جوائز اختيارات المحررين لعام 2014 لأفضل المطاعم الهندية - مطاعم Feature - كايرو 360
 







جوائز اختيارات المحررين لعام 2014 لأفضل المطاعم الهندية
جوائز اختيارات المحررين لعام 2014 لأفضل المطاعم الهندية
اصدرت في: 16/06/2014

لما مطبخ معين من أي بلد بعيدة يقرر أنه يقدم أكلاته العجيبة في القاهرة، فيه احتمال كبير أنه يفقد أصالته مع الوقت ويتحول لمطعم محلي عادي علشان يرضي الذوق العام هنا، أكيد إحنا مش بـ نحب حاجة زي كده، وبـ نفضل أكثر نسلط الضوء على اللي قدر يحتفظ بطابعه المميز وأصالة البلد اللي جاي منها، وقدر في نفس الوقت يحافظ على نجاحه، المطبخ الهندي بـ يشبه المطبخ المصري بشكل كبير، خصوصًا أنه بـ يعتمد على التوابل والإضافات الحارة واستخدام المكونات متنوعة المذاقات.

 

نواب – Nawab

أصحاب المطعم من الهند، موجودين طوال الوقت في المكان علشان يضمنوا أعلى مستوى من الجودة والأصالة في كل الأكلات المقدمة. هنا الأطباق الرئيسية هي الأفضل، مش القعدة ولا الديكور البسيط، كل أنواع اللحوم الضاني والبيف والدجاج والجمبري مع خلطات الكاري وشطة الماسالا، وأطباق الخضار بالتوابل، كلها أطباق جديرة بالتجربة في "نواب" أهم مطعم هندي في الزمالك، وفي القاهرة تقريبًا.

 

مهاراني – Maharani

موقع مش عادي على ظهر مركب لو باشا العريقة في الزمالك، مطعم "مهاراني" بـ يتميز بإطلالة فريدة على النيل ومطبخ هندي أصيل بـ يقدم كل ما لذ وطاب من روائع دلهي وكالكتا وبومباي. في طبق واحد هنا ممكن تجرب دجاج تكا الأصلي والريش الضاني وسيخ الكباب والجمبري الهندي، وما تنساش أن البرياني كمان أصلًا هندي، و"مهاراني" بـ يعمله بمنتهى الاحترافية مع الدجاج واللحم البقري، وما تنساش تجرب حلوى الكالفي الهندية اللي مش بـ يعملها أي مطعم هندي في القاهرة.

 

مهراجا – Maharaja

كلمة "مهراجا" هي أكثر كلمة بـ تعبر عن حضارة الهند في ثقافتنا المصرية، سهل جدًا أن اسم المطعم ده يجذبك ويخليك تبقى عارف أنت مقبل على إيه؛ سحر الهند. مطعم "مهراجا" له فروع في المعادي والرحاب وداخل فندق هيلتون رمسيس بوسط البلد. بجانب تصميمه المميز والاهتمام بالديكور والتفاصيل المتعلقة بالثقافة الهندية، بـ يقدم مجموعة مختارة من أحلى أكلات المطبخ الهندي، وبـ يعمل عيش النان المخبوز فريش بالزبدة والثوم وصوص الصويا. وأطباق العدس والمخاني أو الدجاج بالزبدة، ومن أقليم كشمير بـ يقدم الأرز البولاو بالخضروات. "مهراجا" مكان مثالي لأجواء هندية أصيلة ومبهجة. 


ماسالا – Massala

مش بسهولة تلاقي مطعم هندي في مصر الجديدة أو مدينة نصر، هـ تلاقيها دائمًا مرتبطة بالمعادي والزمالك بسبب وجود أجانب من كل الجنسيات هناك، لكن مطعم "ماسالا" هو استثناء للقاعدة وحقق نجاح كبير بوجوده داخل فندق كارفن في شارع محمد عبيد في مصر الجديدة، علشان يبقى خيار كل سكان شرق القاهرة لما يحبوا يجربوا المطبخ الهندي بشكل احترافي بعيد عن المولات ومطاعم الأكلات السريعة.

هنا هـ تلاقي كل حاجة بـ تدور عليها في المطعم الهندي، التندوري وبطاطس الساموساس المحشوة الحارة ومشروب الجولاب جامون بلبن جوز الهند ولاسي المانجو الخطير، وقعدة الروف حلوة كمان في فندق كارفن.

 

راج – Raj

عندما يتم مزج الأصالة بالفخامة! ده تعبير مناسب لما نحب نتكلم عن مطعم "راج" الموجود داخل واحد من أشيك فنادق العاصمة وهو فيرمنوت هليوبوليس. تقريبًا مش هـ تلاقي مطعم هندي في هليوبوليس غير داخل فنادق كبيرة، ومطعم "راج" مش مطعم عادي، وعلى قد فخامته وجودة أطباقه وتنوع المنيو بتاعه، إلا أن أسعاره على نفس مستوى الضخامة والفخامة، لكن نوعدك مش هـ تنسى التجربة زي ما إحنا مش ناسيينها، وقررنا نختم به كلامنا عن أفضل المطاعم الهندية في القاهرة، وإن كان فيه دلالة، فإحنا متأكدين أنها وصلت.


ألف مبروك للفائزين!

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
16/06/2014
-