جوائز اختيارات المحررين لعام 2014 لأفضل المطاعم الإيطالية - مطاعم Feature - كايرو 360
 







جوائز اختيارات المحررين لعام 2014 لأفضل المطاعم الإيطالية
جوائز اختيارات المحررين لعام 2014 لأفضل المطاعم الإيطالية
اصدرت في: 12/06/2014

عندنا في مصر مئات المطاعم المتخصصة في الأكلات الإيطالية، كثير منها بـ يشبه بعضه في المذاق والمنيو وحتى طريقة التقديم، لكن إحنا حاسين أن دورنا أننا نفرق بين المطعم المتميز والمتخصص بجد وبين اللي بـ يحمل إسم "إيطالي" وخلاص. للأسف مجموعة كبيرة من المطاعم الإيطالية ارتكبت الخطيئة الأكبر في عالم المطابخ المتخصصة؛ وهي افتقاد الأصالة. انسى الباستا التقليدية والبيتزا السميكة والريزوتو النيء، وانسى الفكرة الغلط اللي أخذناها عن صوص الأرابياتا والمشروم المعلب والطماطم المجففة، وجرب المطبخ الإيطالي على أصوله علشان تعرف تختار معانا أحسن مطعم إيطالي موجود في القاهرة.

 

إلدي فينو - Il Divino

موجود في الزمالك بـ يعمل بيتزا على الطريقة الإيطالية الأصلية، أكثر حاجة هـ تشدك هناك المطبخ الصغير مع فرن البيتزا الكبير المغطى بخرز بـ يلمع وشكله كأنه كرة ديسكو كبيرة جدًا، مع الديكور اللي واخد الطابع الإيطالي.

 

كراست - Crust

"كراست" بـ يقدم بيتزا إيطالية لذيذة بحق وحقيق بأحجام كبيرة، وده يخليها منافس قوى فى منافسات "أجمد بيتزا فى القاهرة"، الخدمة سريعة بدون التضحية بجودة الأكل، ده غير أن الأطفال عاملين لهم بيتزا على شكل أرنب.

 

بيتزا ميا - Pizza Mia

مكانه فى الزمالك، حجمه محندق وصغنن بس البيتزا بتاعته عظيمة، ومش بس كده، ده ممكن كمان تشتري من عندهم برطمانات مربى وطماطم مجففة، وعسل نحل، وبهارات.. ده غير السلاطات والكالزونى اللى يفتح النفس.

 

ميزون توماس - Maison Thomas

"ميزون توماس" من أقدم المطاعم فى المجال، بجوه القديم اللى متأصل فى الديكور الداخلى واللى تحس أنه ما اتلمسش من ساعة الافتتاح عام 1922، معروف بالكراسي والترابيزات الطويلة اللى بـ تطل على شارع 26 يوليو المزدحم بالزمالك، من أفضل البيتزات عندهم جربناها بيتزا "الـ Capriccoisa".

 

بيتزا فيني - Vinny's Pizzeria

كانت شجاعة منهم أنهم يفتحوا جنب بيتزا هت فى شارع 9 بالمعادي، بـ يقدموا بيتزا بستايل مدينة نيويورك، ده غير أن عندهم بار سلاطات فريش جامد، الجرسونات متعاونين جدًا وطعم البيتزا أكثر من رائع.

 

ليوناردو - Leonardo

ده بقى مش مطعم إيطالي وبس.. لأ وفاخر كمان، موجود فى فيرمونت هليوبوليس & تاورز، صحيح الأسعار غالية حبتين، بس ليوناردو بـ يقدم أطباق إيطالية هائلة، مع نكهات لذيذة وكميات أكل كبيرة، والأكيد أنك هـ تمشى مبسوط.

 

سترادا - Strada

موجود فى الفورسيزون فيرست ريزدنس، مستخبي وراء باب خشبي عتيق، محفور عليه نقوش توسكانية، بـ تطل على منظر النيل، القعدة شيك، المكان واسع، منيو الأكل بـ يقدم أطباق إيطالية غير البيتزا منها الريزوتو والباستا، وفيه كمان قسم للسمك وللحوم الحمراء والبيضاء... تجربة مختلفة تمامًا.

 

لا تراتوريا - La Trattoria

موجود فى الزمالك، الجو فيه مريح جدًا، وعلى الحوائط لوحات كبيرة برسومات للباستا والكامباري، أول ما المكان بـ يمتلئ بالناس العاشقة للأكل الإيطالى ويأكلوا البيتزا مع صوت الضحك والراحة اللى بـ يوفرها المكان على طول هـ تحس أنك فى مكان إيطالى أصلى.

 

مبروك للفائزين!

مزيد من الصور
  • جوائز اختيارات المحررين لعام 2014 لأفضل المطاعم الإيطالية
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
12/06/2014
-