انتشرت في الفترة الأخيرة المطاعم الشرق أوسطية في القاهرة، واللي تختلف في تقديمها وفي أسعارها وجودة الأكل والمكان، لكن لما يكون فيه مكان بـ يجمع ما بين ثلاث بلاد قريبين من بعض في الثقافة والطعم مختلف حاجة بسيطة، يبقى لازم نجربه.

"الصين وجمال الصين، تايلاند وحلاوة تايلاند، الهند وبهارات الهند، لسنا نعلم كيف تتجمع كل هذه البهارات ولا ينهار الناس ولا يحتارون".

عزيزي الأكيل اللي مالوش في الأكل الحراق جدًا أو البهارات الكثير.. مكانك مش هنا يا كبير.. رحنا النهارده مطعم "دراجون هاوس – Dragon House" اللي بـ يجمع ما بين ثلاثة أنواع أكل.. الأكل الصيني والهندي والتايلاندي. والحقيقة أننا عملنا دماغ من توليفة تايلاندية هندية صينية.

أول ما دخلنا المكان بـ تلاحظ الضوء الأحمر والديكور المتأثر بالثقافة الصينية والموسيقى الصينية 180% لدرجة أنك بـ تموت على نفسك من الضحك، وأنت بـ تتخيلهم "نياااو.. بو.. تش.. اااه" بـ ينطوا في الهواء بالحركات البهلوانية بتاعتهم، وناقص بس تلاقي أوشين جاية تأخد منك الطلب، بعد ما أوشين جات -نقصد الجرسون- واللي كان بـ يتأخر علينا في الطلبات شوية مش عارفين ليه.. طلبنا بعد حيرة طويلة كمقبلات سبرينج رولز بالدجاج (13.5 جنيه للقطعتين) وده من الأكل الصيني، وهو عبارة عن جلاش وجواه بصل وكرنب متبل مع الفراخ، الحقيقة أنه كان مقرمش جدًا ولذيذ.

ولعشاق التجارب لازم تأكلوا Steamed Fried Dumpling بـ 15 جنيه للأربع قطع، ودي بقى يا سيدي الفاضل لها طريقتين طبخ، طريقة صينية وطريقة تايلاندية، وبما أننا تذوقنا قبل كده اللي بالطريقة الصينية، قمنا جربناها بالتايلاندية، ويا سعادة الأستاذ اللي مالوش في الأكل الصيني دي عبارة عن: عجينة زي القطايف بتاعتنا كده بس بدل ما بـ تتحمر بـ تستوي على البخار والحشوة طبعًا مختلفة تمامًا، وقُدمت في باسكيت خوص صيني، اللي استويت فيه على النار، علشان تحتفظ بحرارتها. بالنسبة لطعمها إحنا شخصيًا أكثر حاجة بـ نحبها العجينة اللزجة، اللي بـ تتزحلق في فمك أول ما تحطها فيه، بس الحشو كان كبير جدًا ومليان بصل زيادة عن اللزوم، كنا نُفضل لو يبقى أقل من كده علشان يتناسب مع حجم العجينة. المكان كمان بـ يقدم جزر وخيار مخلل مجانًا وشهادة الحق أننا حبيناه جدًا لاختلافه عن المخلل العادي بتاعنا باللسعان اللي فيه والحرقان الزيادة، وطبعًا اختلاف بهاراتهم عن بهاراتنا.

بعد كده طلبنا نودلز بالفراخ والخضروات (29 جنيه)، كانت شهية جدًا وطازة وإن كان ناقصها الصوص بتاعها لأنهم جابوها بعد ما صفوه للأسف ودي طبعًا أكلة صيني معروفة.

لكن جمال البهارات بقى اللي فرقعت في فمنا، وخلتنا في قمة السعادة كان فراخ بالكاري الأحمر والماسالا chicken madarass بـ 53.5 جنيه، واللي نقل حضارة الهند كلها من أول قضمة، تخيل معانا بقى التوابل الهندية بـ ترقص جوه فمك، وعيش لحظة الفرقعة، وده عبارة عن قطع فراخ في صوص أحمر وفيه توابل هندية كثير جدًا، منها الثوم والبصل والكاري والكمون وجوز الهند. وأول ما بـ تبدأ تأكلها بـ تيجي لك صدمة حضارية في البداية، لكن بعد ما بـ تضبط الملح بتاعك بـ تكتشف جمال وعذوبة التوابل وأنت بـ تتذوقها واحدة وراء الثانية، كمان الصوص كان كثير جدًا لدرجة أنك ممكن تشربه كأنه شوربة، ولولا كثرة التوابل اللي بـ تعطش قوي كنا عملنا كده.

والطلب الثاني كان توفو دجاج حلو وحادق sweet and sour بـ 45.7 جنيه، وأرز بالخضروات (14 جنيه). توفو الفراخ اللي طبعًا صيني كان وهمي لأن طبقة التوفو المقرمشة اللي بـ تحمي توابل الدجاج خلته رائع ومقرمش من بره، وطري من جوه ومليان توابل. والأرز كان لذيذ ومش معجن.

نيجي للحلو.. حد فيكم قبل كده جرب يأكل آيس كريم مقلي (22 جنيه)، إحنا جربناه، ولأننا مش من عشاق جوز الهند ما عجبناش قوي الصراحة، لأن الآيس كريم كان ملفوف بطبقة كبيرة جدًا من جوز الهند اللي خلى أول جزء منها بس اللي يتحمر وبـ تفضل طبقة ثانية مش متحمرة، وطبعًا ده نتيجة أنه ما ينفعش يسيبه كثير على النار، وكان معاه أناناس طازة وجميل. بس اللي أحلى منه بكثير الموز المقلي، اللي كان طازة جدًا وسخن قوي، مع آيس كريم فانيلا والعسل، إحنا الصراحة مش بـ نحب العسل بس العجينة اللي عملوا بها الموز مع العسل والآيس كريم كانت روعة.. مع أول قضمة تحس بسخونة وبرودة في نفس الوقت وتبقى مش عارف تعمل إيه في فمك غير أنك تصبر وتستمتع بالطعم الجميل.

آخر حاجة شربناها كانت الشاي الصيني (15 جنيه)، واللي كان حجمه كبير جدًا وطعمه رائع مش زي أي شاي صيني بـ تطلبه جاهز، دي أعشاب طبيعية صينية صناعة عالمية، كمان المطعم عنده كورنر للأطفال لو عاوزين يلعبوا، وممكن تدخل تشوف المنيو من هنا وتطلب الأكل ييجي لك لحد البيت.

تجربتنا في دراجون هاوس كانت مميزة وممتعة، مش بس علشان الأكل الجميل اللي من ثلاثة بلاد مختلفة، لأ أهم حاجة أنك تأكل مع ناس أنت بـ تحبها، وده اللي بـ يخلي المكان أحلى، لأنك بـ تغذي روحك بالحب ومعدتك بالأكل الحلو، وكلها أرزاق ربنا مقسمها.