نسبة كبيرة من المطاعم تقريبًا بقيت شبه بعض والأغلب بـ يستسهل ويقلد أي مطعم وخلاص، لكن المطعم اللي هـ نكلمكم عنه النهارده مختلف وموجود فى الدقي، لفت نظرنا مجرد ما شوفنا صفحة "شيش طاووق" على الفيسبوك.

وإحنا قاعدين على الفيسبوك ما بين Posts الألش اللي دمها خفيف لفت نظرنا إعلان المطعم اللى عبارة عن لوجو فرخة شكلها ظريف قوي ماسكة سيف المبارزة بتاع الشيش وتحتها اسم "شيش طاووق"، ما ترددناش أننا نشوف المطعم الغريب ده اللي فتح في فبراير 2013 وآراء الناس في التعليقات بـ تقول أنه كويس، شيش طاووق مطعم بـ يقدم ساندويتشات في العيش السوري والفرنساوي والعيش الأسمر (للدايت) بس كلها شيش طاووق.. "فكرة حلوة"، وبـ يعتمد على خدمة التوصيل فقط لأماكن الزمالك والمهندسين والدقي وقريبًا في أماكن ثانية (مافيش مكان لاستقبال زبائن)، كمان بـ يقدم سلاطة الشيش سيزار واختيارات مختلفة للإضافة مع الساندوتش زي البطاطس المقلية والبطاطس الكريسبتس Crispets (بـ يقولوا عليها اختراع) والسلاطة الخضراء العادية مع إضافات.

بصينا على المنيو الصغيرة بألوانها اللطيفة والاختيارات البسيطة المُقسمة إلى الساندويتشات وقسم أطباق الشيش الجانبية اللي بـ تضم الفروتس كاب (11 جنيه) وسلاطة الكول سلو (6 جنيه) وسلاطة عادية (6.50 جنيه)، واختيارات الكومبو ما بين الأوريجينال (مشروب + بطاطس محمرة) أو اللايت كومبو (سلاطة + مشروب) أو الكريسبتس كومبو (بطاطس كريسبتس + مشروب) بإضافة 3.50 جنيه عن سعر الكومبو العادي، وسلاطة الشيش سيزر وبطاطس الكريسبتس.

اختارنا سلاطة الشيش سيزر (21 جنيه) وساندوتش سوري (19 جنيه) وبطاطس كريسبتس (11 جنيه). وصل الطلب بعدها بـ 30 دقيقة بالضبط زي ما قال لنا ممثل خدمة العملاء ولكن من غير ساندويتش السوري اللي كنا طالبينه، اتصلنا بهم مرة ثانية واعتذروا لنا وقالوا 10 دقائق وهـ يكون الطلب موجود بدون مصاريف توصيل وحصل الكلام ده، في الحقيقة اتبسطنا قوي بفكرة الخدمة المهذبة خلتنا نتفائل باللي جاي.

بدأنا بسلاطة السيزار شيش اللي كانت عبارة عن خس عادي (مش كابوتشا) مع قطع فراخ ودريسنج، توقعنا شيء مميز أكثر من كده لكن الطعم عادي قوي بسبب الخس العادي اللي أعطاها الطعم ده كمان كانت بـ تفتقد إلى حاجات كثيرة مهمة في سلاطة السيزر زي الزيتون والطماطم ومكعبات العيش الناشف وإضافات ثانية بـ نلاقيها في أماكن ثانية والكمية كانت قليلة بالنسبة لسعرها، أما البطاطس الكريسبتس (عبارة عن بطاطس مقلية محشية بالسلامي والجبنة) كان مذاق الجبنة فيها ضعيف قوي وكانت شبه بطاطس بيوريه محمرة لكن الطبقة المقرمشة كانت ذهبية مع صوص الباربيكيو اللي كان طعمه لذيذ ومضبوط، الساندويتش السوري كان معقول مكون من رول العيش السوري بداخله قطع من الشيش طاووق مع قطع روست بيف مدخن وخس ومايونيز لكن كمية الفراخ كانت معقولة، كمان حجمه كان متواضع بالنسبة لسعره مش مبهر والعيش كان محتاج يتحمص شوية علشان يعطي طعم لذيذ.

"شيش طاووق" مكان لطيف عنده الجودة والمكونات الطازجة وخدمة العملاء الجيدة والمركزة لكن بـ نتمنى أنهم يأخذوا بالهم من الملحوظات على الأصناف اللي بـ يقدموها علشان يكونوا أفضل دائمًا.