نادراً مابـ نلاقي محل في القاهرة بهذا القدر من الإبداع والجودة مجتمعين في منتجاته. «سامي أمين» حقق نجاح باهر في الجمع بين مختلف الجذور الثقافية المصرية في تصميماته من فرعونية٬ لبدوية٬ لعربية. الفرعين اللي في الزمالك ومصر الجديدة عاملين زي كنز من أجمل المشغولات الجلدية والنحاسية.

أول ما تدخل فرع الزمالك مستحيل ماتاخدش بالك من الحائطين المتوازيين اللي شايلين شنط جلد مصنوعة يدوياً٬ بكل الأشكال والأحجام والألوان. لو انت رجل عايز شنطة بسيطة - بس مميزة - للاپتوپ بتاعك٬ أو سيدة عايزة شنطة مشغولة صغيرة للنضارة الشمس بتاعتك٬ هـ تلاقي اللي انتوا عاوزينه في سامي أمين.

المشغولات الجلدية التانية عبارة عن محافظ وأحزمة. الأحزمة "التوكة" بتاعتها نحاسية كبيرة قوي وملفتة. من الأحزمة اللي لفتت انتباهنا٬ حزام توكته عبارة عن هلال ونجمة متعشقة فيه بحرفية، المحافظ كمان يبان عليها الحرفية في صناعتها٬ وبعضها معمول من جلد مضفور وبعضهم عليه تصميمات شرقيه مكوية عليهم.

في وسط المحل وآخره في ميداليات نحاس٬ حلقان٬ غوايش ومشابك الشعر. وفيه كمان أعقاد فرعونية معمولة من لوحات نحاس رقيقة بـ تبروز الرقبة بطريقة جميلة وجذابة.

كل ما عند «سامي أمين» له الطابع اليدوي والفني المميز. ولو مابتحبش لا النحاس ولا الجلد الطبيعي الخشن عموما، يبقى ممكن يعجبك الجزم المعمولة من القش والخوص التقليدية اللي عنده أو البراويز اللي فيها تفاصيل هندسية وألوانها مبهجة.

جنب المشغولات الرائعة اللي لوحدها سبب كافي انك تكون زبون دائم عند «سامي أمين»٬ أسعاره بالنسبة لمنتجاته المميزة٬ اليدوية٬ اللي جودتها عالية – كلها صفات تعلي السعر- معقولة جداً. الشنط بـ تبدأ من 180 جنيه للشنط الصغيرة لحد 600 جنيه للشنط الكبيرة (الشنط الصغيرة لقطة). المحافظ أسعارها ما بين 65 جنيه و115 جنيه٬ والأحزمة بـ تبدأ من 100 جنيه.

«سامي أمين» عنده الحاجات والإكسسوارات اللي ممكن تكون طول عمرك بـ تشوفها ومش عارف دي بـ تتباع فين، جرب زيارة المكان وممكن تبقى من الزبائن الدائمين للمحل.