زيارتنا للمكان ده تمت على مرحلتين بشكل خارج إرادتنا، شاءت الظروف أننا نزور المكان مرتين وراء بعض ما يفصلهمش غير يومين علشان نتأكد أن الخدمة والجودة اللى اختبرناها فى أول مرة ده مستواها الطبيعي هناك وأن المكان ده الاستمتاع فيه بما يقدمه والأجواء مميزة جدًا.. خاصة فى صحبة جرسونات وفريق عمل المطعم اللبنانى "زين – Zein".
السبب وراء الزيارتين بسبب انقطاع الكهرباء فى المرة الأولى! لأنها كانت متزامنة مع عرض الموسيقى والألعاب النارية اللى أقيم هناك الجمعة اللى فاتت وكان مبهر جدًا خلى كل الناس فى المطاعم تقوم من كراسيها وتتفرج عليه، كل الكهرباء تم قطعها من المطاعم والكافيهات المحيطة وقتها وبالتالى كان لازم نوعد نفسنا بزيارة ثانية.
فى الزيارة الأولى استقبلنا فى الدور اللى تحت جرسون وطلع معانا دور واحد علشان يرشدنا ويفرجنا على أماكن الجلوس اللى فيه منها فى أماكن مفتوحة وفيه اللى مغلقة لكن بـ يحيطها زجاج، على الجدران هـ تلاقى لوحات من أعمال الفنان هانى محفوظ والديكور نفسه بسيط وألوانه وإضاءته هادئة، الجرسونات هادئين ومحترفين جدًا، أول ما أخذنا المنيو بس تفاجئنا بواحد منهم بـ يرشح لنا أطباق عنده وبـ يوصف محتوياتها على الرغم أننا لسه بـ نكتشف الأصناف، ارتبكنا شوية وما عرفناش نركز معاه ولا نقرأ اللى أمامنا لكن استسلمنا لترشيحاته اللى كانت فى الأطباق الرئيسية تشيكن بلانكيت Chicken Blanquette بسعر 75 جنيه وهي عبارة عن فراخ مخلية مقطعة صغيرة على أرز وعليهم صوص كريمة بالخرشوف والمشروم (بس مضروبين فى الصوص) مع بطاطس محمرة مكعبات عاملة شكل هرمي وعليها Decoration لعجين معمول شرائح رفيعة كأنها شبكة ذهبية، وكمان رشح لنا بيف جورجونزولا Beef Gorgonzola بسعر 75 جنيه. وده عبارة عن ستيك وعليها صوص بلو تشيز بـ ينزل معاها خضار سوتيه وبطاطس مهروسة.
للمقبلات كان فيه أصناف كثيرة مغرية إلا أننا اتجهنا لطلب تقليدي وهو السمبوسك (35 جنيه) وبـ تكون عبارة عن 4 قطع ممكن تطلب نصفهم لحمة والنصف الثاني جبنة، بعد ما طلبنا نزل لنا سبت فيه عيش شامي وصينية صغيرة طويلة فيها 3 أطباق أصغر، فيها سلاطتين طماطم متبلة والثالثة اكتشفنا أنها صلصة أو صوص البنجر بالحمص، كانت حلوة جدًا كبداية، بعدها جاء لنا المقبلات اللى حسينا أنها لطيفة فى مذاقها لكنها عادية زي أي سمبوسك محشوة، مافيهاش تتبيلة أو إضافة مختلفة.
نيجي بقى للكلام الكبير.. الأطباق الرئيسية: الحرفية والتقديم والخدمة والرائحة.. نتكلم على مين ولا مين.. الستيك كان أكثر من رائع خاصة أننا طلبناه Well Done وكان كده فعلاً، قطعة الستيك كانت كبيرة جدًا وعلى الرغم من كده تسويتها كانت مضبوطة جدًا، كل قطمة وراء قطمة زودت عندنا رغبة أنها ما تخلصش.. بجد Perfection على طبق. كمان التشيكن مع الصوص الأبيض الاختراع ده خلتنا نعمل بحث على طريقة عملها على الإنترنت علشان نحاول نعمله فى البيت.
انتهيت زيارتنا الأولى مع الأطباق الرئيسية، رجعنا بعدها بيومين علشان نكرر التجربة لكن المرة دي مع المشروبات والتحلية، كان نفسنا فى بلح باللبن لكن للأسف ما كانش موجود وقتها، فيه أنواع مشروبات لبنانية أصيلة فى المكان والسموسيز والفرابيه كانوا مميزين بنكهات مش موجودة فى أماكن ثانية زي "السنيكرز" و"زبدة الفول السودانى"، قلنا نجرب فرابيه السنيكرز (30 جنيه) وكمان نجرب مشروب ساخن زي الكابتشينو (18 جنيه)، الأول كان "عالمي"، مكون من زبدة فول سودانى وسنيكرز وكراميل وكريمة وحاجات كثيرة خلت مودنا تغير، جبار بجد، الكابتشينو رغم أننا عارفين أنه فى كل الأماكن غالبًا بـ يكون واحد، لكن هنا هـ تذوقوه بمذاق "زين".
فى التحلية جربنا الشوكولات فوندو (40 جنيه) وطلبنا زجاجة مياه صغيرة (8 جنيه) لأننا عارفين أننا هـ نعطش بعدها، إيه الجمال ده؟.. كيك شوكولاتة محشو صوص شوكولاتة سايحة ومحطوط على جانبيها بولتين آيس كريم فانيليا مع ورقة نعناع لمزج وإضافة طعم جديد، كيك زي دي برضه استفزتنا نروح البيت ندور على طريقة عملها علشان نستمتع بها أكبر قدر ممكن.
فى زيارتنا دي نزلوا لكل اللى فى المطعم مشروب فى كأس صغير Compliment علشان نقول رأينا فيه، كان شوكولات شيك خفيف فيه صوص كراميل وعليه مقرمشات اللى بت تكون فى الكورن فليكس، كانت حلوة جدًا وشكرنا طاقم المكان عليها.
زيارتنا متميزة.. الخدمة والطعم والجو العام هـ يشدوك من وأنت ماشي باتجاه سور تيفولى زايد لأن "زين" بـ يطل على الواجهة، كفاية بس أنك تشوف الناس قاعدة فى المكان فى الدور العلوي وهـ تحب أنك تكون جزء من المكان ده.