دليل شراء الفضة من خان الخليلي - تسوق Feature - كايرو 360
 







دليل شراء الفضة من خان الخليلي
دليل شراء الفضة من خان الخليلي
اصدرت في: 05/04/2011

معقل الأنتيكات٬ الأرابيسك٬ وأحلى فضة فنها مصري أصيل: خان الخليلي. بالأخص سوق الفضة في الخان٬ من أجمل أسواق القاهرة٬ اللي لازم كل ست تروحه – حتى لو مابـ تحبش الفضة - والرجالة كمان٬ لأن اللي هناك أكتر من مجرد فضة. السوق بـ يمتد من جنب الحسين في شارع «جوهر قائد» لغاية شارع «المعز».

لورايح بالعربية٬ الطريق الأحسن هو انك تـ طلع كوبري الأزهر٬ وتكمل لآخر الشارع تقريباً٬ في الآخر هـ تلاقي جرا چ مستشفى الحسين٬ لو محظوظ هـ تلاقي الجرا چ فيه مكان -السُياس اللي في المنطقة هـ يحاولوا يخلوك تركن عندهم قبل ما توصل للجرا چ ٬ فإتأكد انه فعلاً مليان لو قالوا لك كده – لو فعلاً مافيهوش مكان وده الغالب٬ السُياس هـ يدلوك على شارع يمين قبل الجرا چ ٬ هـ يركنوك مش بأقل من 5 جنيه٬ بس السايس هـ يقولك عشرة الأول. أما الجرا چ فرخيص جداً. السوق حوالي 7 دقايق مشي من الجرا چ . ولو مش عاوز تمشي ومستعد تدفع أكتر٬ في شارع جنب بيت السحيمي السُياس بـ يركنوا فيه بـ10 جنيه (لو مافيش أماكن ممكن تضطر تسيب المفتاح للسايس). ولو رايح بمواصلات ممكن تاخد مترو الأنفاق وتنزل في محطة العتبة٬ هـ تلاقي نفسك بينك وبين خان الخليلي كوبري الأزهر٬ وفي عربيات 7 راكب بنص جنيه ممكن تعديك الكوبري٬ وبتـ تاخد من قدام محطة المترو.

محلات خان الخليلي اللي بـ يديروها تجار من العيار التقيل٬ ناس عارفة يعني ايه تكسب زبون. البياع في المحل بـ يحاول بكل جهد – بأدب – انه يجذبك لمحله هو الأول٬ المنافسة طبعاً عالية جداً وده لمصلحة الزبون. وأول ما بـ تدخل المحل٬ تقريباً في جميع المحلات بإستثناء واحد ولا إتنين هـ يعاملوك أكنك أهم زبون جُملة هـ يجيلهم في اليوم. وده بالرغم من ان الزبون المصري بالنسبة لهم مكسبه أقل٬ عشان إعتمادهم بـ يكون أكتر على الزبون الأجنبي إللي بـ يدولوا أسعار أضعاف الأسعار الحقيقية. الرائع في الموضوع ان المحلات نفسها معمارها رهيب٬ جزء من القاهرة الإسلامية اللي معمارها بـ يفكر المصري قد ايه مصر حلوة٬ وبـ بيهر السايح بأناقة٬ دفء وتعقيد المعمار اللي عمره مئات السنين. من المحلات اللي لازم تـ تزار بس عشان معمارها وسقفها العتيق الجميل «إي چ بشن موسكي – Egyptian Mousky »٬ المحل معماره خيالي٬ وده بالذات بـ يعتمد على الأجانب أكتر من المصريين فما تستغربش لو القائمين على المكان ما إهتموش بيك كفاية. المحلات عامةً في منها الصغير واللي يادوب ممر، وفيه اللي حجمه الكبير.

