علشان إحنا دلوقتي في فترة أعياد والأجازات على الأبواب فـ أكيد إحنا محتاجين شنط للسفر جديدة، وخصوصًا كمان أن المطارات مش بـ تتعامل برفق مع الشنط بتاعتنا يعني مثلاً بعد سفريتين أو ثلاثة بـ تلاقي الشنطة شكلها اتبهدل، لكن إحنا شاكرين لوجود محلات في القاهرة زي "سيج –Segue " لحل المشكلة دي ونقدر نشتري مجموعة شنط سفر جديدة وحلوة.

هـ تلاقي "سيج" في سيتي ستارز في الدور الأول في المرحلة الثانية أمام محل "ذا بادي شوب". "سيج" عنده شنط من «بنيتون – Beneton» وغير شنط السفر هـ تلاقي كمان محافظ من "سيسلي"، وفيه شنط ماركة "سيج" نفسها وشنط ثانية ماركة بنيتون، بس الحاجة الحلوة في شنط بنيتون أن تصميمها مميز وبراق وألوانه مختلفة وده بـ يخلي أسهل أنك تتعرف على شنطك في حزام استلام الحقائب في المطار.

مجموعة شنط "بنيتون" عند "سيج" أسعارها كلها متقاربة ومن أحسن الحاجات في بنيتون أن وزن الشنط خفيف فممكن تلم فيها كل حاجاتك. مجموعة الشنط الصغيرة وزنها 3.5 كيلو و بـ 1070 جنيه. مجموعة الشنط المتوسطة وزنها 4 كيلو وسعرها بـ 1280 جنيه أما مجموعة الشنط الكبيرة وزنها 5 كيلو وبـ 1520 جنيه. الأسعار كلها في نفس الحدود والتصميم مشرق وعليه لوجو بنيتون.

فيه مجموعة تصميمات خاصة زي تصميم شاكيرا، التصميم شكله حلو وغلاف الشنطة ثقيل وجامد وألوانه بمبي منور أو أزرق وعليه لوجو بنيتون بارز. وفي وقت زيارتنا للمحل كان موجود منها الحجم المتوسط والحجم الصغير و أسعارهم 1470 جنيه و1225 جنيه.

فيه شنط بنيتون بأسعار أرخص وبتصميمات عادية عليها لوجو بنيتون فقط يعني ممكن تلاقي الشنطة الصغيرة بـ 225 جنيه والمتوسطة بـ 350 جنيه ولو عاوز حاجة تصميمها مختلف شوية ومش بـ تبقى قديمة بسرعة ممكن تلاقي شنطة 795 جنيه.

أما شنط ماركة سيج نفسها فتصميمها قريب جدًا من بنيتون لكن أغلى منها في السعر، هـ تلاقي أسعار الشنط المتوسطة والصغيرة أسعارها بـ تتراوح ما بين 300 جنيه و 400 جنيه، ولو عاوز حاجة بسيطة أو محفظات عليها رسومات زهور هـ تلاقيها متوفرة عندهم، أسعار الشنط اللي تصميماتها أحلى بـ تبدأ من 525 جنيه.

معظم شنط سيسلي أسعارها ما بين 400 و500 جنيه. لكن مع الأسف أشكال شنط سيسلي زي أشكال بنيتون وسيج لدرجة أننا شكينا أن الشنط كلها مصنوعة في نفس المصنع.

فيه قسم للجزم صغير وفيه ماركات سيج نفسها زي جزم الويدجز أو بكعب عالي من الأمام والخلف بـ 500 جنيه وشبشب مصنوع من الفلين بـ 230 جنيه.

تصميمات سيج كلها متشابهة ودي حاجة مملة لو أنت بـ تدور على أشكال متنوعة ومختلفة فمن الأفضل أنك تركز على الشنط. العاملين في المحل لطاف وبـ يخلوك تلف في المحل من غير أي تدخل. لو أنت عاوز شنط تصميمها حلو وألوانها براقة يبقى لازم تروح "سيج".