أكيد المطاعم الموجودة في كومباوندات في ضواحي القاهرة تعتبر اختيار ممتاز للناس اللي عايزة تهرب من زحمة ودوشة العاصمة أو عذاب الركنة. مدينة الرحاب باعتبارها من أوائل الكومباوندات السكنية في القاهرة، قدرت تستغل الموضوع ده لصالحها. الرحاب بتقدم لنا أجدد ضيوف عالم الأكل والأكيلة وهو "سيتي سكوير"، اللي فيه تشكيلة من المطاعم والكافيهات المعروفة، ومنهم مطعمنا النهارده وهو "فايكينج-Viking".

فرع فايكينج سيتي سكوير الموجود فوق كافيه تشي تشي مختلف عن فرع هليوبوليس – اللي ستايله الإسكندنافي بيتعارض مع شكله المودرن الفضائي من بره – ويتميز بستايل مودرن لطيف؛ منطقة الـ إن دوور مميزة بالكنب الجلد، والـ أوت دوور مساحتها واسعة بتطل على ساحة الكومباوند كلها.

منيو فايكينج طبعًا فيها أغلب الأطباق الموجودة في معظم المطاعم اللي بتقدم مطابخ عالمية، بس المنيو الجديدة فيها أطباق مميزة منها كوكونت كاروت سوب (23.99 جنيه)، آيريش كاشو تشيكن (73.99 جنيه)، وفيكتوريان آويستر بيف (112.99 جنيه) ومالديف فيش (86.99 جنيه).

بدأنا الأكل مع كوكونت كاروت سوب ومعاها تشيكن كارنافال سالاد (45.99 جنيه) وقدموا لنا طبق مجاني مليان عيش طازة صغير ومعاه صوص رانش لذيذ.

خلصنا على العيش اللذيذ من هنا، ولاقينا الشوربة والسلاطة قصادنا على طول. الشوربة كانت روعة ونكهة الجزر كانت خفيفة، بس مقدرناش نميز طعم جوز الهند.

نروح على السلاطة اللي كانت كوكتيل رائع من قطع الفراخ بتتبيلتها اللذيذة وشوية بهارات كاجون، مع خضروات طازة وفاصوليا حمراء ورومي مدخن وجبنة شيدر ورقائق تورتيلا حمراء. صحيح المكونات كثيرة جدًا، بس طعم السلاطة كان مضبوط والتوابل اللذيذة كانت هي ضابط الإيقاع.

نروح على الثقيل، طلبنا من الأطباق الرئيسية تشيكن سكالوبيني معاه فتوتشيني بالصوص الأبيض (69.99 جنيه) وروستد هيرب تشيكن (67.99 جنيه).

التشيكن سكالوبيني طلعت سخنة مولعة من الفرن، وكانت عبارة عن قطع فراخ مقلية طرية عليها شبت وقطع لحم مدخن وطماطم، وكلهم غرقانين في صوص ليمون كريم رائع وغني بالزبدة. الباستا بالصوص الأبيض كانت معمولة آل دينتي والصوص نفسه كان سميك وغني، وبجد كان إضافة هايلة للطبق.

الطبق الثاني كان أقل من اللي فات، وهو عبارة عن خمس قطع كبار من صدور الفراخ المشوية تتبيلتهم هايلة ومستويين كويس، لكن الخضار السوتيه اللي معاهم كان تقريبًا ني، ودي كانت غلطة تتحسب على الطبق.

نروح على قسم الحلو، اللي شوفنا فيه ابتكارات جديدة دخلوها على منيو فايكينج المعروفة، زي آبل كرامبل كيك جار، وشوكليت بيرلز وشوكليت بوت، وإحنا قررنا عن نفسنا نطلب الآخير.

الشوكليت بوت من فايكينج (31.99 جنيه) عبارة عن كيك شوكولاتة طري وسخن، وعليه بولتين آيس كريم فانيليا وصوص كراميل وشوكلاتة، والحقيقة أنه كان روعة زي مكوناته. أما البوت أو الوعاء، فكان خدعة الهدف منها المحافظة على الكيك الدافئ لأخر قضمة فيها.

أحلى نهاية للأكل كانت مع عصير كيوي سلاش أند سماش (29.99 جنيه)، وهو عبارة عن كيوي وليمون ونعناع وثلج. وصحيح الكوكتيل كان منعش، بس النكهة اللاذعة كانت طاغية على طعم الكيوي.

فرع فايكينج سيتي سكوير أكيد هايل، وصحيح فرع هليوبوليس عنده مشكلة في الاختلاف بين الستايل الإسكندنافي والمودرن، لكن الفرع ده كان مختلف، وبعيدًا عن شوية أخطاء في عمل الأكل، فايكينج بيقدم نكهات مميزة وكميات أكل كبيرة.