رمضان في القاهرة 2013: الخيم الرمضانية السنة دي في القاهرة - مطاعم Feature - كايرو 360
 







رمضان في القاهرة 2013: الخيم الرمضانية السنة دي في القاهرة
رمضان في القاهرة 2013: الخيم الرمضانية السنة دي في القاهرة
اصدرت في: 15/07/2013

رمضان نورنا وفرحنا به ويارب يكون خير علينا جميعًا، لكن قبل ما نكلمكم عن الخيم الرمضانية السنة دي، فيه أماكن بـ يتقال عليها خيم وهي مش خيم أصلًا، ما حدش عارف ليه؟

على كل حال؛ الخيم الرمضانية من الأشياء المميزة للشهر الكريم وكل سنة بـ تزيد عن الثانية، علشان أهل القاهرة بـ ينتظروها من السنة للسنة، جمعنا لكم في كايرو 360 مجموعة من أهم الخيم في القاهرة.


وحوي

عارفين أغنية "وحوي يا وحوي"؟ من هنا جاء اسم خيمة "وحوي" اللي بـ تجمع بين القاهرة القديمة والحديثة لليلة رمضانية ما تتنسيش، من خلال تقديمها لأكل من كل نوع، في مركب لو باشا 1901 في الزمالك هـ تشوفوا منظر خطير لنهر النيل يناسب جدًا السحور، كمان "وحوي" بـ تقدم لكم أكل خطير ومشروبات جيدة بالإضافة إلى كل وسائل الترفيه من أول الموسيقى والحفلات لغاية الألعاب بكل أنواعها.

المتوقع: طوابير طوابير من الشباب منتظر في ركن البلاي ستيشن.


رمضانا

تاماراي من الأماكن اللي هـ تستمتعوا فيها بجو رمضاني في المساحة المفتوحة وخصوصًا مع بوفيه بـ يقدم كل ما هو لذيذ وحلو.

المتوقع: عدد كبير من الشباب لابسين كأنهم في حفلة يخت بقمصان غير مزررة.


سي عمر

أبراج وفندق فيرمونت هليوبوليس تستمر في أجوائها الاحتفالية طوال الشهر الكريم، بعد النجاح الرائع لخيمة "مشمشية" في السنوات اللي فاتت، السنة دي الفندق بـ يقدم خيمة جديدة اسمها "سي عمر" اللي هـ تقدم سحور شرقي مع تخت شرقي بدأ من يوم 13 يوليو.

المتوقع: شيشة وتخت شرقي.


الخيمة

ياسو لاونج أو غيره من الأسماء اللي تعرفوها به هـ تتقمص شخصية جديدة وتسمي نفسها "الخيمة"، على كل حال منظر النيل مع الألعاب والأكل والموسيقى الشرقية والشيشة هـ يبقوا حاجة جامدة.

المتوقع: هـ يغيروا اسمهم مرة ثانية قبل نهاية رمضان.


فوانيس

فيه لحظات كده الواحد عقله بـ يقف فيها لما بـ يلاقي الاتحاد ده ما بين الأكل والألعاب والشيشة والموسيقى لكن سيتي ستارز في رمضان بـ يقدم لكم خيمة "فوانيس" اللي زي ما سمعنا هـ تبقى حاجة غير متوقعة.

المتوقع: توقع غير المتوقع.


حسن ومرقص

من اسم فيلم "حسن ومرقص" اللي كان بـ يتناول فكرة الوحدة الوطنية بين المسلمين والمسيحيين في مصر، رووف بار بـ يقدم لكم خيمته الرمضانية بنفس الاسم ونفس الروح لكن للأسف الفنان عمر الشريف والفنان عادل إمام مش هـ يكونوا موجودين.

المتوقع: حفل شعبي مع أوكا وأورتيجا الجمعة دي.


ليالي

بارات هليوبوليس دائمًا مشغولة، رمضان السنة دي وده طبعًا مش بعيد عن كافاليني اللي بـ يقدم لكم خيمته "ليالي" بقائمتي الإفطار والسحور اللذاذ واللي تملي معدتكم مع موسيقى شرقي هـ تضيف جو لطيف.

المتوقع: مجموعة من الشباب اللطيف بـ يسألوا: "إمتى الهاوس Dj هـ يلعب؟"


سمعة باشا

فندق ماريوت القاهرة السنة دي بـ يحتفل برمضان بخيمته الجامدة "سمعة باشا" اللي احتلت حدائق الفندق وحولتها لشئ رائع ومكان خطير للسحور مع أجواء عربية أصيلة.

المتوقع: ممكن تشوفوا البساط السحري وبغبغانات بـ تتكلم.


المشاية

أقل شوية من كلمة خيمة وأكثر شوية من كلمة مدينة صغيرة، خيمة المشاية في أركان مول بالشيخ زايد بـ يقدم لكم أحداث وأنشطة احتفالية على مدار الشهر الكريم من أول الحفلات الموسيقية لغاية الألعاب من كل نوع.

المتوقع: أطفال.. أطفال في كل مكان.


لو كابيتول: باب القاهرة

أغلبنا ما حسش برمضان السنة دي زي كل سنة، لكن خيمة "لو كابيتول" في فندق نوفوتيل بـ تقدم لكم الفرصة أنكم تحسوا أكثر بالشهر الكريم من خلال أنوار وسط البلد والمنظر الجامد جدًا للنيل والمساحات الخضراء لنادي الجزيرة.

المتوقع: مسلسلات بـ تُعرض على شاشة كبيرة على الحائط، كأنكم في البيت.


خيمة آب تاون كايرو

ذا كلوب هاوس في آب تاون كايرو بـ يحتفل برمضان بخيمة رمضانية (منه فيه) بعيد عن الزحمة في القاهرة، كمان مع فوازير زي زمان بـ يقدم لكم جوائز تعجب أهل المحروسة.

المتوقع: كله مبحلق في تليفوناته بـ يدور على حل الفزورة.


رمضان سعيد عليكم!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
15/07/2013
-