في أبراج بدر الموجودة بجوار الطريق الدائري بالمعادي الجديدة، وقريب من محلات «هابيتاتHabitat - » و«أديداس أوتليت – Adidas Outlet» اللي ممكن تشوفهم وأنت على الطريق السريع، وممكن تنزل من الطريق الدائري على الطريق الداخلي البطئ من عند «كارفور» لحد ما توصل لأبراج بدر اللي كل الأدوار الأرضية بتاعتها تقريبًا تجارية وفيها محلات ومطاعم.

«شاتكس - Shatex» له يافطة مضيئة باللون الأحمر هـ تلفت نظرك في المكان الهادئ المظلم أحيانًا، مساحة المحل مش كبيرة من الداخل، تقريبًا يكفي 3 أو 4 قطع أثاث كبيرة بالكثير، وعلشان كده وقت زيارتنا كان فيه كنبة واحدة كبيرة وركنة وبعض الترابيزات متوسطة الحجم، وباقي المعروضات كانت عبارة عن سجاد ملفوف ومستود على الجدران وبعض التحف والفازات والأباجورات موزعين في المكان.

كمية كبيرة جدًا من كتالوجات الأقمشة بألوان وخامات مختلفة ممكن تختارها لأي موديل من أي قطعة أثاث، والسعر مش بـ يفرق كثير من خامة للثانية.

الأسعار غالية رغم أن فيه تخفيضات بـ توصل لـ 50% وقت زيارتنا. عجبنا كرسي من غير مساند (نيقوسيا بانكيت) زي ما مكتوب في تيكيت الموديل وكان سعره 1500 جنيه بعد الخصم، وقبل الخصم كان بحوالي 3000 جنيه! كثير جدًا على مجرد كرسي خاصة أنه مش أنتيكة زي حاجات ثانية معروضة في المحل. لكن ده ما يمنعش أن الأنتيكة فعلًا كان سعرها غير عادي، وكانت عبارة عن دولاب أو شوفونيرة من المعدن، ومرسوم عليها لوحة شهيرة لبيكاسو، رسمها فنان بطريقة يدوية على قطعة الأثاث بحيث تأخذ شكل منحنيات القطعة والأدراج الموجودة فيها، شكلها كان ملفت وفني جدًا، وسعرها كان 25 ألف جنيه بس!

أكثر حاجة أسعارها معقولة في المحل هي الركنات والكنبات الكبيرة، تصميمات أنيقة جدًا، والقماش دائمًا على ذوقك أنت، وأسعار بـ تبدأ من 2900 جنيه فما فوق، السجاد كمان كان فيه موديلات مبتكرة زي حلقات الوبر الصوف العملاقة باللون البني (2750 جنيه)، والسجاد المودرن بكل أشكاله بأسعار بـ تبدأ من 1500 جنيه. وترابيزات للأنتريه أو غرف المعيشة خامتها ممتازة بأسعار من 1800 جنيه لـ 2500 جنيه. وللعلم كل الأسعار اللي بـ نقولها هنا بعد الخصم، وأي معروضات متعلق فيها تيكيت السعر وبادج باللون الأحمر ده معناه أن لسه عليه خصم.

الأنتيكات والأباجورات الموجودة في المحل شيك ورقيقة، ومش شبه أي مكان ثاني، فازات بأحجام متوسطة بسعر 500 جنيه، وصواني عبارة عن قطع معدنية بأشكال هندسية مستوية وبأحجام مختلفة ممكن تستخدمهم مدمجين في بعض كصينية واحدة، أو ممكن تستخدم كل قطعة منفردة، وأسعار القطع بـ تكون ما بين 300 لـ 500 جنيه حسب الحجم. أباجورة ضخمة مكونة من 3 مكعبات خشبية ومحاطة بالقماش كان شكلها جميل وسعرها كان 1500 جنيه.

المحل على قد ما هو صغير لكن كان فيه معروضات مغرية كثير ممكن تقف تتفرج عليها وقت طويل، وخدمة العملاء جيدة وواعية، ومواعيد التسليم مظبوطة. «شاتكس» مكان مثالي لإضافة بعض اللمسات الجمالية بعد ما تكون بالفعل فرشت البيت من مكان ثاني أسعاره أقل شوية، إلا إذا كنت مستعد للفاتورة كويس.