11 مطعم بـ يقدموا منيو فطار مميز في القاهرة - مطاعم Feature - كايرو 360
 







11 مطعم بـ يقدموا منيو فطار مميز في القاهرة
11 مطعم بـ يقدموا منيو فطار مميز في القاهرة
اصدرت في: 15/11/2015

بـ تحب فطارك عامل إزاي؟ هل أنت من النوع اللي يفضل يبدأ يومه في مكان مفتوح منعش؟ ولا أحسن لك تأكل حاجة سريعة وأنت رايح الشغل؟ أو يمكن أنت من الناس اللي بـ تستمتع بوجبة فطار في المول وبعدين تبدأ ماراثون التسوق؟

خلاص خلاص، مافيش مشاكل. أياً كانت دماغك، إحنا جمعنا لك عدد كبير من أماكن الفطار المختلفة والبعيدة عن الأجواء التقليدية، علشان الفطار هو وجبتنا المفضلة وكمان هو أهم وجبة في اليوم، 11 مكان في القاهرة تبدأ معاهم يوم جديد بشكل مختلف:

 

شكسبير أند كو - Shakespeare and Co

ديكوراته المبهجة بطابعها الأوربي الكلاسيكي مش هي السبب الوحيد لأن شكسبير أند كو يكون من أهم أماكن الفطار، عندك يا سيدي اختيارات كثيرة للفطار من مطاعم عالمية –أمريكاني وإنجليزي ولبناني وأماكن ثانية– يعني مثلًا ممكن تجرب بيض فلورنتين وسلامون مدخن وكريبات حادقة وأكلات صحية، ده طبعًا غير تشكيلة عظيمة من مشروبات ساخنة وعصائر فريش وقهوة روعة، تقدر تفطر في شكسبير أند كو في أي وقت من اليوم، وكمان المطعم له فرعين واحد في كابيتال بيزنيس بارك الشيخ زايد والثاني في سيتي ستارز.

 

كاسبر أند جامبينز - Casper & Gambini's

اختيار مثالي مافيش شك، ومعروف أنك لو عاوز غداء أو عشاء لطيف يبقى تطلع على كاسبر أند جامبينز وأنت مغمض؛ الفكرة أن السلسلة الشهيرة بـ تقدم منيو فطار لطيفة تشمل اختيارات فطار إنجليزي (عبارة عن بيض مقلي وسوسيس وفول وطماطم ومشروم مشويين) وفطار عالمي، وكلّه كوم والكرواساندوتش كوم ثاني –كرواسون منفوخ محشي صدور رومي وبيض مقلي وخضروات)، فرع كاسبر أند جامبينز في سيتي ستارز بمساحته الكبيرة أكيد هايل للمجموعات الكبيرة علشان يستمتعوا بفطارهم خصوصًا وسط برودة شهر نوفمبر.

 

إى إم بى إم - AMPM

أكيد AMPM في سيتي ستارز من أحلى الأماكن للي عاوز فطار ع السريع قبل ماراثون التسوق، منيو فطار AMPM بـ تغطي كل حاجة من البيجلز للكرواسونات للمافينز للكيكات، وطبعًا الساندوتشات والسلاطات وكل الحاجات دي كميتها معقولة جدًا، تقدر كمان تستمتع بسلاطة طازجة من بار سلاطات AMPM.

 

ديوكس - Dukes

لو دائمًا مستعجل وعاوز فطار ع السخان، يبقى ديوكس هو اختيارك الأول، ديوكس عنده منيو فيها كرواسونات محشية وبيتزا وميني ساندويتش، وممكن تقضي وقت فطار لطيف مع صديقك أو زميلك في الشغل مع فنجان قهوة وأنت في طريقك للشغل، ممكن كمان تخطف لك كرواسون محشي طازج أو تختار من مجموعة ساندويتشات من اللحمة الباردة أو رومي كوممبير أو طماطم موتزاريلا.

 

بالتازار - Baltazar

لو كنت من الأكيلة اللي بـ يستطعموا الأكل من منظره، يبقى بالتازار هـ يعجبك هـ يعجبك، لأن بعيدًا عن أطباقهم الرئيسية ومقبلاتهم الرائعة –تحديدًا ستيك السلامون العصاري وبطاطس برافاس– الإبهار اللي بجد هـ يعجبك بـ تشوفه في شكل التقديم المبهر لكل حاجة في المنيو، صحيح أطباق الفطار هناك محدودة بس هايلة، وتشمل بيض مسلوق وأومليت مشروم، والأكيد أن الفطار في بالتازار لذيذ ومعقول، المهم في الموضوع أنك تحجز بدري علشان تبعد عن دوشة ممرات سيتي ستارز.

