محلات الآلات الموسيقية فيها شئ من الندرة، المهتمين والمزيكاتية بـ يبقوا عارفين مكان أو إتنين بـ يتعاملوا معاهم دايماً ومش هـ تزيد معلوماتهم عن 3 أو 4 أماكن تانية في القاهرة، يعني ممكن نقول في إجمالي 10 محلات بس أدوات مزيكا في القاهرة كلها، بعيد طبعاً عن شارع محمد علي والمحلات اللي فيه لأن مش ده نوع المحلات اللي هـ نتكلم عليه النهارده.

في ميدان المساحة في حي الدقي وبالتحديد في شارع المساحة اللي هو إمتداد للميدان هـ تدخل تاني شارع رئيسي شمال هـ تلاقي المحل على يمينك. اليافطة شكلها مميز بس البنط اللي مكتوب بيه الاسم صغير وممكن ما تعرفش تقراه لو مش مركز.

«تون زون - Tone Zone » واحد من المحلات اللي بقت وجهة كتير من المازيكاتية وبالذات عازفي الجيتار والبيز جيتار. يمكن عشان أصحاب المحل الشركاء التلاتة بـ يلعبوا الآلات دي وفي أفضل فرق الجاز والروك والراي في مصر وطبيعي يكون إهتمامهم بآلاتهم المفضلة.

المحل إضاءته هادية ورايق والمعروضات مش كتير ومتكربسة فوق بعضها زي معظم محلات الآلات الموسيقية، بس في نفس الوقت لاحظنا أن المعروضات مش كتير ومفيش تنوع في الموديلات وفي قطاع كامل مهدور حقه تماماً وهو الآلات الإيقاعية والدرامز وإكسسواراته، والسبب أن المحل قرر يركز في الجيتارات وياخد توكيلات حصرية لموديلات عالمية للجيتار والباص جيتار وإكسسواراته.

المحل واخد توكيل جيتارات شيكتر Schecter الأمريكي، وهو الموزع الوحيد له في مصر، ورغم أن أسعاره غالية شوية (5900 جنيه لواحد من الموديلات الإليكتريك) بس عرفنا أنه صناعة يدوية ومصنوع من الخشب الماهوجني ودي كلها عوامل بـ تعلَّي سعر الجيتار، بس الموضوع هـ ياخد شوية وقت عشان تقنع حد يجيب ماركة لسة مش معروفة قوي تقريباً بنفس سعر الجيبسون Gibson وبعض موديلات الفندر Fender ٬ ودي ماركات مشهورة وغالية بس مطلوبة. تاني توكيل هو جيتار كوردوبا Cordoba الأكوستيك بالأوتار النايلون الكلاسيكية، ودي من أفضل الماركات الأسبانية المتخصصة في النوع ده من الجيتارات و اللي بالمناسبة بـ يستخدمها فريق « چ ي پ سي كينجز - Gipsy Kings » المشهور، وواحد من الموديلات اسمه ( GK Studio ) كان سعره 4200 جنيه دي غير مجموعة من الكيسات أو الـ ( Guitar Covers ) عليها نفس العلامة.

فيه كمان توكيلات إكسسوارات زي أوتار إرني بول Ernie Ball بكل موديلاتها وأحجامها وتوكيل بيك آبس للجيتار ماركة سيمور دانكن Seymour Duncan الأمريكية، وحتى لو مالقتش الموديل اللي بـ تدور عليه من الماركات دي ممكن تطلب إنها تجيلك مخصوص وإدارة المحل هـ توفرها في أسرع وقت.

في ستاند في وسط المكان عليه شوية إكسسوارات للجيتار وحليات للدرامز وميترونوم وتيونر وزيرو رينجز، وستاند تاني على الشمال لستيكس الدرامز بس وبالذات الـ ڤيك فيرث Vic Firth بـ موديلاتها والفايبر ستيكس ودي سعرها 230 جنيه، وفي سماعات الـ تشيل بوكس Chill Box الصغيرة اللي ممكن تتوصل على موبايل أو أي حاجة بوصلة صوت عادية وسعرها 350 جنيه. وفي آم پ لفاير لو حبيت تجرب أي جيتار وتقعد تلعب شوية، وفي مجموعة من الأعواد الخشب متعلقة على الحيطة برضه ممكن تجربها.

«تون زون» إختيار مثالي لو كنت بـ تدور على حاجة محددة مش نازل تتفرج وأنت لسة مش محدد عايز ايه، وهـ تكون سعيد أكتر لو كنت محترف جيتار أو باص جيتار، والموظف الموجود في المحل كان فاهم جداً ومتعاون جداً.