أوقات بتعدي علينا أيام بنحتاج ندلع نفسنا بأكلة فخمة، وفي نفس الوقت مش عاوزين نضيع وقتنا في شكليات، وعلشان كده بنقدم لكم كارما – Karma الموجود في الدور الأول من مول سيتي ستارز عند بوابة سينما VIP، مش فريد من نوعه أو مميز بحاجة معينة، لكن الكنب والكراسي المريحين والحوائط المعمولة بالكابتونيه، وكمان الأجواء الهايلة حققوا إحساس مريح للمكان.

جرسون لطيف قدم لنا المنيوهات وسابنا نختار من المنيو الكبيرة على راحتنا، المميز في منيو كارما بعيدًا عن أقسام المقبلات والسلاطات والساندويتشات التقليدية أنهم بيقدموا أكلات عالمية ومنها أطباق إيطالي وآسيوي.

قررنا نطلب ترياكي بيف (58 جنيه) من المقبلات، وهو عبارة عن شرائح لحم صغيرة مشوية Well Done ومتغطية بصوص الترياكي المسكّر والسبايسي في نفس الوقت.

بعدها على طول وصلت أطباقنا وهي سويت أند ساور تشيكن (67 جنيه) وسكيليت تشيكن (82 جنيه)، السويت أند ساور تشيكن قُدمت في طاسة كبيرة وفيها فراخ مقلية ومعاها جزر وفلفل ألوان وأناناس، ومرشوش عليهم صوص سويت أند ساور ومعاها طبق فيه أرز مقلي بالبسلة والجزر والذرة الحلوة، الفراخ كانت مقلية تمام التمام، وصوص السويت أند ساور كان ممتاز وحافظ على قطع الفراخ من أنها تتزيت، أما الأرز فكان هايل وأضاف طعم مختلف كان محتاجه الطبق.

أما السكيليت تشيكن يكفي فردين، وهو عبارة عن أربع قطع فراخ كل قطعتين منهم محطوطين فوق بعض وبينهم جبنة موتزاريلا وبيف بيكون وفلفل ألوان، والأطباق الجانبية كانت بطاطس مهروسة وخضار سوتيه، الممتع في الطبق كان التوازن بين الشوي وبين المحافظة على قطع الفراخ طرية وعصارية، وكمان الإضافات عملت نكهة جميلة من غير ما تطغى على طعم الفراخ.

الحلو يا جماعة لو سمحتم، طلبنا كان شوكليت فوندو (45 جنيه) ومعاها بولة آيس كريم فانيليا وكلهم متغطيين بخطوط من صوص الكراميل اللذيذ، لقطة اليوم كانت لما ضربنا المعلقة في الكيك الأسفنجي، وفجأة خرج منها فيضان شوكولاتة سايحة غرقت الطبق الأبيض كله، مافيش كلام أنهم عملوه باحترافية صعب نشوفها في القاهرة.

نقدر نقول أن زيارتنا لكارما كانت ممتازة وصعب نشتكي من حاجة معينة، وصحيح الأسعار ممكن نشوفها غالية شوية، بس الكميات الكبيرة بتعوض الأسعار وهنا تظهر نقطة تفوق كارما على المطاعم من نفس فئته، كارما بيركز على تقديم خلطة سحرية ما بين الأكلة الكاجوال البسيطة والأكلة الفخمة.