونة، والموزة والسجق والشوربات من كوارع للسان عصفور والفتة وأخيرًا وليس أخرًا الحواوشي.

"البرنس" على الرغم من بساطته إلا أنه مطعم "المشاهير"، لو جاءت لك فرصة تأكل في المطعم جوه هـ تلاقي صور "ناصر" مع الفنانين ولاعبي الكرة مغرقة المكان.

 

ميركاتو إيطاليانو

زيارة واحدة للمطعم ده -الموجود في سيتي ستارز ومول العرب- هـ تفتكر أكلة عندهم وهـ تفضل معلقة في مخك وطعمها في فمك.. هي "السترومبولي"، أكل مش طبيعي وطازج ومكوناته وشكله مختلف لدرجة أنك لما تبص على الكاونتر الزجاجي اللي فيه الأكل هـ تبقى عاوز تأخذ كل الأكل اللي عندهم، ألوانه وشكله تفتح النفس.

مطعم أكل إيطالي يعنى بيتزا وباستا، ولازانيا وكالزوني وكانيلوني، ده غير الخضار السوتيه اللي بـ تحاسب عليه بالجرام، الشيء الوحيد السيء هنا هو أن المكانين في منطقة الطعام في المولين فما بـ تعرفش تستمتع وسط الزحمة والزيطة.

"ميركاتو إيطاليانو" له فروع كمان في مدينة الرحاب والجامعة الأمريكية في التجمع الخامس وسان ستيفانو في الإسكندرية.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
إنجي البطراوي
حرر بواسطة:
إنجي البطراوي
تاريخ النشر:
29/12/2011
مدير تحرير موقع كايرو 360 العربي. نشيطة جدًا بـ تحب الشغل، وبـ تهتم بالتفاصيل، دائمًا بـ تضيف روح إيجابية للفريق ومش بـ تفوت فرصة أنها تضحك اللى حولها! بـ تصرف نصف مرتبها على عصير البرتقال والآيس كريم!