جوائز اختيارات محررى كايرو 360 لعام 2015 لأفضل المطاعم المتخصصة - مطاعم Feature - كايرو 360
 







جوائز اختيارات محررى كايرو 360 لعام 2015 لأفضل المطاعم المتخصصة
جوائز اختيارات محررى كايرو 360 لعام 2015 لأفضل المطاعم المتخصصة
اصدرت في: 31/05/2015

تجربة الأكل فى القاهرة مش سهلة، خاصة لو أنت من النوع اللى بـ ينقى يروح فين ومش بـ يرضيك أى حاجة والسلام، ولأن فيه ناس بـ تقدر أوى الأماكن المتخصصة فى مطابخ أو أكلات معينة واللى مش بـ تكون منتشرة أوى، الأماكن القليلة اللى قدرت تحقق ده لازم نرفع لها القبعة أو بمعنى أصح نشيلها فوق رأسنا تقديرًا.

الفائزين بجوائز اختيارات المحررين لعام 2015 لأفضل المطاعم المتخصصة:

 

كاشيمبا – Cachimba

مطعم الشيخ زايد الأسبانى بـ يقدم تاباس وباييا وشيشة فى جو مريح ومرحب جدًا.

 

أوفيو – Ovio

المطعم الأوربي بـ يقدم أطباق أصيلة من بلادها معمولة بحرفية للناس اللى زهقت من الأكل التقليدي اللى بـ يقدم فى أماكن كثيرة فى القاهرة.

 

أنتيك خانة – Antique Khana

مطعم فرنسي متميز، أنتيك خانة مش مجرد مكان للأكل بس، هما كمان بـ يقيموا هناك أحداث ثقافية وفنية ومعارض، وهـ تتفرج هناك على أنتيكات معروضة فى كل مكان.

 

بارباكو مكسيكان جريل – Barbacoa Mexican Grill

المطاعم اللى بـ تقدم أكل مكسيكي مش كثيرة فى القاهرة، لكن بارباكو مكسيكان جريل قدر أنه يقدم الأكل المكسيكي الأصيل لأهل القاهرة خاصة سكان المعادي.

 

جرينجوس بوريتو جريل – Gringos Burrito Grill

مكان أكل مكسيكي تيك أوت Takeout، جرينجوس حفر لنفسه مكانة واسم فى توصيل البوريتو المحشية بمكونات رائعة والكاساديا والتاكوز لحد باب بيتك.

 

تابلا لونا – Tabla Luna

مطعم لاتينى أجواءه مريحة فى المعادى وبـ يقدم أطباق من أمريكا اللاتينية وسط أجواء جديدة منعشة بعيدًا عن الأكلات المكررة، وصفات "تابلا لونا" بـ تنعش حاسة التذوق بجد.

 

ذا جريك – The Greek

مش بس بـ يقدم أكلات أوربية مهملة فى القاهرة، لكن أصحاب المكان كمان قدروا بطريقتهم العملية يطوروا تجربة أكل فعلاً مشوقة، وبالتالى ظهر الكلام ده فى صورة أجواء مريحة، فى وقت قليل.

 

شيفز ماركت – Chef's Market

بـ يقدم أكلات منطقة البحر المتوسط، وبدون مبالغة "ده أحسن أكل أكلناه في حياتنا"، الموضوع مافيهوش مبالغة، شيفز ماركت بـ يخليك تعيش تجربة فريدة في عالم الطعم والمذاق، ناهيك عن الخدمة المحترفة وشكل المكان غير التقليدي.

 

ذا فوندو بوت – The Fondue Pot

الفوندو السويسرى كان تجربة مختلفة علينا فى القاهرة، تجربة الأكل نفسها لما تغطس اللحم أو الخضار فى الجبنة السايحة أو الفاكهة فى الشوكولاتة السايحة تجربة ثرية، بـ تحس فيها بالمشاركة وسط أجواء المطعم المريحة.

 

ليتل سويس – Little Swiss

ليتل سويس فعلاً اسم على مسمى، بجد قطعة صغيرة من سويسرا، بـ يقدم فوندو، وراكليت ولحوم مشوية، من أحسن تجارب الأكل بالنسبة لنا فى القاهرة.

 

سويس كوتاج – Swiss Cottage

المطبخ السويسري ما بـ يأخذش التقدير والشهرة اللي يستحقها، لكن سويس كوتاج قام بالواجب، وقدم له التقدير الوافي عن طريق تقديمه للمصريين بأحسن صورة.

 

شوكجوزال - Çok Güzel

المطبخ التركي غني جدًا، الأماكن التركية المنتشرة في القاهرة بـ تقدم ساندويتشات الدونر كباب، لكن شوكجوزال بـ يقدم تجربة متكاملة للمطبخ التركي بكل أطباقه ووصفاته.

 

سانتوريني - Santorini

من الأماكن اللى لازم ترجع لها تجربها ثاني، يا إما تسافر سانتوريني شخصيًا علشان تذوق أطباق من قلب اليونان.. تجربة استثنائية هـ تخليك تغمض عينيك وأنت بـ تأكل من فرط اللذة.

 

عثمانلى – Osmanly

موجود فى جاردن سيتي، عثمانلى بـ يقدم مأكولات من المطبخ التركي فى جو هادئ ورائع، بأثاثه الراقى، من الآخر بـ يقدم خدمة رائعة فى جو متميز على مستوى خدمة 5 نجوم.

مزيد من الصور
  • جوائز اختيارات محررى كايرو 360 لعام 2015 لأفضل المطاعم المتخصصة
التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
31/05/2015
-