جوائز اختيارات محرري كايرو 360 عام 2016 لأفضل المكتبات ومحلات الألعاب - تسوق Feature - كايرو 360
 







جوائز اختيارات محرري كايرو 360 عام 2016 لأفضل المكتبات ومحلات الألعاب
جوائز اختيارات محرري كايرو 360 عام 2016 لأفضل المكتبات ومحلات الألعاب
اصدرت في: 24/05/2016

من وإحنا صغيرين ولينا هوايات بتكبر معانا، وإحنا نحب أوي اللي يقدّر هواياتنا ويساعدنا على ممارستها بشكل أفضل، ما بين كل الهوايات تقريبًا في حاجتين ثابتين عند الجميع.
القراءة، وألعاب التسالي. القصة بسيطة جدًا، أننا دايمًا بندور على حاجة نروّح بها عن نفسنا، والحاجتين دول بيحققوا الغرض بامتياز. فجمعنا لكم أكتر الأماكن اللي قدرت تلبي احتياج كل الأجيال في المساحتين دول تحديدًا.. تعالوا نشوف.

جوائز اختيارات محرري كايرو 360 عام 2016 لأفضل المكتبات ومحلات الألعاب:



مكتبة ديوان – Diwan Book Store

ديوان من الأماكن اللي غيرت مفهوم كلمة "مكتبة" عند الناس، الموضوع مابقاش مقتصر على مكان لبيع الكتب، لأ كمان كل الهدايا والإكسسوارات المتعلقة بيها، غير أن ديوان بتتميز بحاجتين نادرًا ما تلاقيهم بسهولة عند غيرهم، وهما تغطية كل المجالات بعدد غزير من الكتب المناسبة لكل الأعمار والمستويات المعرفية، بالإضافة لإمكانية القيام بدور الوسيط في الحصول على كتاب غير موجود بالسوق وتوصيله حسب الطلب.


مكتبة ألف – Alef Book Store

القرّاء يقدّروا أوي المكان اللي بيحاول دايمًا يكون حلقة وصل بينهم وبين الكُتّاب والأدباء.. ومكتبة "ألف" قدرت تقوم بالدور ده بشكل جيد جدًا عن طريق فعاليات نقاشية مختلفة وعشرات حفلات التوقيع.

الكتب خان – Al-Kotob Khan

عامل الوقت دايمًا مهم في الحكم على أي حاجة، والكتب خان بقى في وقت قياسي أحد أهم أماكن بيع الكتب والأدوات المكتبية في القاهرة.. وكونه لسه مستمر على نفس المستوى بعد الصعود السريع فده معناه أن الناس دي بتعرف تقدم خدمة ممتازة، وبتعرف تحافظ على اسمها وعلى جمهورها.

مكتبة مكتوب – Maktoob Bookstore

أحد المشاكل الكبيرة عند القراء هي أسعار الكتب، الموضوع بقى عايز ميزانية لوحده. وللأسف الأماكن اللي بتوفر الكتب المستعملة بأسعار رخيصة مش دايمًا بتكون منظمة وبتعرف توصل للي عايزه فيها بسهولة.. مكتبة "مكتوب" حققت المعادلة الصعبة، كتب حالتها جيدة، بأسعار مناسبة، وتنظيم جيد يسهل عليك الوصول.. يا عز الطلب!

 

مكتبة الشروق – Shorouk Bookstore

المكتبة اللي بتحمل اسم أحد أشهر دور النشر في القاهرة.. وده يحملها مسؤولية الحفاظ على الاسم العريق ده، واللي شفناه يخلينا نقول بمنتهى الثقة أنهم قدروا فعلًا يكونوا أد المسؤولية دي. مافيش تقريبًا أي كتاب جديد بينزل السوق للقراء بيعدي من تحت إيدهم، كل المطبوعات الجديدة مضمون بنسبة كبيرة جدًا تلاقيها هناك.


سمير وعلي – Samir & Ali

الاسم رقم واحد دلوقتي في بيع المستلزمات والأدوات المكتبية. المكان بيغنيك عن اللف والدوران، كل اللي ممكن تحتاجه هتلاقيه هناك بسهولة مع أول زيارة، وبماركات مختلفة علشان تشوف الأنسب ليك في الجودة والسعر.


ألوان – Alwan

المكان اللي قدر يفرض نفسه كاسم كبير وسط الكبيرة الموجودة.. كل المستلزمات المكتبية وأدوات التعلم هتلاقيها هناك بجودة كويسة وأسعار أنسب بكتير من أماكن تانية.

المركز الدولي للكتاب –International Book Center

مشروع ثقافي حقيقي ومتكامل يخلينا نحتار نتكلم عن إيه ولا إيه.. الكتب الكتير من دور نشر مختلفة علشان توفر على نفسك عناء البحث، وللا الندوات والجلسات النقاشية اللي بيديرها متخصصين في كل المجالات واللي بينظمها المركز من وقت للتاني، وللا التعامل المريح والناضج من موظفين بيغيروا صورتنا التقليدية عن الموظف الحكومي، ولا الخدمات اللي بتتقدم لجمهور القراء حسب ظروف المكان زي الاستعارة الداخلية وغيرها.. حاجة تفرح بجد.

 

لينرت & لاندروك – Lehnert&Landrock

كنز مخفي لكنه محافظ على قيمته عبر الزمن الطويل! المكان تاريخه لوحده يحرك فيك الفضول أنك تزوره وتشوفه وتتعامل معاه، أما بالنسبة للي بيعمله فهو مش مجرد مكتبة عادية، ده -بالإضافة للخدمة المكتبية- مكان عرض للتحف والهدايا ذات الجمال الشديد والقيمة العالية، وسط البلد وَلَّادة!

بكير – Bakier

المكان الراقي صاحب المنتجات المنوعة تنوع شديد جدًا، لكن يفضل الوصف الجامع في كل منتجاته هو الجودة العالية.. وتفضل الخدمة والتعامل في المكان على نفس القدر من الجودة.


المعايرجي – El Maayergy

الاختيار الأنسب للناس اللي معدل استهلاكها كبير، ومحتاجين حاجة جودتها كويسة لكن في نفس الوقت بسعر أفضل.. غير أن التوسع الشديد في المنتجات أكيد برضه هيوفر عليك مجهود اللف.

 

أما بالنسبة لمحلات الألعاب، فكانت الاختيارات كالآتي:

كريبتونايت - Kryptonite
لو أنت من الناس اللي لسه مسلّمين روحهم للجنون والمرح الطفولي وبتحول ده لاهتمام شديد بالكوميكس ومتابعة الأبطال الخارقين يبقى أكيد هتعيش أحلى أوقات عمرك في المكان ده، لأنه مش مقتصر على إنتاج اللعب، ولكن كمان منتجات منوعة كل تصميماتها بتحمل شعارات وصور أبطال عالمك المَرِح.

 

بلاي آند تريد – Play N Trade

الألعاب الإلكترونية من الألعاب اللي بتفضل مكملة معانا طول العمر وما بنحسش أبدًا أننا كبرنا عليها. هناك هتلاقي اللي عايزه واللي مايخطرش على بالك من الألعاب الإلكترونية المناسبة لكل الأعمار والأذواق والاهتمامات وحتى الأجهزة المختلفة.

سوبر ستاش – Super Stash

بيقولك: "شجع اللعبة الحلوة".. لكن "سوبر ستاش" مارضيش بدور المشجع، وقرر ياخد دور الصانع..
صانع اللعبة الحلوة!

مبروك لكل الفائزين.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
كايرو 360
حرر بواسطة:
كايرو 360
تاريخ النشر:
24/05/2016
-