موجود فى أول يمين من بعد مطعم "ديلاش – D'Lush" فى الشيخ زايد، المنطقة دي حيوية جدًا وفيها كمان مطعم "سبكترا - Spectra" الشهير ودائمًا زحمة لكن فيه نظام وأماكن مخصصة لركن العربيات، المكان ضخم ويشدك بالقعدات الكثير اللى موجودة بره خاصة أن فيه جزء منها شكله عامل زي برجولا حديد كبيرة ودي اللى عندها الجرسون بـ يستقبلك وبـ يسألك حابب تقعد فين، وفيه كمان جزء بالداخل ممكن تقعد فيه مكيف.

أول حاجة هـ تعرفها وتتعجب منها أن المكان كله فيه شيشة وتدخين، من الآخر مافيش مكان مخصص لغير المدخنين، ولما سألناهم عن السبب قالوا لنا أسباب غير مقنعة منها أنهم لقوا أن الإقبال على الشيشة كبير والناس أغلبها عاوزاها! رغم أن المكان كبير جدًا ويستوعب أن يتم تخصيصه!

المنيو كبيرة جدًا واختياراتها متعددة من كريب حادق وحلو، الشوربات، المقبلات والسلاطات والأطباق الرئيسية من لحم وفراخ وسي فوود، وبيتزا وباستا وساندويتشات ومشروبات باردة وساخنة وكمان التحلية، هـ تقعد شوية عقبال ما تقرر، بس اللى لاحظناه أن المكان مكتوب عليه أنه إيطالى لكن بـ يقدم حاجات كثيرة مش إيطالية، نزل لنا فى أول القعدة زجاجة مياه معدنية صغيرة (6.95 جنيه) وبدأنا نطلب الأوردر.

التحضير ما أخذش وقت كبير، أخذنا شوربة كريمة فراخ (22.95 جنيه) ومن الأطباق الرئيسية فراخ سينو (56.95 جنيه) ودي عبارة عن فراخ جريلد مكعبات وعليها صوص من اختيارك مع اختيارين جانبيين، اختارنا صوص الليمون مع سوتيه وبطاطس بيوريه، وكمان طبق بيف استرجانوف (56.95 جنيه) وهى شرائح لحم متسوية Well done مع فلفل ألوان ومشروم وبصل مع نفس الاختيار الجانبي.

المشكلة فى الكنب اللى كنا قاعدين فيه أن مستوى الترابيزة كان منخفض أوى فلازم تميل للأمام علشان تشرب أو تأكل وبالتالى دائمًا ضاغط على بطنك، وده لاحظناه أول لما جاءت لنا الشوربة الأول، كان طعمها وقوامها وكميتها كويسة بس كانت محتاجة تسخن شوية خاصة أننا كنا فى المنطقة المفتوحة.

فى الأطباق الرئيسية إحنا كنا متحمسين للبيف أكتر، لكن بعد التجربة التشيكن سينو تفوقت على البيف، صوص الليمون مع تسوية الفراخ كانت أكثر من رائعة، فى حين أن البيف كان محتاج تسوية أكثر مضغه كان بـ يستغرق وقت شوية، والصوص كان فيه حاجة مشطشطة ولعت لنا فمنا، البيويه والسوتيه كانوا حلوين جدًا.. فراخ سينو بـ نرشحه لكم بقوة.

نيجي بقى للمشروبات وجزء التحلية، طلبنا كريب نوتيلا (21.95 جنيه) مع إضافة بولة آيس كريم (10.95 جنيه) علشان تخفف دسم النوتيلا شوية، ومشروب هافانا (24.95 جنيه) وهو عبارة عن كوكتيل جوافة وفراولة وآيس كريم فانيليا، الكريب كان العجين بتاعه خفيف وكمية النوتيلا فيه مش ملحوظة لكن طعمه كان حلو مع الآيس كريم كمان وحجمه صغير، الهافانا كانت رائعة وقوامها مضبوط جدًا والسكر كمان، ومزيج الجوافة مع الفراولة والفانيليا كان ممتاز.

المطعم له صفحة على الفيسبوك وممكن تعمل عيد ميلاد أصحابك هناك وهـ يشغلوا لك موسيقى خاصة بالاحتفالات دي ويعملوا لك الاستعدادات اللازمة، المكان لطيف والجرسونات لطاف والخدمة ودودة، مكان لطيف بس لو كنت بـ تتضايق من دخان الشيشة ورائحتها مش هـ تعرف تتبسط هناك.