مع المناسبات الكثيرة اللي دائمًا بـ تتطلب فستان مميز أو بنطلونات معينة المفروض يكون ده عند أي بنت واللي ما ينفعش حياتك تمشي من غيرها، متطلبات البنت المصرية هي بالظبط متطلبات أي بنت في العالم، رغم أن فيه ناس بـ تقول أن التسوق في مصر ما ينفعش يقارن بالتسوق في العالم، لكن فيه محلات بـ تفتح في كل مكان في مصر وبـ يحاولوا يكونوا مختلفين.

هـ تلاقي في الزمالك محلات كثير قوي للتسوق وكمان زاد عليهم محل رائع هو «يوفوريا - Euphoria»، هـ تلاقيه مفتوح من الاثنين للسبت من 11 صباحًا لـ 10 مساءً وموجود في 19 شارع أبو الفدا في الزمالك قبل كوبري 15 مايو هـ تلاقي المحل لونه من بره أبيض ومدخله شكله شيك ومعمول من الخشب يخلي أي حد يحب يدخله.

له فرع أساسًا في المهندسين، وهـ يفتتح فرع الزمالك رسميًا في منتصف شهر يناير 2012 وده لأن فيه حاجات لسه ما خلصتش فيه. لكن المحل بـ يتكلم عن نفسه، ديكور شيك باللون الأبيض، سقف عالي وإضاءة رائعة والفرش البسيط والأرض لونها بني كل ده بـ يعطي طابع أنيق للمكان زي الملابس اللي فيه بالظبط.

المحل فيه مجموعة متنوعة من تصميمات مصممين الأزياء العالميين زي كريستيان ديور، هيرف ليجر، لا بيتيت سالوب، برين وجونوفوي، نجحت صاحبة المحل حنان الشافعي أنها تجيب مجموعة فساتين متنوعة وشيك وأنيقة. الستايل العام للمحل كله للشباب وجريء وفي نفس الوقت أنيق وكل حاجة لها شكل منفرد. الملابس المعروضة من العام الماضي وملابس الموسم الجديد للسنة دي هـ تبقى موجودة في افتتاح المحل في شهر يناير القادم. لو أنت بـ تدور على فساتين سهرة أو فساتين كوكتيل أو بلوزات أو جاكيتات أو ملابس كاجوال كله هـ تلاقيه في المحل وبكميات وكمان عليه خصم 80%.

الفساتين ممكن تلاقيها النهاردة في حدود 800 لـ 1000 جنيه والبلوزات والبيكيني في حدود 350 جنيه إلى 600 جنيه، لكن لما لبس الموسم الجديد ينزل الأسعار هـ ترجع لطبيعتها يعني ممكن تلاقي الفستان بـ 7000 جنيه، والبلوزة بـ 1500 جنيه و البكيني من 900 لـ 1000 جنيه!

لكن خدي بالك من الحاجات المعروضة من الموسم اللي فات، يعني ممكن ما تلاقيش كل المقاسات ماعدا الصغير منها موجود وده عكس المحلات الثانية اللي على طول عندها مقاسات كبيرة فقط والمقاسات الصغيرة بـ تكون خلصت.

المحل فيه مجموعة من الإكسسوارات، زي الشنط وكمان فيه قسم للمجوهرات في مدخل المحل في منطقة مقفول عليها زي أي محل مجوهرات عادي في الزمالك، لكن إحنا عرفنا أن كل الإكسسوارات هـ تترفع من العرض لما توصل إكسسوارات الموسم الجديد في خلال شهر.

رغم أن ذوق «يوفوريا» في الملابس رائع وشيك لكن المفروض الواحد يروح المكان ده لو ناوي يخلص على كل فلوسه اللي في البنك. لكن لو عاوز قطعة رائعة ومافيهاش أي عيوب وشكلها حلو يبقى لازم تروح هناك.