لو قررت تأكل أكل سوري اليومين دول هـ يحصل حاجة من اثنين؛ يا هـ تدخل أول محل أكلات سورية يقابلك في الشارع الرئيسي اللي أنت ماشي فيه، لأنك أكيد هـ تلاقي واحد، يا إما هـ تفكر كويس قبل ما تدخل أي محل والسلام وتسأل وتدور فين ممكن تأكل أكل سوري محترم مش مجرد مكان بـ تحمل يافطته كلمة "شام" أو "سوري" اللي بقت أكثر من محلات الفول والطعمية في بعض المناطق، وإحنا في كايرو360 تكلمنا عن الظاهرة دي قبل كده وكتبنا عن عدد من المحلات اللي أصحابها سوريين الجنسية واستوطنوا في مصر مؤخرًا وبدأوا مشاريع تجارية معظمها للمأكولات والحلويات الشامية.

النهارده بـ نقول لك على محل من النوع الثاني، اللي ممكن تروح وأنت عارف أنك مش رايح تأكل من اليافطة "السورية" لكن من مطبخ سوري حقيقي ومعتبر. مطعم "الوجبة السورية" غير لنا نظرتنا للمطاعم السورية اللي انتشرت في الفترة الأخيرة.

موجود في نهاية شارع النزهة قبل طريق النصر في مدينة نصر، واخد زاوية داخلية مش على الشارع مباشرة، يعني فيه مساحة مش صغيرة أمام المحل تم استغلالها ووضع عدد من الترابيزات فيها للسهرات الصيفية، لكن بما أن الجو كان بارد وقت زيارتنا فأخذنا مكاننا داخل المحل متوسط الحجم. ديكوراته بسيطة مافيهاش أي حاجة مميزة، فيه شاشة تليفزيون وحيدة. كل العاملين في المحل سوريين وبـ يتميزوا جميعهم بالذوق العالي وحسن الضيافة، من أول مدير المحل لحد الجرسونات ودي حاجة مش غريبة عن السوريين خاصة العاملين في مجال الأكل والمطاعم.

المنيو متنوع إلى حد ما، مش شاورما ومشاوي وفتوش وبس زي ما كل مطعم سوري بـ يستسهل ويعمل، لكن هنا فيه تركيز جامد على الوجبات الكاملة اللي فيها نوع لحوم وأرز ونوعين أو 3 من السلاطات وفيه مشاوي على الطريقة و"بالتتبيلة" السورية بـ تُباع بالكيلو، وفيه فتة شاورما وساندويتشات ومقبلات شامية والجديد هنا واللي ما شوفناهوش في أي مطعم سوري قبل كده هي البيتزا، لكن للأسف مافيش منيو للحلويات؛ لا سورية ولا غيره، بعد الأكل بس ممكن تأخذ عصير فاكهة فريش.

البداية كانت مع طبق من المقبلات الباردة المتنوعة (20 جنيه) فيه حمص وفتوش وبابا غنوج وورق عنب وجرجير بدبس الرمان وكول سلو. هو ده الكلام، طبق يفتح النفس بجد وكل خاماته فريش وفيها مزازة وتوابل خطيرة، مش عارفين إذا كان فيه فرق بين المقبلات اللبنانية والسورية، لكن الطبق ده هنا حسيناه لبناني أكثر. وجبة مشاوي ميكس (32 جنيه) فيها 250 جرام من اللحوم، شيش طاووق وكفتة حلبي بخلطة الطماطم وكباب بتلو مع الأرز البسمتي والطحينة والسلاطة الخضراء والحمص. أحلى طبق مشويات شامية أكلناه من زمان، صحيح الكميات مش كبيرة بس الطعم أصلي، ولأننا شوفنا أسياخ المشاوي وهي معروضة في الثلاجة وسط التتبيلة الخاصة بها، كان صعب نقاوم اللحوم المشوية من عند "الوجبة السورية" واختيارنا كان في محله.

على غير العادة جربنا البيتزا، وهي موجودة هنا بـ 3 أحجام بأسعار من 16 لـ 34 جنيه، بيتزا بولو بالدجاج والمشروم (30 جنيه) كانت عادية، وكما توقعنا كانت مش بمستوى باقي المأكولات في المطعم، أكلناها كلها طبعًا لأنها غنية بالموتزاريلا وصوص الطماطم اللذيذ بس مش هـ نكرر التجربة ثاني، ودائمًا هـ يبقى اختيارنا الثاني في "الوجبة السورية" هو فتة الشاورما أو الدجاج المشوي (24 جنيه) لأننا شوفنا إقبال الناس عليها بشكل مش معقول في الترابيزات اللي حولنا، واللي بالمناسبة كان كل اللي قاعدين فيها مواطنين سوريين برضه، واضح أنهم مش بـ يلاقوا مكان أحسن من "الوجبة السورية" علشان يعطيهم المذاق الأقرب للمطبخ السوري الأصيل.

زي ما قولنا الخدمة هنا ودودة ومحترمة، والكفاءة والسرعة كمان موجودة، والأسعار والجو العام وقبلهم المذاق يخلونا نروح "الوجبة السورية" بمناسبة ومن غير مناسبة، ونرشحه لحبايبنا اللي بـ يدوروا على أكل سوري "زي الكتاب ما بـ يقول".