"شيروودز" من زمان اسم معروف لكل محبى الستيك فى القاهرة. البداية كانت بفرع واحد فى شارع جامعة الدول العربية فى المهندسين، لكن أخيرًا «شيروودز» بدأ ينتشر فى المدينة.

الفرع الجديد فى أركان مول اللى لسه فاتح جايب لنا علامة "شيروودز" المميزة لحد أطراف المدينة. محافظ على بساطته ورُقيه ومجموعة الاختيارات المتخصصة المنتقاه، وكده فرع شيروودز الجديد زود أماكن الخروج المتاحة لسكان الشيخ زايد.

هانى كبير الجرسونات على مدار الخمس سنين اللي فاتوا على الأقل موجود فى فرع الشيخ زايد علشان يزود إحساسك بالألفة فى المكان. المنيو تقريبًا نفس بتاعة المهندسين، مع إضافات بسيطة زى الفراخ المشوية والشيش طاووك، الاثنين سعرهم75 جنيه. ستيك ريب أى الاسترالى بـ يُقدم بـ 190 جنيه. الفرق فى الأسعار بسيط جدًا، مع إضافة من 5: 10 جنيه على كل طبق.

المكان من الداخل واسع وغرقان في اللون الأبيض على طريقة شيروودز المعتادة، رغم كده افتقدنا الشكل الجمالى اللى بـ تضيفه تشكيلات الزجاجات مع قطع الديكورات النحاسية الموجودة فى فرع المهندسين. قالوا لنا أنها هـ توصل قريب، لأن المطعم لسه بـ يستقر فى مكانه الجديد. ممكن تجرب القعدة بالخارج لو بـ تحب تتعشى فى الهواء المنعش، بس اعمل حسابك تجيب مبيد حشرات معاك.

المكان فيه بار، وكالعادة أول ما وصلنا قدموا لنا سلاطة خضراء وخبز طازج. قررنا نجرب أطباقهم الجديدة، وعلشان كده طلبنا نصف فرخة مشوية بـ تُقدم مع بطاطس مهروسة وخضروات مشوية (75 جنيه). ولأننا متعودين على مستوى معين من شيروودز ما انبهرناش قوي بالطبق، الفراخ كانت صغيرة ومالهاش طعم قوي.

على الناحية الثانية، جربنا شريحة لحم شاتوبريان chateaubriand اللى بـ تُقدم مع بطاطس مهروسة وخضروات، كانت لذيذة وقطعة الستيك كانت كبيرة وبـ تذوب فى الفم (115 جنيه/نصف كمية، 215 جنيه/ لضعف الكمية).

رغم أن التجربة كانت ممتعة، لكن محتاجين يوصلوا لمستوى فرع المهندسين.