جوائز اختيارات المحررين لعام 2014 لأفضل المطاعم الأمريكية فى القاهرة - مطاعم Feature - كايرو 360
 







جوائز اختيارات المحررين لعام 2014 لأفضل المطاعم الأمريكية فى القاهرة
جوائز اختيارات المحررين لعام 2014 لأفضل المطاعم الأمريكية فى القاهرة
اصدرت في: 11/06/2014

المطبخ الأمريكي على مدار السنين اللى فاتت دخل بقوة فى نسيج المطاعم فى القاهرة، على الرغم أن فيه بعضها قدم لنا برجر بجودة قليلة وهوت دوج على نفس المستوى، إلا أن فيه بعضهم وبشكل حصري نجح أنه يكمل المسيرة بشكل متميز.
على الرغم أن الهمبرجر –هذا الاختراع اللطيف الجميل- تم التعامل معاه بكل إجرام فى مطابخ كثيرة، إلا أن بعضهم قدروا ينجحوا بقوة فى تقديم المأكولات الأمريكية المميزة دي.

 

لورد أوف ذا وينجز – Lord of the Wings

صحيح أصحاب المطعم من لبنان، وأُطلق أول فروعه من بيروت، لكن التخصص الفريد لمطعم "لورد أوف ذا وينجز" بـ يخليه واحد من أوائل اختياراتنا للحصول على الجائزة دي، أجنحة دجاج بأكثر من 12 صوص ومذاق مختلف، مين بـ يعمل بافلو وينجز بالجمودية دي؟ وهـ تلاقي البرجر الأمريكي والناتشوز المكسيكي والقعدة حلوة في The Platform كورنيش المعادي مافيش كلام.

 

لو سيلز – Lucille's

هنا كان أول مرة نعرف يعني إيه "تكس- ميكس" ونجرب برجر تكساس بتتبيلته الخطيرة ونأكل أحلى بوريتو وتاكو مكسيكي. مطعم "لو سيلز" من علامات شارع 9 المميزة في المعادي، أحلى طعم برجر بالمقارنة بالأسعار، والقعدة أنيقة وبسيطة، قعدة أكل وبس.

 

بوتشرز برجر – Butcher's Burger

كان لنا زيارات لفروع مختلفة من "بوتشرز برجر" في المهندسين والزمالك، وتأكدنا بما لا يدع مجال للشك أن ده مطبخ أمريكي أصيل، مطبخ تخصص في البرجر وتفنن في صوصاته وإضافاته وأحجامه، وأضاف المقبلات الأمريكية كمكون أساسي جنب كل ساندويتش، من كرات الجبن المقرمشة والبطاطس بالجبن الحارة، بوتشرز يستحق الكثير من التقدير.

 

ذا ستريت – The Streat

المطعم ده لفت نظرنا بديكوراته الجذابة والفريدة قبل ما نجرب الأكل نفسه، شوفناه أول مرة في فرع صغير قريب من شارع النزهة في مصر الجديدة، والنسخة الأكبر شوية منه كانت في مساكن شيراتون، زرناها من فترة قريبة واستمتعنا ببرجر أمريكي وهوت دوج خطير بأسعار ما حصلتش، من أول 10 جنيه ممكن تأكل وتشبع، "ذا ستريت" يعتبر ظاهرة غير تقليدية في عالم المطاعم الأمريكية في القاهرة.

 

مينس – Mince

هنا في الزمالك ممكن تعرف يعني إيه برجر مع الأناناس المشوي وتجرب طعم البرجر الأصلي زي ما ظهر للمرة الأولى في مدينة هامبورج الألمانية قبل ما يوصل نيويورك ويأخذ الشكل النهائي اللي إحنا عارفينه دلوقت، "مينس" من أفضل المطابخ الأمريكية في العاصمة ده أكيد، وبجانب ديكوراته الجذابة وموقعه الفريد، بـ يقدم أطباق متميزة من برجر الخضار وأحلى كوكيز بيتي للتحلية.

 

بلاكستون بيسترو – Blackstone Bistro

مرة ثانية في الزمالك، "بلاكستون بيسترو" طور المنيو بتاعته مؤخرًا وأصبح بـ يعمل حاجة ما حدش ثاني بـ يعملها، الـ Flatbread أو العيش المفرود اللي بـ يتحط عليه شرائح الستيك والمشروم، ده بالإضافة لأطباق لحم البط على الطريقة الأمريكية وصوصات السبانخ والجبن الأصلية. مكان مميز ومهتم بأدق التفاصيل، والتشيز كيك هنا حكاية. 

 

مبروك للفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
11/06/2014
-