ساحة الطعام فى مول العرب مغرية كفاية لأى حد مش جعان –وأكيد جعان- أنه يدخل ويستكشف إيه اللى موجود علشان يشبع جوعه أو يستكشف إيه الأماكن الجديدة اللى فتحت فى الكام مكان اللى باقيين فاضيين هناك، وده المكان اللى اكتشفناه فتح جديد فى زيارتنا دي.. "أنديز – Andy's".

بشعار It's good mood food ومنيو كبيرة فيها أطباق American Steak وItalian Chicken وكمان باستا وساندويتشات وقسم للإفطار ووجبات الأطفال والساندويتشات والسلاطات والمقبلات والبرجر والسي فوود (نفسكم طويل معانا..) وأخيرًا الحلويات والقائمة -الأطول فيهم- للمشروبات أكيد هـ تتشد أنك تجربه، خاصة أن الصور مغرية كفاية، وأننا نعرف أن الأكل بـ يتحضر فريش أول بأول دي حاجة تشجعنا كمان.

قائمة الإفطار ما نفعش نطلب منا البان كيك والكريب للأسف لأنها بـ تجهز وقت الإفطار فقط، بعد حيرة ووقت طويل قررنا نأخذ طبق دجاج ليمون صوص اسمه "بولو الأليمونى" (40 جنيه) وده عبارة عن فراخ معاها صوص الليمون بالكريمة والزبدة معاها أرز بسمتي وخضار سوتيه لكن إحنا بدلنا الأرز بالبطاطس المهروسة، وكمان طلبنا أنديز ستيك (55 جنيه) 200 جرام من اللحم البلدي مع الجبن الشيدر وصوص الكريمة والمشروم مع الخضار السوتيه والبطاطس المحمرة، وCan بيبسي بـ (4 جنيه).

من قسم السلاطات أخذنا سلاطة يونانى (22 جنيه)، ومن المشروبات الفريش عصير ليمون بالنعناع (7 جنيه)، ومن الحلويات تشيز كيك (15 جنيه) اللى كان شكلها غير مشجع لأنها كانت لسه طالعة مجمدة من الثلاجة والصوص متحجر من فوق.

إيه كل الطلبات دي؟.. فين التفاصيل؟ براحة علينا لأنك لازم تطلب حاجتك كلها مرة واحدة، الولد اللى على الكاشير كان مهذب جدًا وساعدنا فى الاختيارات ووعدنا أن الأكل هـ يأخذ 10 دقائق، لكن للأسف الموضوع أخذ أكثر من كده بكثير.

بعد ما جاء لنا الأكل أخيرًا لقينا فى طبق الستيك الخضار السوتيه يكاد يكون جزرة وواحدة بروكلي وكوسة بينما الطبق الثاني كان مضبوط، استغربنا ورجعناه وأضافوا كمية صحيحة، نأكل بقى.. الستيك كان محتاج يستوي أكثر من كده شوية، الصوص برضه بتاع الفراخ مش واضح فيه الليمون بس كان طعمه لطيف، السلاطة كانت حلوة والبطاطس المحمرة، لكن البيوريه كانت محتاجة لبن زيادة علشان تكون كريمي أكثر، الليمون برضه كان طعمه نعناع أكثر ما منه ليمون مع زيادة شوية سكر، التشيز كيك كانت لطيفة بس كانت محتاجة تهدأ من الثلاجة شوية.

المكان أكله لطيف لكن محتاج اهتمام بالتفاصيل وأكيد هـ يكون نتيجته اختلاف فى الطعم كمان، وبالتالى برضه تميز عن باقى المطاعم المنافسة المحيطة بـ Andy's.