مع الوقت اكتشفنا أن الأماكن اللي بـ تبقى مستخبية كده ومش ظاهرة بـ تكون من أحلى الأماكن للأكل والاستمتاع، علشان الهدوء اللي بـ تكون فيه، تخيلوا بقى لو كمان المكان ده كان بـ يعمل أكل جميل، مطعم وكافيه "ميتسالونا –Mezza Luna" مكان جديد فتح في شارع عزيز عثمان من شارع 26 يوليو في الزمالك، بـ يقدم أكل وحلويات إيطالي.

اكتشفنا "ميتسالونا" بالصدفة وإحنا معديين من جنبه وشدنا هدوء المكان، كان مكون من دورين: الدور الأول مقسم لجزء مفتوح فيه تقريبًا 4 ترابيزات، وجزء داخل المكان فيه ترابيزة كبيرة في النصف وبار صغير للمشروبات السريعة، على الحائط كان مكتوب المنيو بخط كبير جدًا، أما الدور الثاني فهو دافئ وهادي جدًا، مكون من 6 ترابيزات بكراسي خشبية مريحة.

قررنا نقعد وإحنا بـ نأكل في الدور اللي فوق وأول ما قعدنا جاء لنا الويتر بمنيو المشروبات والمنيو، الأكل اللي كان مكتوب بخط الأيد وللأسف الخط كان أغلب الكلام فيه مش واضح، تفحصنا المنيو كويس بمشروباته اللي بـ تتراوح من (9: 16 جنيه) والمقبلات والسلاطات (20: 27 جنيه) والمقبلات كانت عبارة عن 6 قطع من الخبز عليها أصناف ونكهات مختلفة زي الجبنة الموتزاريلا والصوص مع الخضروات، الباستا كانت من (30: 52 جنيه)، وفطائر الرافيول بالجبنة بنكهاته المختلفة (34: 42 جنيه).

قررنا نطلب ميلك شيك بالشوكولاتة (16 جنيه) ومشروب صودا (10 جنيه)، بعد ما جاء لنا المشروبات في وقت سريع وكانت باردة ومنعشة قولنا ندخل على الأكل فــ طلبنا تشيكن بولو باستا بالوايت صوص (45 جنيه) وباستا سي فوود (52 جنيه) وباستا تونة (36 جنيه)، الأكل وصل لنا بعد 30 دقيقة وكان سخن ورائحته لذيذة جدًا وكمان الطعم كان أحلى بكثير من الرائحة، باستا التونة كانت بسيطة جدًا مع التونة والوايت صوص والزيتون، أما باستا السي فوود دي كانت عالم بحار في الطبق من الجمبري للسبيط والجندوفلي مع الصوص الأحمر اللذيذ، وكل طبق باستا كان معاه جبنة رومي مبشورة إضافية.

الحلويات عندهم كانت من (21: 23 جنيه) زي الكريب بالشوكولاتة والتشيز كيك والهوم ميد تراميسو الإيطالية المشهورة بطعم الجبنة مع البسكويت والقهوة الذيذة.

الخدمة في ميتسالونا لطيفة بس الويترز محتاجين يوزعوا نفسهم في المكان بحيث أن كل الترابيزات تشوفهم، إنما الأكل كان عال العال، ووجود حمام في المكان كانت حاجة لطيفة وما بـ تكونش موجودة في المطاعم الصغيرة كثير، آخر اليوم قررنا نقعد بره في الهواء علشان نستمتع بكل مكان في ميتسالونا.