دليل كايرو 360 لمكتبات ممكن تشتري منها أدوات مدرسية ‏ - تسوق Feature - كايرو 360
 







دليل كايرو 360 لمكتبات ممكن تشتري منها أدوات مدرسية ‏
دليل كايرو 360 لمكتبات ممكن تشتري منها أدوات مدرسية ‏
اصدرت في: 06/09/2016

بمناسبة موسم العودة للمدرسة، بنقدم لكم مقال فيه مجموعة من المكتبات المشهورة اللي أكيد هتلاقي فيها كل حاجة متعلقة بالأدوات المكتبية والحاجات اللي أي حد بيدرس محتاجها.

 

مكتبة برناسوس:

من المكتبات اللي الواحد بيدخلها يبقى عايز يجيب كل حاجة فيها. برناسوس ليها مجموعة كبيرة من الفروع المنتشرة في أنحاء القاهرة؛ من أول المهندسين، مدينة نصر وحتى أكتوبر. لاحظنا أن أسعار الشنط المدرسية السنة دي مبالغ فيها في أماكن كثيرة واللي بتبدأ من 500 جنيه لحد 1000، إلا أن برناسوس عنده مجموعة كبيرة ومتنوعة من الشنط المدرسية للأطفال أسعارها غير كده تمامًا؛ يعني مثلًا شنطة طفل في حضانة مثلًا الشنطة سعرها (51 جنيه)، أما لو عايز شنطة بعجل وحركات فعندهم شنطة معاها مجموعة من الملحقات المدرسية (زي المقلمة وأقلام) سعرها 185 لـ 200 جنيه.

غير كل ده، هتلاقي كل اللي هتحتاجه هناك، ده موقعهم الإلكتروني ودي صفحة الفيسبوك الخاصة بيهم.

 

مكتبة المعايرجي:

مشهورة ولها فروع كثيرة في كل حتة في القاهرة، زي مدينة نصر، والدقي. ولكن أحدث فروعهم الموجود في التجمع هو الأكبر لأنه عبارة عن مول بيجمع كل الأدوات اللي ممكن تحتاجها في السنة الدراسية الجديدة زي الأقلام والكشاكيل وحتى الكتب الخارجية.

شوف كده موقعهم الإلكتروني والفيسبوك الخاص بيهم.

 

مكتبة سمير وعلي:

مش بس متخصصة في بيع الأدوات الهندسية، السنة دي سمير وعلي نازلة بمجموعة من الأدوات المكتبية والمدرسية المناسبة لجميع الأعمار؛ يعني مثلًا مجموعة الشنط اللي عندهم أسعارها ببتراوح ما بين (260 جنيه) للشنط اللي من غير عجل، وحتى (410 جنيه) اللي بعجل، والمجموعة دي أشكالها مناسبة للبنات والولاد؛ يعني لو بنتك عايزة شنطة ديزني هتلاقي، لو ابنك بيحب فريق برشلونة برضه هتلاقي.

ده موقعهم لو تحب تاخد فكرة، وده الفيسبوك الخاص بيهم.

 

مكتبة بكير:

من المكتبات الكبيرة اللي موجودة في القاهرة، واللي بتبيع أدوات مكتبية لجميع الأعمار فعليًا –من أول أقلام فلوماستر لولد في الحضانة لحد قلم شيك لرجل كبير- ده غير مجموعة الأدوات الفنية وشنط المدارس (أغلبها 800 جنيه وأنت طالع) وحتى الهدايا؛ كل حاجة موجودة هناك بجودة عالية.

ده موقعهم ودي صفحتهم على الفيسبوك، وده مقالنا عنه.

 

مكتبة ألوان:

مكتبة ألوان من الأماكن المشهورة جدًا لكل طلاب الكليات الفنية لأنها عندها مجموعة كبيرة من المنتجات الفنية المتخصصة، ولكن السنة دي مكتبة ألوان عندها مجموعة كبيرة من الشنط المدرسية اللي بتبدأ أسعارها من 200 جنيه وأنت طالع، ده غير مجموعة الأدوات المكتبية الكثيرة اللي ممكن تختار منها.

دي صفحتهم على الفيسبوك، ومالقيناش للمكتبة موقع إلكتروني.

 

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
06/09/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.