مطعم «آدامز دونر & جريل» موجود في شارع المماليك المتفرع من شارع الميرغني في مصر الجديدة، أمام بوابة نادي هليوبوليس، ولو الوصفة دي مش واضحة ممكن نفكر الناس بأنه فتح مكان مطعم سوري اسمه "مشوار" كان مشهور جدًا بين أهالي مصر الجديدة بالفلافل السوري والحمص والبطاطس. «آدامز» المنيو بتاعه مش مختلف كثير عن "مشوار" اللي كان موجود قبله، لأن فيه مقبلات شامية زي الفتوش والتبولة والثومية والحمص وفيه سمبوسك بالجبن الشيدر والبيف والزعتر، وعدد من الساندويتشات والأطباق السورية واللبنانية لكن مش بـ تبقى متاحة في منيو السحور.

المحل حجمه صغير ومافيش مكان للقعود بالداخل، لكن فيه بعض كراسي وترابيزات أمام المحل، وأغلب اللي بـ ييجي بـ يأخذ أكل تيك آواي ويقعد يأكل في العربية أو بـ يقف يأكل أمام المحل. كل ما الوقت بـ يتأخر وبـ يقترب من آذان الفجر كل ما المكان بـ يزدحم أكثر ولأن الجو شبابي جدًا عند «آدامز» هـ تلاقي تجمعات كثيرة وكله عاوز يلحق يعمل الطلب بتاعه قبل الفجر بوقت كافي.

الإقبال الجامد على المحل مش من فراغ، لأن المطعم بـ يعمل ساندويتشات مبتكرة بجانب أطباق السحور التقليدية اللي هي الفول بالزبدة وزيت الزيتون والكريمة وبالسلاطة بأسعار من 5 لـ 8 جنيه للطبق، والفلافل (3 قطع بـ 5 جنيه) والأومليت بالبسطرمة والمشروم والهوت دوج والأومليت الأسباني وبالجبنة بأسعار من 10 لـ 15 جنيه. ولبنة وجبنة بالزعتر (14 جنيه). أي طلب من هنا ممكن تأخذه في ساندويتش من العيش السوري الملفوف أو ممكن تأخذه طبق ومعاه نفس العيش للغموس، ماعدا الفول بـ يُقدم في أطباق بس مش في ساندويتشات.

بعدنا عن منيو السحور عادي في زيارتنا المرة دي وجربنا بعض اختراعات «آدامز» زي ساندويتش السجق المشوي بالخلطة الخاصة والطماطم (21 جنيه) وعلى قد ما كان لذيذ وطعم اللحم فيه فريش لكن حجم الساندويتش كان صغير ومش مشبع بالنسبة لسعره، هو صحيح المطعم عامل لنفسه ستايل معين وفيه شياكة في تقديم الأكل ومستوى الخدمة كأنه كافيه إيطالي مش مجرد محل أكلات سريعة، لكن في النهاية الجمهور بـ يتعامل معاه على أنه مكان للساندويتشات في السريع ومش هـ تفرق معاه كثير موضوع الخدمة "السياحية" ده. جربنا كمان من منيو المشهيات سيخ خشبي كده عليه قطع دجاج متبلة بالكاري وصوص ما قدرناش نعرف إيه هو، اسمه في المنيو "سكيور" أو Skewer بمعنى سيخ، السيخ ده بـ 7.50 جنيه وفيه 3 قطع دجاج طعمهم يجنن، بـ يتقدم من غير عيش ولا أي حاجة، بـ تمسك السيخ وتقعد تقزقز في الدجاج كده بس، لذيذ فعلًا.

ممكن تعمل إضافات على الساندويتش بتاعك من البطاطس المحمرة أو الزبادي أو أي نوع صوص بأسعار من 1.50 جنيه لـ 7 جنيه، وفيه طبق مقبلات مشكلة فيه جرجير وبصل وفجل وليمون ونعناع بـ 10 جنيه. السحور عند «آدامز» هـ يكلفك حوالي 30 جنيه، سواء طلبت فول وطعمية أو طلبت ساندويتشات لحوم، ده في حالة أنك تكون عاوز تشبع وما تقومش جعان.