جوائز محرري كايرو 360 لأفضل أماكن بيع الزهور وتنسيقها لعام 2016 - تسوق Feature - كايرو 360
 







جوائز محرري كايرو 360 لأفضل أماكن بيع الزهور وتنسيقها لعام 2016
جوائز محرري كايرو 360 لأفضل أماكن بيع الزهور وتنسيقها لعام 2016
اصدرت في: 25/05/2016

الزهور والورود مخلوقات جميلة كل اللي بتعمله –بجانب وظيفتها العلمية طبعًا، واللي مش هندخل في تفاصيلها دلوقت لأن ده مش مجاله هنا- أنها تخلي العالم شكله أحسن.. كأنها بالضبط الميك آب اللي المكان بيحطوا فيكون شكله أجمل. ولأسباب كثيرة -برضه مش هندخل في تفاصيلها هنا- مسألة أنك تداوم على شراء الورد في مصر مش حاجة منتشرة، بالرغم من أنها عادة مبهجة جدًا، آخرنا ورد في الأفراح والفالانتين أو زيارة في المستشفى.. ما علينا من كل ده، القائمة دي فيها أفضل الأماكن اللي بتعرف تتعامل مع الكائن الظريف ده وبتقدمه للمستخدم بشكل يخليه أجمل وأجمل.

 

بيليسيمو – Bellissimo:

مش مجرد محل لبيع الزهور وتنسيقها؛ بيليسيمو ممكن يتكفل بكل المهام المتعبة الخاصة بتحضير لمناسبة من أول تجهيز الورود لغاية حجز الأكل، ده غير أنهم ممكن يشاركوك خبراتهم في اختيار الـ DJ وحتى المصورين. بيليسيمو كمان عنده مجموعة كبيرة من الشموع المحلية والمستوردة.

 

بوكس أوف روزيز – Box of Roses:  

لو أنت من أبناء الثمانينات ممكن تكون صادفت صندوق أزرق شفاف مربوط بفيونكة فوشية فيه مجموعة من الورود في أي مسلسل مصري، بوكس أوف روزيز طوّر الفكرة دي وبقى فيه أشكال وأنواع من الصناديق المختلفة -من أول الصناديق الورق حتى الحوافظ الزجاجية اللي بغطا من فوق- كل ما عليك أنك تطلب وهما ينفذوا على طول.

 

فلورينجي فلاور شوب – Fleurinjy Flower Shop :

فلورينجي مش بس بيبيع زهور، ده بيقدم مجموعة كبيرة من الأفكار المبتكرة للهدايا المختلفة والمتنوعة واللي مش بس متعلقة بالزهور، ده كمان عنده شوكولاتة وبالونات للي يحب ينوع. ده غير كمان أنه عنده مدرسة لتعليم فن تنسيق الزهور، يعني في خلال شهر تقدر تتعلم المباديء الأساسية للفن ده.

 

فلاور باور – Flower Power :

اسم كبير بتثق فيه أكبر الأسماء في عالم الضيافة؛ زي فور سيزونز ودوسيت تاني، فطبيعي نقدر إحنا كمان نثق فيه. فلاور باور قدر يحقق نجاح كبير في عالم محلات الزهور وتنسيقها، والجميل أنه عنده عدد كبير من الفروع المنتشرة في أنحاء القاهرة؛ زي المهندسين وفندق فور سيزونز نايل بلازا وفيرست ريزيدنس وداون تاون مول القطامية في القاهرة الجديدة.

 

خضرة - Khadra:

مش كل محلات الزهور بتهتم بالنباتات الخضراء، ومش كل محلات الزهور اللي بتهتم بالنباتات الخضراء بتهتم بالنباتات الخضراء الفريش الخاصة بالطبخ. خضرة في مول أمريكانا بلازا عنده كل ده، ده غير مجموعة شجر الموالح المختلفة واللي أكيد وجودهم في أي بيت هيكون إضافة مبهجة ومبتكرة.

 

أوت سايد إن - Outside In:

مين مننا ما تمناش الورد اللي عنده في فازة بيتهم ما يذبلش؟ أوت سايد إن بيتميز بمجموعة كبيرة من الورود والأشجار الصناعية، وطبعًا فيه بينها وبين الورد الصناعي المحنط اللي كان موجود في كل بيت مصري في فترة من الفترات فرق شاسع؛ لأن زهور أوت سايد إن الصناعية شكلها محاكي للزهور الطبيعية واللي فيه أماكن كثيرة بتعتمد عليها في الوقت الحالي.

 

تاتش أوف فلاور – Touch of Flower :

من الأماكن اللي يعتمد عليها في تجهيز المناسبات المختلفة بفضل خبرة واحترافية فريق العمل اللي موجود في المحل. أما عن الزهور، فالمحل عنده مجموعة من الزهور الطبيعية والصناعية اللي ممكن تختار منها براحتك، ده غير أنك ممكن تشتري فازات من هناك بأسعار معقولة.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
25/05/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.