جوائز اختيارات محرري كايرو 360 لعام 2015 لأفضل المطاعم الإيطالية - مطاعم Feature - كايرو 360
 







جوائز اختيارات محرري كايرو 360 لعام 2015 لأفضل المطاعم الإيطالية
جوائز اختيارات محرري كايرو 360 لعام 2015 لأفضل المطاعم الإيطالية
اصدرت في: 28/05/2015

بالرغم من أن المطبخ الإيطالي يعتبر من أكثر المطابخ المنتشرة في مطاعم القاهرة، والأكثر شعبية بين المصريين؛ إلا أنه للأسف من المطابخ اللي غالبية المطاعم بـ تستغنى عن الوصفات الأصلية بوصفات "ممصرة" للأطباق، فبالتالي أثناء اختيارنا لأفضل الأماكن اللي بـ تقدم الأكلات الإيطالية، كان أهم حاجة بالنسبة لنا هو مدى أصالة الوصفات اللي بـ تقدمها المطاعم الفائزة، من أول الأكلات المنتشرة زي البيتزا وحتى الأطباق المعقدة الأقل شهرة بين المصريين.

الفائزين بجوائز اختيارات المحررين لعام 2015 لأفضل المطاعم الإيطالية هم:

 

إل ديفينو – Il Divino:

من الأماكن اللي قدرت تحتل مكانة بين مطاعم الزمالك في وقت قليل، لأن مش بس البيتزا اللي بـ يقدمها إل ديفينو معمولة على الطريقة الإيطالية الأصلية، ده كمان طريقة تسويتها إيطالية أصيلة باستخدام فرن الحطب، ده غير ديكورات المكان اللي بـ تتميز بالبساطة الإيطالية والخدمة السريعة... بكل ده، طبيعي جدًا أن إل ديفينو يعتبر من أفضل المطاعم الإيطالية في القاهرة.

 

كراست – Crust:

بالرغم من أن كراست يعتبر من الأماكن المتخصصة في عمل البيتزا بالطريقة الإيطالية المضبوطة في فرن الحطب، إلا أنه كمان عنده مجموعة من السلاطات والحلويات الإيطالية اللي ما تتفوتش، زي النوتيلا كالزوني مثلًا. غير كده كمان، كراست عنده ميزة مش سهل تلاقيها في أي مطعم، وهي تقديم وجبات خاصة بالأطفال وكمان وجود ساحة لعب يقضوا فيها وقت ممتع.

 

فينيز بيتزا – Vinny's pizzeria:

من أشهر الأماكن اللي بـ تقدم البيتزا على الطريقة النيويوركية، وهي أن أطراف العجينة تكون مطوية باليد، ده غير أن كمية الصلصة وقوامها بـ يكون أخف، بخلاف بيتزاته المميزة، فينيز عنده بار سلاطات مختلف ومكوناته كلها فريش يخلي أي سلاطة من عنده وجبة قائمة بذاتها، كنا بـ نحسد أهل المعادي على وجود فينيز عندهم، ولكن دلوقت فتح فرع للتوصيل فقط في الزمالك والمهندسين.

 

ليوناردو – Leonardo:

من أشهر وأحسن مطاعم فندق فيرمونت هليوبوليس، ليوناردو بـ يقدم مجموعة كبيرة من الأطباق الإيطالية على أصولها، في جو راقي ومختلف عن أي مكان ثاني، بـ نعتبر تجربتنا في ليوناردو من أجمل التجارب الإيطالية اللي خضناها؛ من أول فواتح الشهية لحد الحلو ما كانش فيه ولا غلطة. 

 

سترادا – Strada:

فندق فورسيزونز فيرست ريزيدنس القاهرة مشهور بفخامته، وبالأماكن الكثيرة الموجودة فيه اللي بـ تقدم أطباق ممتازة في جو راقي وفخم، من ضمن الأماكن دي مطعم سترادا، واللي مش بس معروف بأطباقه الإيطالية الأصلية، ده كمان بـ يتميز بديكوراته المودرن المستوحاة من إقليم توسكانا، وموقعه اللي بـ يطل على النيل.

 

لا تراتوريا – La Trattoria:

بجوه الهادئ والمميز، لا تراتوريا مش بس مختلف من حيث جودة الأطباق الإيطالية اللي بـ يقدمها، ده كمان قدر أنه يكوَن لنفسه كمكان شخصية مميزة بـ تتلخص في البساطة والرقي، لا تراتوريا أحسن مطعم تجرب عنده أطباق إيطاليا الكلاسيكية، واللي مش بـ تأخذ حقها في المطاعم الإيطالية الموجودة في القاهرة زي الريزوتو بأنواعه المختلفة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
28/05/2015
-