من زمان وإحنا بـ نشوف المحل ده في كذا مكان في كايرو: في داندي مول، والعبور، والمعادي وسيتي ستارز، وكمان في الإسكندرية في محرم بك، وأخيرًا في المهندسين. ولأن الفرع الأخير ده لسه جديد نوعًا ما قررنا نزور المكان ده اللي واضح من اسمه «ذا بادي شوب – The Body shop» أنه بـ يبيع منتجات للعناية بالبشرة.

ذا بادي شوب جنب محل «وجوه - Faces» في شارع جزيرة العرب، وإحنا متجهين ناحية المحل رائحة عطور جميلة كانت سابقة المدخل علشان تنومنا مغناطيسي وتجر رجلنا ناحية الباب، المحل مساحته معقولة والمنتجات معروضة على ثلاثة حوائط من فوق لتحت، قابلتنا بنت لطيفة وكانت متعاونة جدًا مع كل استفساراتنا إلى جانب أنه كانت بـ تعطي لنا نصائح وعندها خبرة بنوع البشرات وتقول لك إيه الأنسب لك من المنتجات، إلى جانب أنها حافظة مكونات كل منتج بالضبط وفائدة المكونات دي إيه، لأن ببساطة كل العاملين في المحل بـ يعطوا لهم كل المنتجات مجانًا علشان يجربوها بنفسهم وبالتالي يكونوا أقدر ناس على الكلام عنها وشرحها عن اقتناع.

أجمل حاجة في الموضوع بقى أن منتجات المحل كلها طبيعية يعنى مش داخل فيها عناصر كيميائية، عناصر عضوية Organic فقط، أول ما تدخل على اليمين هـ تلاقي عطور للبيت بـ تتحط في فواحات ولها نوعين، والرائحة بـ تقعد معاكي لحد 6 شهور.

الأرفف كلها عليها المنتجات والجميل أن من كل نوع منتج فيه علبة مخصوص وسطهم "تجربة أو Tester" ملزوق عليها ستيكرز مكتوب عليه Try me ممكن تحط منها بادي لوشن وكريمات وتجربها براحتك على بشرتك وتشم رائحتها، هـ تلاقي بعد الروائح قسم العناية بالبشرة والعطور والبادي لوشن، كل المنتجات أو معظمها داخل في تكوينها فواكة زي: ساتسوما (نوع فاكهة شبه اليوسفي)، الكريز، البرتقال، البطيخ، جوز الهند.. إلخ وفيه منتجات فيها زبدة الشيا.

فيه هناك كل حاجة: سكراب، بادي لوشن، شاور جل، عطور، كريمات، صابون، ليف استحمام، ومزيل عرق.. إلخ، جربنا بادي لوشن زبدة الشيا وكمان فيه منه سكراب (235 جنيه)، كمان شمينا رائحة مزيل لرائحة العرق والمهم أنه مافيهوش صفائح ألمنيوم المسؤولة عن أسوداد لون الجلد، وداخل فيها جلسرين علشان ينعم البشرة. زبدة الكاكاو بـ 50 جنيه، والكريم الليلي (150 جنيه)، وكريم الزبدة (130 جنيه)، إلى جانب قسم الشامبو والبلسم اللي بـ تتميز أنها من غير أمونيوم ولا صوديوم ولا مكسبات لون أو رائحة.

اللي مبهر بقى قسم الماكياج، فيه هناك منتج اسمه Lip & Cheek (110 جنيه) عبارة عن روج أحمر خفيف وفي نفس الوقت أحمر خدود، لما جربناه كان أكثر من رائع بـ يخلي خدودك وشفايفك حمراء طبيعي ولا كأنك حاطة حاجة، كمان فيه علبةPink Shimmer waves (200 جنيه) عبارة عن كذا لون لظلال جفون بدرجات مختلفة لكن السحر بقى أنك لو مشيتي بالفرشاة عليهم كلهم وعملتي منهم خليط يتحول يبقى ملمع للخدود.

المحل 90% منه لمنتجات خاصة بالسيدات، لكن فيه جزء صغير هناك للرجال فيه كريم بعد الحلاقة ومزيل للعرق وعطور وشاور جل. والموضوع مش مقتصر على منتجات العناية بالبشرة ده بـ يبيعوا كمان مقص ومبرد للأظافر وأداة لإزالة الرؤوس السوداء، وكمان أدوات العناية بالأرجل.

"ذا بادي شوب" ما عندهمش خدمة توصيل، وممكن تستبدلي منتجات جبتيها خلال 14 يوم (وخلال 3 أيام لو المنتج اللي أخذتيه عليه خصم)، وكمان خدمة استرجاع فلوسك لكن مش كاش، عندهم نظام مختلف أنك بـ تأخذي فلوسك لكن بـ تتسجل على كارتك الخاص بشركة "الشايع" المسؤولة عن المحل شبه كارت الفيزا علشان بالفلوس دي تشتري أي منتج من المحلات التابعة للشركة زي: H & M, Milano, Top Shop, Mother Care وغيرها.

عندهم Package ممكن تشتري كل المجموعة بتاعة منتج معين وبـ تبقى ملفوفة على شكل هدية لو عاوز تهديها لأصحابك وبـ يكون سعرها أقل من ما تشتري كل منتج منهم لوحده بـ يتراوح سعرها من 450 لحد 599 جنيه.

خلصت رحلتنا داخل المحل، غير أننا انبهرنا بكمية المنتجات الجامدة جدًا لكن كمان مشينا من المحل ورائحتنا فيها كوكتيل فواكة وعطور مش طبيعية، وخدودنا حمراء وجميلة خلتنا نحب نفسنا بزيادة ونحب ندلعها.. وفي نفس الوقت بطريقة آمنة وصحية.