 

جابيز – Gaby's

غير أنه واحد من مطاعمنا المفضلة اللي بـ تقدم تشكيلة رائعة من الأطباق المميزة، جابيز كمان عنده اختيارات هايلة للفطار، منها بان كيك بالفواكة والصوص المميز Maple Syrup، ولفائف بيض ولبنة وEggs Benedict، تقدر تستمتع بصينية فطار (75 جنيه) عبارة عن فول وبيض وحلّوم مشوي وسجق وعيش طازج.

 

برانش & لانش - Brunch & Lunch

رغم أن برانش & لانش الموجود في شارع 9 الرائع في المعادي لسه جديد، بس قدر سريعًا يوصل لقائمة المطاعم اللي بـ تقدم فطار مميز وسط قعدة رائعة مفتوحة وتشكيلة لذيذة من الأومليت والبان كيك والمخبوزات الطازجة، برانش & لانش كمان غير تقديمه لفطار هايل –خصوصًا Eggs Benedict بالسبانخ أو البيف أو السلامون– عنده عدد من الاختيارات الصحية لأهل الدايت الكرام، مشهورين كمان بتقديم اختيارات رائعة لوجبة Brunch، ووصيتنا الأخيرة قبل ما تمشي لازم تجرب كيكة الجزر هناك، تحفة!

 

ناي لاونج - Ney Lounge

نبدأ بإيه؟ نتكلم عن ناي لاونج في الزمالك بأجواءه الهادئة وألوانه الرائعة، ولا ديكوراته اللطيفة اللي تشبه غرفة المعيشة أو تقديمة لساندويتشات روعة، لا يا جماعة لو سمحتم، خلينا نركز النهارده على موضوعنا، ناي لاونج بـ يقدم كل يوم الصبح فطار فيه أي حاجة تخطر على بالك، استمتع بفطار صباحي مميز في قعدة ناي لاونج المكشوفة واختار فطارك يكون كونتيننتال أو أمريكي أو إنجليزي مع مخبوزات طازجة وبان كيكس ووافلز.

 

مينس - Mince

مينس وما أدراك ما مينس، واحد من أشهر محلات البرجر في القاهرة، وكمان معروف أنه بـ يقدم واحدة من أحلى وجبات الفطار ومنها Mediterranean Skillet (عبارة عن سوسيس وبيض مقلي وجبن فيتا وبصل وفلفل وبطاطس محمرة)، وفطار مينس Mince Breakfast (بيض مخفوق ومعاه توست بني) وطبعًا ما ينفعش ننسى Elvis French Toast علشان تحلّي وتدلّع نفسك.

 

ذا تيبسي تي بوت - The Tipsy Teapot

شكل تقديم الأكل في ذا تيبسي تي بوت الموجود في المعادي وأطباق الفطار الرائعة قصة ثانية خالص، ممكن تفطر فه بان كيك توت Berry Pancake وأومليت وساندويتش بيض وبيكون وكريبات حادقة، تقريبًا أحلى حاجة بـ تعجبنا في فطار ذا تيبسي تي بوت هي كوكتيلات العصير المجانية اللي بـ يقدموها كل مرة نفطر هناك.

 

لو شانتيلي

لو عاوز مكان تفطر فيه يجمع بين الأسعار المعقولة والجودة، يبقى اطلع على لو شانتيلي، صحيح المنيو مافيهاش اختيارات فطار كثيرة، بس الموجود يكفي وزيادة، منيو لو شانتيلي تشمل باتيهات حادقة (جبنة أو لحوم أو زيتون أو سوسيس)، كروك شانتيلي وكلوب ساندويتش.

 

شوف مطاعم أكثر من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
سارة كامل
حرر بواسطة:
سارة كامل
تاريخ النشر:
15/11/2015
كاتبة - فنانة وخريجة حقوق، ونشيطة فى كذا مجال مع بعض، فلسفتها فى الحياة: اكتشف ذاتك.