المكان ده له مَعَزة خاصة عندنا لأنه المكان اللى دائمًا بـ نجيب منه أكل وإحنا قاعدين في مكتب كايرو360 بـ نكتب لكم مواضيع كل يوم، لدرجة أننا بـ نفكر يعملوا لنا "أبونيه" من كثر ما إحنا مش سايبينهم في حالهم، نقعد نلف وندور وفي الآخر نستقر أننا نأكل «لا سيرا – LaSera».

موجود في الشارع اللى قبل «المركز الثقافي البريطاني – British Council» وأنت قادم من ميدان سفنكس بعد مسرح البالون، هـ تلاقيه على أيدك الشمال بيافطة حمراء كبيرة ومكتوب عليها بالأصفر "LaSera".

المكان ده على الرغم من صغر مساحته ما تصدقش أن كل تشكيلة الأصناف دي موجودة فيه: مكرونات، مناقيش، مقبلات، ساندويتشات (بالعيش البوري والسوري والفرنساوي)، بيتزا، فطير مشلتت، وفطير حادق وحلو، وسمبوسك، ومشروبات كمان.

المحل مشهور باللون الأحمر وأنت واقف فى الواجهة هـ تلاقى على شمالك الكاشير وعلى يمينك رخامة كبيرة وجنبها فرن كبير وأطباق فيها خضار ومكونات مقطعة صغير علشان يستخدموها على طول، وفيه طرقة صغيرة بـ توصل إلى 3 ترابيزات وكام كرسي علشان لو عاوز تقعد تأكل، لكن القعدة دي بـ نحسها "للرجال فقط" والأفضل للبنات أنها تطلب خدمة التوصيل أو تأخذ أكلها تيك أواي أفضل لأن القعدة رجالى شوية.   

"لاسيرا" له فرع ثاني في شارع العريش فى الهرم، في فرع العجوزة -اللي رحناه مرة وطلبنا منه مائة مرة ديلفري- كل حاجة فيه ما تتخيرش عن الثانية فى الطعامة وحرفية الصنع، بصراحة مش عارفين نبدأ نتكلم عن أي صنف فيهم، أولاً قسم البيتزا كل أنواعها رائعة وعددهم 30 نوع بأحجام صغيرة ووسط وكبير، والمفاجأة أنهم عاملين حاجة اسمها "بيتزا لاسيرا.. 3 بيتزا فى بيتزا واحدة" (عبارة عن 1/3 مشكل لحوم، 1/3 مشكل أسماك فلفل، طماطم، زيتون، ثلث مشكل جبنة، جبنة موتزاريلا) (24 جنيه للصغيرة، و34 جنيه للوسط و48 للكبيرة)، وعامة أسعار البيتزا بـ تبدأ من 11 جنيه للصغيرة و17.50 للوسط و27 للكبيرة.

في قسم الساندويتشات (لحوم وفراخ) أكثر حاجة مشهورة هناك برضه بـ تحمل اسم المحل وهي "التشيكن لاسيرا" (12 أو 13 جنيه حسب نوع العيش)، وهمية وأكثر حاجة مدمنينها، لكن أكثر حاجة ممكن تضايقك من الساندويتشات لو أخذتها فى عيش بوري أو سوري أنها بـ تكون مزيتة والعيش بـ يكون خفيف فالدنيا بـ تبقى زروطة شوية، لكن الطعم الرائع بتاعها بـ يعوضنا عن ده، أسعار الساندويتشات برضه كويسة على قد الجيب بـ تختلف على حسب نوع العيش مش الحجم.     

في قسم الفطائر: أكثر من 25 نوع فطير حادق وأكثر من 20 نوع حلو، الحادق فيه أصناف منها أنواع جبن مختلفة والسجق البلدي والخضروات والديك الرومي والمشروم والفراخ والسي فوود واللبنة والزعتر والأنشوجة.. إلخ. والحلو منه بالبلح والبغاشة والكاسترد والمربى والتفاح ومشكل فواكة، وغيرها، الأحجام هنا وسط وكبير فقط والأسعار بـ تبدأ من 11 جنيه للخضروات لحد 30.50 جنيه للسي فوود حجم وسط. وللفطير الحلو بـ تبدأ من 5 جنيه للوسط و10 للكبير، المفاجأة الفظيعة بقى عندهم "أم على" (8.50 للوسط و15 جنيه للكبيرة) منها السادة ومنها اللى بالمكسرات وجوز الهند، ومش بس مكسرات لأ ده كمان بـ يحطوا لك قطع أناناس ومشمش وكريز وقشطة وعسل على الوش علشان تكمل النكهة المميزة والجامدة جدًا لها، كمية سكر كثيرة لكن هـ تستمتع بها جدًا.

السمبوسك (القطعة الواحدة بـ 3 أو 3.50 جنيه على حسب الحشو) أما لو طلبتها طبق مشكل (جبنة ولحمة وفراخ وسبانخ وخضار) بـ 13 جنيه، وعندهم كمان فطير مشلتت (سادة بـ 17 جنيه للوسط وبالعسل والقشطة بـ 24 جنيه للوسط)، كمان ممكن تضيف اللى تحبه زيادة على طلبك من: جبنة، لحوم، أسماك، بيض، مخلل، مشروم، فراخ، خضار، زيتون، عيش بوري أو سوري، تشيز برجر بـ تتراوح بين 3 إلى 12 جنيه.

تعبت من كثر التفاصيل؟.. خد عندك دي كمان.. المكرونات مافيش زيها فى مكان ثاني، المكونات طازجة وبـ تلاقى الفراخ أو اللحم المفروم فيها محطوط بـ "ذمة" وبـ تبدأ من 7 جنيه لحد 27 للمكرونة بالسي فوود، التغليف كمان حاجة نشهد لهم بها.

السلاطات أو المقبلات عبارة عن سلاطات ثومية وطحينة وكول سلو وخضراء وباذنجان وخيار مخلل (من 3 إلى 4.50 جنيه)، والمناقيش أغلبها بالزعتر مع مكون ثانى معاه (من 5 إلى 8 جنيه).  

مافيش حاجة هـ تخطر على بالك إلا وهـ تلاقيها فى "لاسيرا".. بـ نحس أننا علي بابا لما كان فى المغارة بـ يقول "ذهب، ياقوت، مرجان، أحمدك يا رب"، ده غير أن الأكل بـ ييجي لك سخن وغنى بالمكونات اللى محطوطة بكرم زيادة تخليك هـ تفرقع من كثر الشبع، أى نعم الموضوع كثير ودسم زي المكان، لكن التفاصيل تستحق أن تُذكر.