ممكن تطلع إسكندرية يوم واحد صد رد علشان أكلة سمك في محل زي «قدورة» أو «بلبع». دلوقتي بقى عندنا "قدورة" في القاهرة وبالتحديد في شارع جامعة الدول العربية في المهندسين. وفي انتظار وصول "بلبع".
الاسم أصبح نار على علم في القاهرة قبل الإسكندرية، والمبنى العملاق اللي فيه المطعم أصبح من علامات شارع جامعة الدول المميزة، بألوانه الأبيض والأزرق زي أي محل مأكولات بحرية بـ يحافظ على هويته من خلال ألوان البحر.
المبنى مكون من 3 طوابق، لازم أول ما تدخل تتجه للناحية الشمال على الثلاجة الضخمة لعرض الأسماك وتبدأ تختار من على الأرفف السمكة اللي على مزاجك وحجم الجمبري ووحدات الكابوريا والكاليماري. الموضوع ده عاوز شوية خبرة، ولازم يكون عندك فكرة أنواع إيه من الأسماك بـ تُطبخ إزاي! صحيح واحد من موظفين المحل اللي بـ يحضر لك طلبك من الأسماك بـ يساعدك ويعرفك إيه ينفع وإيه ما ينفعش، بس معلوماتك الشخصية هـ تكون أفيد برضه في حالة أن الموظف يكبر دماغه ويسيبك تعمل اللي أنت عاوزه حتى لو نتائجه مش مضمونة. يعني على سبيل المثال مش صح أنك تطلب سمك بلطي وتشويه "سنجاري" أو تجيب جمبري جامبو علشان تحطه في طاجن، أو تقلي سمكة بوري. هو طبعًا كل شيء ممكن بس إحنا بـ نتكلم على أحسن طريقة تناسب كل نوع. ومعلوماتك "السمكية" هـ تبقى مهمة في زيارتك لـ «قدورة» لأن هنا مافيش منيو من الأساس، أنت لازم تختار سمكك من العرض وتحدد طريقة تسويته، وهـ تعرف الأسعار شفويًا من الموظف اللي معاك، وبعد كده بـ تأخذ رقم وبـ تروح تختار ترابيزة تقعد عليها وييجي لك الجرسون ويطلب منك الورقة اللي عليها الرقم ويبدأ يزود عليها أي طلبات جانبية ثانية جنب الأسماك زي الأرز والشوربة والباستا والسلاطات، وبرضه هـ يقول لك الأسعار شفويًا، ودي مشكلة بالنسبة لنا لأننا في النهاية بـ نحب نشوف منيو فيه أصناف جنبها أسعار، ويا سلام لو جنب الأصناف وصف للمكونات وطريقة الطهي. لكن هنا الوضع مش كده للأسف؛ هـ تسأل والجرسون يرد عليك بالسعر وده ممكن يأخذ وقت أطول من اللازم.
المهم؛ بدأنا بالشوربة المخلية (25 جنيه) وكانت حلوة بس أكلنا أحلى منها في أماكن ثانية. الطحينة هنا هي أروع ما يكون وخلصنا طبقنا وطلبنا غيره أكثر من مرة. السلاطة الخضراء لذيذة وفريش، وأي نوع سلاطة بـ 6 جنيه. أرز السي فوود بـ 15 جنيه وبرضه كان طعمه عادي والإضافات عليه مش كثير. نيجي بقى للسمك اللي طلبناه؛ سمكة قاروص صغيرة وزنها أقل من نصف كيلو (الكيلو 110 جنيه) وطبق جمبري كبير مشوي بالخلطة (الكيلو 180 جنيه) وشوية كاليماري مقلي لزوم القزقزة (الكيلو 60 جنيه). السمكة مشوية مفتوحة سنجاري وعليها خلطة طماطم وبصل، ونفس الخلطة الرهيبة على الجمبري. اللي بـ يميز محل أسماك عن الثاني هو تتبيلة وخلطة الشوي ومدى طزاجة الأسماك، والحاجتين هنا لا غبار عليهم. بالعكس؛ دي الخلطة كمان عبقرية وقعدنا نأكل فيها بالشوكة بعد ما خلصنا السمك. والكاليماري كان مقرمش وخطير ومقطع لشرائح رفيعة.
الخدمة في «قدورة» سريعة ومحترفة، بس لو طلبت حاجة بعد ما عملت الطلب الأساسي زي المشروبات أو حلويات هـ تتأخر عليك لأن كل هم الجرسونات "اللي هم كثير قوي" أنهم ينزلوا الأطباق الرئيسية أمام كل الزبائن "اللي برضه كثير قوي اللهم ما لا حسد". في النهاية أنت هنا بـ تستمتع بأكلة سمك معتبرة في جو محاكي لجو الإسكندرية، وفيه أكثر من صالة جلوس بستايلات مختلفة تناسب نوع الضيوف؛ عائلات أو شباب أو رجال أعمال. وطبعًا الأدوار العالية أحسن علشان ممكن تتفرج على الشارع من فوق. وأهم حاجة أن فيه حمامات في كل دور، والنظافة عمومًا من عوامل جذب المكان. جرب «قدورة» في القاهرة حتى لو كنت من عشاقه في الإسكندرية.