إحنا في الطبيعي بـ نهرب من أي مكان موجود في سيتي ستارز، أصل أكيد الأكل في مول مش مريح والسبب هو الدوشة الرهيبة، لكن زيارتنا لمطعم "جابيز - Gaby's" كانت هايلة من كل الجوانب، مكانه أمام سينما VIP في سيتي ستارز، وجابيز مكوّن من دورين بديكورات بسيطة مستوحاة من جو البيوت اللطيف وفي نفس الوقت قدروا يحافظوا على حيوية وجمال المكان.

بدأنا مع طبق مقبلات عملاق هو بتس أند ديبس Bits and Dips بـ (110 جنيه) عبارة عن بلح بحر وكريسبي بون بون وسمبوسك سجق وأجنحة دجاج سبايسي وناتشوز، ومعاه عيش من القمح الكامل وباتون ساليه وصوص جبنة، تتبيلة بلح البحر كانت هايلة وطعمه متوازن بطريقة ممتعة، أما الكريسبي بون بون –عبارة عن كرات بطاطس مقلية محشية سبانخ وجبن شيدر وموتزاريلا– فكانت طرية وغنية بالنكهة اللذيذة.

إحنا أصلًا من عشاق السجق ومن عشاق السمبوسك، فطبيعي أننا نتوقع السمبوسك سجق يكون اختراع، الطبقة الخارجية كانت مقرمشة وخفيفة ومغطاة بصوص باربيكيو، وقدرت تعمل طعم هايل مع حشو السجق المهروس بطعمه اللذيذ، وكملت التركيبة مع الخضروات الموجودة في الخلطة السحرية، أجنحة الدجاج السبايسي للأسف ما كانتش مشطشطة زي ما كان نفسنا، بس كانت طرية ولذيذة مافيش كلام.

رغم كميات الأكل الموجودة في طبق المقبلات كان لازم نجرب الأطباق الرئيسية، ومن هنا طلبنا تشيكن بورتوبيلو رول (95 جنيه) وستيك & فرايز (129 جنيه)، والأول كان عبارة عن أربع قطع رول فراخ محشية مشروم وجبنة سويسري ذايبة وعليهم صوص فلفل أسود، الطبق معاه بطاطس ويدجز وشيبسي وبروكلي، والكلام ده أضاف للطبق شكل يفتح النفس للأكل، نكهة صوص الفلفل كانت معقولة وما كانتش طاغية على أي من مكونات الطبق، أما المشروم فكان قصة ثانية خالص، وأضاف للفراخ الطرية أصلًا عصارة إضافية لذيذة، الملحوظة الوحيدة على الطبق أنه محتاج جبنة سويسري زيادة.

طبق الستيك & فرايز هو واحد من طبقين ستيك موجودين في المنيو، وهو عبارة عن ثلاث شرائح رفيعة من اللحم، ومعاهم صوص مشروم لذيذ وطلب جانبي من البطاطس المهروسة، التسوية كانت زيادة شوية لأننا طلبناها medium، فكان صعب مضغ اللحم شوية، بس التتبيلة كانت لذيذة والصوص قدر يصلح شوية من الطعم.

مشروبات جابيز كان لها نصيب معانا، طلبنا كراميل فريز (30 جنيه) وهو كوكتيل من عصير الأناناس والموز الطازج وصوص كراميل مع آيس كريم فانيليا، طعم الموز والكراميل كانوا طاغيين على العصير، أما الأناناس فكان خفيف وأضاف النكهة اللاذعة المناسبة، مشروبنا الثاني كان بلودي ليموناد Bloody Lemonade بـ (24 جنيه) بس طعمه ما كانش متوازن، الكوكتيل بسيط جدًا، ليمون ورمان، بس المشكلة أن الرمان كان قليل وبالتالي الطعم كان غريب شوية.

طبق اليوم فعلًا كان الشوكليت سوفليه العظيم (45 جنيه)، مستوية تمام ومعاها بولة آيس كريم فانيليا والشوكولاتة السايحة طالعة من قلب الكيكة ورايحة على الآيس كريم في سيمفونية من الطعم الساخن والبارد.

بعيدًا عن أخطاء بسيطة أثرت على الأطباق الهايلة، خرجنا من جابيز وإحنا مبسوطين ومتفاجئين شوية، رغم أنه داخل مول، بس قدروا يعملوا أجواء مميزة خاصة بهم.