بشعار "الشاورما اللبنانية، بدَّا معلميه" واللون الأحمر اللي هـ يخطف عينك من بعيد هـ تلاقى "معلم شاورما – M3allem Shawarma" في منطقة الفوود كورت في مول العرب، وسط زحمة المكان سلكنا طريقنا علشان نبص على المنيو ونتعرف على الشاورما اللبناني دي.

المنيو ألوانها مبهجة، وشكل الأطباق يفتح النفس، ده غير أنهم كعادة أي مكان في الفوود كورت حاطين المنيو وراء الكاونتر على الحائط فوق، عندهم أطباق رئيسية: شاورما دجاج أو لحم أو ميكس وفتة لحمة أو فراخ، وفيه قسم للمناقيش، وساندويتشات يا إما بعيش لبنانى أو صاج، والمزات اللبناني/ السلاطات، وأخيرًا فيه ركن للأطفال فيه تشيكن ناجتس بس (25 جنيه) بـ تقدم مع بطاطس وكاتشب وعصير، والحلويات حاجة زي الفطيرة أو عجينة البيتزا عليها شوكولاتة وموز (15 جنيه) أو شوكولاتة وحلاوة وموز (18 جنيه)، والمشروبات (فريش أو غازية).

طلبنا تبولة (12 جنيه)، وبابا غنوج (14 جنيه)، ومن الساندويتشات اختارنا كومبو صاج لحمة وفراخ "منفصلين 2 ساندويتش" (54 جنيه) معاها مشروب وبطاطس، ومن الأطباق فتة دجاج (36 جنيه) وكمان دايت سفن أب (6 جنيه)، الأكل ما أخدش وقت كبير في التحضير، الفتة كان نازل معاها علبة ثومية صغيرة، والساندويتشين كان حجمهم صغير، بس يلا نذوق.

نبدأ بالشاورما اللحم اللي كان محطوط معاها داخل العيش الصاج شوية بطاطس محمرة صغيرة، كانت في رأينا محتاجة تتلسع/ يزداد تسويتها شوية لأن كان لونها فاتح، مش عارفين هل الشاورما اللبناني هي كده بس عامة كانت كويسة بس مش حلوة أوي ما عجبتناش، على عكس فتة الدجاج اللي كان فيها شاورما الفراخ مستوية حلو قوى وطعمها مع تقلية الفتة والأرز والعيش المحمص حلوة جدًا، التبولة والبابا غنوج كانوا حلوين والبطاطس كانت عادية.

ما كانش فيه مكان نطلب الحلو، بس ممكن في مرة جاية إن شاء الله، "معلم شاورما" مكان لطيف تأكل فيه بأسعار لطيفة برضه، بس نصيحتنا خليكم في الفتة، طعمها أحسن وفي المزات اللي مشهورة بها لبنان!