الفضة في مصر 4 أنواع عيار 600 و800 و900 و925. وكل ما زاد العيار طبعاً زادت الجودة وزاد السعر. جرام الفضة في تاريخ كتابة المقال كان 7 أقل حاجة لعيار 800 وأول سعر هـ تسمعه هـ يكون 9 أو 10 – وطبعاً مش محتاجين نقول ان الفصال حاجة أساسية وضرورية جداً في الأسواق اللي من النوع ده بوجه عام - أما الـ900 والـ925 (الإيطالي) فأقل سعر ممكن توصله هو 15 جنيه للجرام٬ لكن الشائع انه بـ17 جم. أما بقى القطع الفنية اللي تجري الريق فالجرام فيها ممكن يغلى عن 25 جنيه. المصوغات أسعارها بـ تتراوح من 35 جنيه مثلاً لحاجة صغيرة لألوفات مألفة للمصوغات الضخمة العملاقة اللي وزنها ممكن يوصل للكيلو أو أكتر.

المصوغات اللي بـ تتباع فيه منها المصري المتأكسد٬ وهو ده اللي تشتريه من هناك لأنه هو اللي بـ يميز المكان والمنطقة٬ وفي الإيطالي اللامع٬ اللي فضته لونها فضي صريح. وفي كمان فضة مستوردة من دول شرقية تانية٬ أذواقها شبيها بأذواق المصوغات المصرية٬ زي التركي٬ التايلاندي والهندي. كتير من الفضة المصري معمولة بالأيد « handmade » وده إما يخليها واحدة من نوعها ومميزة جداً أو يخليها مش معمولة بدقة أو تقفيلها مش مهني بالدرجة الكافية. لكن في جميع الأحوال الفضة هناك فيها قطع فنية في قمة الجمال وذوقها المستوحى من حضارة وثقافة عريقة بـ يثريها جداً.

لأن المحلات كلها تقريباً عندها وِرَشها المصوغات المعمولة مخصوص حسب الطلب أمر سهل جداً. بعد الإتفاق مع البياع على القطعة المخصوصة اللي انت عاوزها ممكن تستلمها في خلال نفس اليوم لو رايح بدري شويه. وفي محلات تانية هـ تطلب على الأقل 4 أيام عشان الطلب يكون جاهز. وأكيد الجودة هـ تختلف كتير. ومن أحسن المحلات في كتابة الأسماء بالفضة٬ إما بالتفريغ أو بالكتابة بالفضة٬ محلات «واصف»٬ اللي بقالهم 3 أجيال في المجال ده٬ وليهم فروع كتير في أماكن كتير في القاهرة. واصف كمان عندهم إكسسوار فضة٬ والمقصود بده أجزاء صغيرة ممكن تصمم بيها المصوغة على مزاجك٬ ودي كانت حاجة مش موجودة عند محلات تانية. محلات «السقا» كمان بـ تعمل طلبات مخصوصة بسرعة جداً. ومن المحلات اللي تشكيلتها مميزة «بيس بازار – Peace Bazaar » و«بازار سارة – Sara Bazaar »٬ والحق يتقال تقريباً كل المحلات عندهم تشكيلتهم الخاصة والفريدة٬ بإستثناء كام موديل موجودين في كل مكان.

خان الخليلي كمان بـ يتباع فيه أحجار كريمة وشبه كريمة بأحجام وأشكال متنوعة جداً. فيروز٬ أكوامارين٬ عقيق٬ وحتي لولي زراعي. أهم حاجة في جولتك انك توصل لآخر السوق٬ هناك هـ تشوف مسجد قلاوون٬ ومتحف النسيج المصري ودي حاجات ماتـ تفاتش لو عمرك ما شفتها. المعمار رائع والشوارع المرصوفة بالحجر القديم بتاعة زمان٬ هـ تكون مسك الختام لجولتك. أ

فضة٬ دهب٬ ألماظ٬ الحاجات دي ليها كلها تمن: الفضة الأرخص٬ والألماظ الأغلى٬ والناس طبعاً عينيها هـ تزغلل كدة وتلمع لما تكون شايفة الفلوس اللي اتدفعت في حاجة كتيرة قوي٬ لكن اللي مالهوش تمن هو الفن٬ اللي بـ يدي شوية ألوان وورق أو فضة - يمكن مش غالية نسبياً - تمن أغلي من الدهب٬ ولصاحب الفن أو اللي بـ يحبه فهو تمنه أغلى أكتر كمان كتير. هو ده اللي هـ تشتريه من خان الخليلي...

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
مريم وجدي
حرر بواسطة:
مريم وجدي
تاريخ النشر:
05/04/2011