العودة للمدرسة: 4 أماكن في القاهرة تقدر تشتري منها مستلزمات مدارس بسعر مناسب - تسوق Feature - كايرو 360
 







العودة للمدرسة: 4 أماكن في القاهرة تقدر تشتري منها مستلزمات مدارس بسعر مناسب
العودة للمدرسة: 4 أماكن في القاهرة تقدر تشتري منها مستلزمات مدارس بسعر مناسب
اصدرت في: 05/09/2016

أكيد كاتب المقال بطل يروح مدارس من –مممم... بلاش نعد- إلا أن حتى يومنا هذا، موسم Back To School أو العودة للمدرسة من الحاجات اللي لسه لغاية دلوقتي بتطاردنا. والحقيقة أنه سواء أنت لسه بتدرس، أو بتصرف على حد بيدرس الموضوع بيبقى مرهق للأعصاب والميزانية؛ كل حاجة سعرها بيتضاعف والطلبات ما بتنتهيش... المهم، احتفالًا بالذكرى السعيدة لخروجنا الآمن من مرحلة الدراسة، قررنا أننا نجمع لكم البازارات اللي ممكن تلاقوا فيها منتجات متنوعة خاصة بالدراسة:

1 - بازار Back To School في جاليريا 40:

جاليريا 40 من الأماكن المميزة الموجودة في منطقة الشيخ زايد وأكتوبر، وهو بيتميز بمجموعة كبيرة من المحلات والمطاعم؛ إلا أن المنظمين –بازارنا- هيجمع لكم هناك مجموعة كبيرة من العارضين اللي بيقدموا مختلف المنتجات اللي ممكن يحتاجوها الولاد في موسم المدارس.

البازار هيقام يوم الجمعة 26 أغسطس، وهو هيبدأ الساعة 4 العصر، ومستمر لحد 12 صباحًا.

دي صفحة البازار على الفيسبوك لو عايز تاخد فكرة.

 

2 - بازار Back to School في قطامية داون تاون مول:

 بنفس منظمي البازار الأول، هيتنقل البازار من منطقة الشيخ زايد بعدها بيوم لمنطقة القاهرة الجديدة في واحد من أشهر المولات الموجودة هناك، وهو قطامية داون تاون مول. المعرض هيضم أدوات مكتبية، ملابس بيت للأطفال ده غير مجموعة أحذية وشنط المدارس. الجميل كمان أن مكتبات زي "أ" وديوان هيكونوا مشاركين في اليومين.

البازار هيكون يوم السبت 27 أغسطس، وهيبدأ من 4 العصر، ومستمر لحد 12 صباحًا.

دي صفحة البازار على الفيسبوك.

 

3 – مهرجان تسوق Bye Bye Summer في مول بوينت 90:

من أجدد الأماكن اللي ممكن تخرج فيها في القاهرة الجديدة، وهو مشهور بسينماته اللي بتعرض كل جديد. ولكن بمناسبة أن الصيف خلاص بيشطب والأجازة هتروح معاه، سيدات مجتمع القطامية قرروا أنهم يجمعوا هناك الناس في مهرجان للتسوق. صحيح البازار مش مخصص بالكامل لمستلزمات المدارس؛ لأنه هيضم منتجات خاصة بالبيت والمطبخ، لبس وإكسسوارات، ولكن المؤكد أن هيكون فيه ركن لحبايبنا اللي رايحين المدرسة كمان شوية.

البازار هيكون على يومين، 2 و3 سبتمبر. هيبدأ من الساعة 11 صباحًا لـ 10 مساءً,

دي صفحة البازار لو حابب تشوف الدنيا فيها إيه هناك.

 

4- بازار Back to School في أمريكانا بلازا مول:

واضح أن البازارات مش هتخرج بره المنطقتين –القاهرة الجديدة والشيخ زايد- لأن آخر بازار لاقيناه هيكون موجود في أمريكانا بلازا مول في الشيخ زايد، واللي بتنظمه شركة جواهر، وهي هتجمع بجانب عدد كبير من عارضي مستلزمات المدارس، هتلاقوا مجموعة من المنتجات الثانية اللي هتناسب كل الأعمار وكل أفراد العائلة.

البازار هيكون يوم 2 سبتمبر من الساعة واحدة الظهر لـ 10 مساءً.

شوف كده اليوم تفاصيله هتبقى عاملة إزاي من هنا.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
05/09/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.