الفرع ده كان لازم يبقى موجود من 5 سنين فاتت على الأقل، فتح فترة في الدور الأول في المول وبعد كده قفل. مش عارفين إزاي «سبكترا» انتظر كل المدة دي قبل ما يكون له فرع كبير داخل سيتي ستارز. الحقيقة «سبكترا» من المطاعم المفضلة جدًا لفريق عمل كايرو 360 كله، وكل يوم والثاني ممكن نطلب منه في المكتب ولو مش جعانين قوي ممكن نطلب شوربة وسلاطة في السريع. ومن حوالي 6 شهور زرنا أحدث فرع للمطعم وقتها وكان في شارع الهرم وكانت تجربة جميلة وما عابهاش شيء إلا مساحة المحل اللي كانت صغيرة جدًا، لكن المرة دي وفي الفرع الأحدث الموجود في سيتي ستارز في الدور الأخير من المرحلة الأولى؛ المساحة معقولة جدًا، وفيه جزء خارجي للجلوس، لكن ما عجباش لأنك هـ تحس أنك قاعد في وسط المول والزحمة والناس اللي رايحة جاية. إنما داخل المطعم الإحساس مختلف والمكان أنيق جدًا كعادة كل فروع المطعم. وفيه قعدات مختلفة تناسب أي عدد وأي نوع من الزبائن، وإن كان الغالب على المحل قعدات الـ American Diner أو الكنبات المواجهة لبعض.

الديكور في الداخل باللون البني الغامق وتابلوهات وجداريات ضخمة على كل الحوائط، إضاءات خافتة كلاسيكية عبارة عن نجف بلمبات على شكل شموع. طابع قوطي أو Gothic زي ما بـ يتقال عليه لكن عجبنا جدًا.

المنيو شكله حلو وكل الأكلات والمشروبات مصورة لكن للأسف مافيش وصف دقيق لمكونات الأطباق. كتيب فيه أكثر من 20 صفحة للأطباق الرئيسية وواحد زيه للمشهيات وواحد ثالث للحلويات، الموضوع كبير في «سبكترا». المطبخ هنا عالمي؛ صحيح هـ تلاقي أكلات إيطالية أكثر من أي حاجة ثانية لكن فيه أطباق مكسيكية وفرنسية وبرجر أمريكي وأسماك وكلوب ساندويتش. الحقيقة بتجاربنا المتكررة مع «سبكترا» بـ نؤكد لكم أن مافيش حاجة ممكن تطلبها من هناك وتطلع وحشة، كل المذاقات والإضافات خطيرة ومميزة والكميات مشبعة جدًا. هـ تحس هنا أنك بـ تأكل بجد، مش جاي تنأنأ بالشوكة والسكينة وتقعد قعدة رومانتيكية وخلاص، وإن كان ده سبب ممكن تروح «سبكترا» علشانه برضه.

طلبنا جامبو كومبو المشهيات (48 جنيه) وده بـ يبقى كميته كبيرة تكفي 4 أشخاص، فيه قطع دجاج كرسبي وأصابع موتزاريلا وحلقات بصل وسبرنج رولز وصوصات المسطردة الحلوة والمايونيز وجبن الريكفورد. الطبق ده عاوز مقال لواحده. من الأطباق الرئيسية جربنا فيليه اللحم البقري مع صوص الجمبري (75 جنيه) وده بـ ينزل مع اختيارك من صنفين من الأرز أو البطاطس البيوريه أو المحمرة أو بـ ينزل مع باستا من أي نوع. جربناه مع باستا (بنا) بالصوص الأبيض الغني بالطعم والأعشاب، والفيليه نفسه ولا أروع من كده ومغطى بوحدات الجمبري المقشور بصوص الكريمة. هـ تحس بكل إضافة وكل نوع توابل موجود في الطبق، وده اللي بـ يميز المطبخ هنا. ثاني طبق رئيسي كان سبكترا فاهيتا وده سعره 80 جنيه. بـ ينزل قبله طبق الإضافات الخاصة بالفاهيتا زي الكريمة الدلعة Sour Cream والجبن المبشور والطماطم وعيش التورتيا، وبعد كده بـ ينزل أمامك قطع اللحم والدجاج والجمبري الكبير مخلوطة بالبصل والفلفل والطماطم وهي لسه بـ تطشطش في الطبق علشان تبدأ تعمل ساندويتشات أو (بوريتو مكسيكي) لأن طبقك هـ يبقى فيه أرز أصفر، واستمتع بأكلة مكسيكسة ما حصلتش في أي مطعم مكسيكي.

فيه أكلات للدايت زي المكرونة البني والأسماك المدخنة وأنواع مختلفة من الستيك والجمبري. ممكن تطلب كومبو فيه أطباق رئيسية ومقبلات وشوربة وطبق حلو يكفي لشخصين أو 3 أشخاص بأسعار من 150 لـ 250 جنيه، وهي فكرة موفرة إلى حد ما. في التحلية طلبنا أوريو مادنس بالفواكة (25 جنيه) وكان طعمه خرافي ويكفي 4 أشخاص بعد أكلة جامدة في «سبكترا»، مكوناته صوص شوكولاتة وأوريو وكريمة وقطع تفاح وعنب وكيوي، أحلى حاجة تطلبها بعد فيليه اللحم والجمبري في المطعم ده.

الخدمة أكثر من ممتازة، رغم أن الافتتاح كان قريب جدًا، والمكان فعلًا مريح نفسيًا وهـ تحب القعدة فيه قبل ما هـ تحب الأكل. يمكن ما عجبناش بس أن مافيش حمام خاص بالمحل زي كل مطاعم سيتي ستارز. تحياتنا لـ «سبكترا» ومبروك الفرع الجديد.